ដោយៈ លក្ខិណា
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកវេង សាខុនបានបញ្ជាក់កាលពីពេលថ្មីៗនេះថា ក្រោយពេលកម្ពុជា និងចិន បានចរចាទទួលបានលទ្ធផលជាបន្តបន្ទាប់ កម្ពុជាហើយនិងចិនក៏គ្រោងនឹងចរចាសម្រាប់ទីផ្សារនូវ “ផ្លែស្រកានាគ”ទៅកាន់ទីផ្សារប្រទេសមួយផងដែរ ដោយសារតែបច្ចុប្បន្នចិន កំពុងមានតម្រូវការខ្ពស់លើផ្លែស្រកានាគ ។
លោកបានមានប្រសាសន៍ឲ្យដឹង ក្នុងពិធីសម្ភោធការនាំចេញថ្លែស្វាយ ទៅកាន់ទីផ្សារប្រទេសចិនជាលើកដំបូងកាលពីពេលថ្មីៗនេះថា កន្លងមកកម្ពុជាបានសម្រេចការនាំចេញផ្លែឈើ ទៅកាន់ប្រទេសចិនម្ដងមួយមុខៗ ហើយមានអ្នកឆ្ងល់ថា ហេតុអ្វីមិនព្រមលើកជាកញ្ចប់ សម្រាប់ពិភាក្សាក្នុងការនាំចេញតែម្ដងទៅ ។ នេះគឺជាការចង់បានរបស់អគ្គរដ្ឋបាលគយចិន ដែលតម្រូវឱ្យកម្ពុជា លើកដាក់សំណើរនាំចេញម្ដងមួយៗ ដើម្បីឱ្យក្រុមជំនាញរបស់ភាគិនចិន ចុះមកពិនិត្យមើលតាំងពីចំការ បច្ចេកទេសដាំដុះ និងលក្ខខណ្ឌតម្រូវ មុននឹងការវេចខ្ចប់ទៅកាន់ប្រទេសចិន។
លោកបន្តថា ឆ្នាំកន្លងទៅ យើងបានចេញរួចហើយនៅផ្លែចេកស្រស់ ហើយបន្តមកទៀតផ្លែស្វាយស្រស់ និងគ្រោងនាំចេញនូវផ្លែស្រកានាគ និងផ្លែមៀនប៉ៃលិនផងដែរ។
បើតាមរបាយការណ៍របស់លោកបណ្ឌិតយ៉ង សាំងកុមារដែលជាអ្នកដឹកនាំសហគមន៍សម្បូរនាគ កាលពីប៉ុន្មានថ្ងៃមុននេះបានឱ្យដឹងថា ទីផ្សារផ្លែស្រកានាគបានរីកកាន់តែធំ មានទំហំរាប់ពាន់លានដុល្លារនៅលើទីផ្សារអន្តរជាតិ ជាពិសេសប្រទេសចិន។ ជាក់ស្ដែងនៅក្នុងវិបត្តិកូវីដ១៩ វៀតណាមនៅតែអាចនាំចេញផ្លែស្រកានាគ បានទំហំជាង១ពាន់លានដុល្លារក្នុងឆ្នាំ២០២០ ។
ដូច្នេះកម្ពុជាគួរតែឆក់ឱកាសនេះ ដើម្បីពង្រីកការដាំដុះផ្លែស្រកានាគ ទៅកាន់ទីផ្សារប្រទេសចិន ខណៈតម្រូវការនឹងកើនឡើងបន្ថែមទៀតនៅពេលចប់កូវីដ១៩ ។
លោកយ៉ង សាំងកុមារបានឱ្យដឹងថា លោកកំពុងដឹកនាំ និងកៀងគរកសិករបោះទុនវិនិយោគ លើការដាំដុះស្រកានាគបន្ថែមទៀត ដើម្បីផ្គត់ផ្គង់ក្នុងស្រុកឱ្យបានគ្រប់គ្រាន់និងនាំចេញ ទៅកាន់ទីផ្សារអន្តរជាតិបន្ថែមទៀត។
លោកបន្តថា “យើងនឹងធ្វើឱ្យកម្ពុជា អាចគ្រប់គ្រងទីផ្សារកសិកផលបានល្អ ដោយមិនពឹងការនាំចូលពីបរទេស នូវអ្វីឌែលយើងអាចផលិតបាន ដោយចាប់ផ្ដើមពីដំណាំស្រកានាគ” ៕
