ដោយៈ សាវុធ
ភ្នំពេញៈ ពាណិជ្ជករពីជុំវិញពិភពលោក កំពុងតែសម្លឹងមើលទីផ្សារដ៏ធំរបស់ចិន ប៉ុន្តែរាល់កិច្ចព្រមព្រៀងទាំងអស់ អាចនឹងជួបបញ្ហារាំងស្ទះបើលោកអ្នក មិនស្គាល់របៀបរបបខុសទំនងមួយចំនួន ដូចជាការគ្រាន់តែស្លៀកពាក់ពណ៌ស ទៅចចារគ្នាជាដើម។
រឿងសំខាន់បំផុត ដែលលោកអ្នកត្រូវយល់ នៅពេលកំពុងតែចចារកិច្ចការ ពាណិជ្ជកម្មអ្វីមួយជនជាតិចិន គឺលោកអ្នកត្រូវការគេ ប៉ុន្តែគេមិនត្រូវការលោកអ្នកទេ ហើយសូមចងចាំគន្លឹះទាំងនេះ៖
ទី១) ស្គាល់បរិបទនយោបាយ
នៅក្នុងប្រទេសចិន គេអាចឃើញក្រុមមន្ត្រីបក្សសកម្ម នៅស្ទើរតែគ្រប់ក្រុមហ៊ុន ទាំងធំទាំងតូច ជាពិសេសក្រុមហ៊ុនធំ។ លើសពីនេះទៅទៀត គ្រប់ក្រុមហ៊ុន ដែលពាក់ព័ន្ធនឹងបរទេសការចូលរួម ពីមន្ត្រីបក្សក្នុងកិច្ចការ រដ្ឋបាលជាតម្រូវការស្របច្បាប់។ គ្រប់ការសម្រេចចិត្តទាំងអស់ពីដៃគូចិន ផ្អែកលើមូលដ្ឋាននយោបាយ ហើយយកល្អលោកអ្នកមិនត្រូវបង្ខំគេ ឱ្យងាកចេញពីបន្ទាត់ នយោបាយទេ។
បើលោកអ្នកបង្ហាញការយល់ដឹង បរិបទនយោបាយក្នុងប្រទេសចិន ដៃគូចចាររបស់លោកអ្នក នឹងចាត់ទុកលោកអ្នកថា ជាមនុស្សមានពិសោធន៍ច្រើន និងជាបុគ្គលគួរឱ្យទុកចិត្តបាន។ បរិបទនយោបាយសំខាន់ៗ ដែលត្រូវតែដឹងមានដូចជា ផែនការប្រាំឆ្នាំ កម្មវិធីរយៈពេលយូរអង្វែង ដែលគ្រប់គ្រងដោយរដ្ឋ ដូចជាកម្មវិធីក្រវ៉ាត់ និងវិថីជាដើម។
ទី២) សម្រេចចិត្តនិងបត់បែនឱ្យរហ័ស
គេប៉ាន់ប្រមាណថាមានក្រុមហ៊ុនថ្មីៗ ប្រហែល១២,០០០កើតរាល់ថ្ងៃ ក្នុងប្រទេសចិន ដែលបង្កើតបានជាបរិស្ថាន ប្រកួតប្រជែងឥតឈប់ឈរ។ គ្រប់ពេលដែលមានឱកាស គេតែងតែឃើញ ក្រុមហ៊ុនរាប់សិបសម្រុកទៅដណ្តើមយក។ ក្រុមហ៊ុនណាដែលអាចចាប់យកឱកាសថ្មីបាន នឹងឈរជើងជាអ្នកឈ្នះ ក្នុងទីផ្សារចិនដ៏ធំ ដែលមានអ្នកប្រើប្រាស់១,៥ពាន់លាននាក់។ ហេតុផលនេះហើយ បានជាក្រុមហ៊ុនចិន រីកចម្រើនយ៉ាងរហ័ស។
ការប្រកួតប្រជែងខ្លាំងបែបនេះជៀសមិនផុត ពីការលួចចម្លងស្នាដៃគ្នាទេ។ ដូច្នេះសូមត្រៀមចិត្តទុក ជាស្រេចថាផលិតផល របស់លោកអ្នកនឹងមានគេ ផលិតនៅក្រៅក្រុមហ៊ុនលោកអ្នកដែរ។ ក្រុមហ៊ុនចិន ដែលធំៗនិងជោគជ័យ ធ្វើពាណិជ្ជកម្មផ្សេងៗជាច្រើន ដែលមិនទាក់ទងគ្នា ក្នុងពេលតែមួយ។ ជនជាតិចិនបត់បែនតាមស្ថានភាព ផ្លាស់ប្តូររបស់ទីផ្សាររហ័សណាស់ ដូច្នេះគេក៏រំពឹងចង់បានដៃគូដែលគិត និងធ្វើរហ័សដែរ។
ទី៣) ស្គាល់បរិបទវប្បធម៌
ប្រទេសចិនតែងតែមានទំហំធំ ជានិច្ចខាងភូមិសាស្ត្រ។ ដើម្បីរក្សាសណ្តាប់ធ្នាប់ នៅទូទាំងប្រទេស គេបានបង្កើតឱ្យមានទំនៀមទម្លាប់ រួមនិងសកម្មការគ្រប់គ្រង ដោយរួមទាំងសកម្មភាព ពាណិជ្ជកម្មផង តាំងពីរាប់ពាន់ឆ្នាំមកហើយ។ ជារឿងចាំបាច់ ដែលអ្នកជំនួញទាំងអស់ ត្រូវគោរពនិង អនុវត្តន៍តាមប្រពៃណី យូរអង្វែងទាំងអស់នេះ ដោយសារដៃគូពាណិជ្ជកម្មចិន នឹងវាយតម្លៃលោកអ្នក ចំពោះកម្រិតយល់ដឹង រឿងវប្បធម៌ទាំងអស់នេះ។
ភាពស្មុគស្មាញមួយ ខាងវប្បធម៌ដែលដៃគូពាណិជ្ជកម្មចិន ចូលចិត្តអនុវត្តន៍គឺគេប្រើប្រាស់ជំនួបប្រជុំ លើកទីមួយដែលច្រើន តែមានរយៈពេលយូរ ដើម្បីយល់ដឹង និងវាយតម្លៃលោកអ្នក ហើយជាទូទៅកិច្ចប្រជុំផ្លូវការ មិនមានការនិយាយរឿងពាណិជ្ជកម្មអ្វីទេ។
ទី៤) លើកសំណើយុទ្ធសាស្ត្រជាជាងកិច្ចព្រមព្រៀងជាក់លាក់
គំរូពាណិជ្ជកម្មចិនតែងតែសម្លឹងមើល វែងឆ្ងាយដោយសារជនជាតិចិន មានទម្លាប់គិតគូរផ្តោតលើ ភូមិសាស្ត្រទូលំទូលាយ។ ហេតុដូច្នេះហើយ គេនឹងមិនពេញចិត្តនៅពេល លោកអ្នកផ្តល់ជូន ត្រឹមតែជាការលក់ផលិតផលរបស់លោកអ្នកនោះទេ បើទោះជាផលិតផលនោះ មានភាពទាក់ទាញ និងអស្ចារ្យយ៉ាងណាក៏ដោយ។ នៅក្នុងប្រទេសចិន គេចូលចិត្តកិច្ចសហការគ្នា រយៈពេលយូរអង្វែង។
ហេតុដូច្នេះហើយដៃគូពាណិជ្ជកម្ម ដែលគួរឱ្យទុកចិត្តបាន គឺមនុស្សដែលបានបង្កើតយុទ្ធសាស្ត្រ ដើម្បីឈរជើងនៅក្នុងទីផ្សារចិនយូរអង្វែង។ ភាពជាដៃគូរបៀបនេះ ធ្វើឱ្យគេទុកចិត្តខ្លាំងណាស់។ សំណើចចារដ៏ប្រសើរ គួរតែមានលក្ខណៈរបៀបនេះថា “នេះគ្រាន់តែជាផ្នែកមួយឬជំហានដំបូង នៃចង្វាក់ផលិតផល របស់យើងប៉ុណ្ណោះ យើងនឹងបង្កើតបរិមាណ… ហើយនេះជារៀបដែលយើង មើលឃើញពាណិជ្ជកម្មរបស់យើង នៅក្នុងរយៈពេល១០ឆ្នាំខាងមុខ” ។
ទី៥) និយាយឱ្យចំសាច់រឿង
ដោយសារតែស្រឡាញ់ផែនការ ពាណិជ្ជកម្មយុទ្ធសាស្ត្រ អ្នកជំនួញចិន រំពឹងចង់ឃើញទិន្នន័យ និងតួលេខច្បាស់ៗ គឺមិនមែនគ្រាន់តែពាក្យរៀបរាប់វែងអន្លាយទេ។ ជំនួសឱ្យគំនិតនៃគម្រោងមិនជាក់លាក់ លោកអ្នកត្រូវបង្ហាញផែនការពាណិជ្ជកម្មត្រង់ៗ ដែលមានការប៉ាន់ប្រម៉ាណ ច្បាស់ និងកំណត់ រយៈពេលនៃការទទួលបាន ផលចំណេញមកវិញ។
អ្នកជំនួញចិន សព្វថ្ងៃមានភាពវៃឆ្លាតនិងដឹងច្រើនណាស់ ទាក់ទងនិងហិរញ្ញវត្ថុ ហើយភាគច្រើន នៃអ្នកទាំងនោះរៀននៅសាលាពាណិជ្ជ។សូមចងចាំចំណុចមួយទៀត ថា ផែនការពាណិជ្ជកម្ម ដែលល្អត្រូវសរសេរ ឬបកប្រែទៅជាភាសាចិន៕Khmerinkorea៕
