ដោយវុត្ថា
ភ្នំពេញៈ អ្នកឧកញ៉ា គិតម៉េង ប្រធានសភាពាណិជ្ជកម្មកម្ពុជា និងជាប្រធានសម្របសម្រួលក្រុមការងារទាំង១៣ផ្នែកឯកជន នៃវេទិការាជរដ្ឋាភិបាល-ផ្នែកឯកជនបានបើកកិច្ចប្រជុំស្តីពី “វឌ្ឍនភាពនិងស្ថានភាព ផលប៉ះពាល់កំឡុងពេលនៃការរាតត្បាតជំងឺCovid-19 លើវិស័យឯកជន នៅក្នុងប្រទេសកម្ពុជា”។
កិច្ចប្រជុំនេះធ្វើឡើងនៅថ្ងៃទី ១ ខែមិថុនា ឆ្នាំ ២០២០នេះ ក្នុងគោលបំណងទទួលយក និងប្រមូលនូវវឌ្ឍនភាព ស្ថានភាព ធាតុចូល ក្នុងកំឡុងពេលនៃការរាតត្បាតរបស់ជំងឺCovid-19 មកលើវិស័យឯកជន និងកំពុងបន្តផលប៉ះពាល់យ៉ាងខ្លាំងទៅលើគ្រប់វិស័យជាអាទិដូចជា ទី១ ក្រុមការងារក “កសិកម្ម កសិឧស្សាហកម្ម៖ ការប្រមូលផលមិនទាន់ពេល ដោយសារតែកង្វះកំលាំងពលកម្ម និងការនាំចូលចំណីសត្វមានតម្លៃខ្ពស់ ក្នុងវិស័យចិញ្ចឹមសត្វ និងបានស្នើសុំឱ្យមានរោងចក្រផលិតចំណីសត្វក្នុងស្រុក ដើម្បីបញ្ជៀសនូវការនាំចូចំណីសត្វ។
ទី២ ក្រុមការងារខ “ទេសចរណ៍” ៖វិស័យទេសចរណ៍នៅខេត្តសៀមរាបមានការធ្លាក់ចុះខ្លាំងដោយគ្មានភ្ញៀវទេសចរណ៍ជាតិ និងអន្តរជាតិ និងសេវាក្នុងការបង់ប្រាក់ដំកល់៣០០០ដុល្លារសម្រាប់ចត្តាឡីស័ក ស្នើសុំឱ្យមានទីកន្លែងសមរម្យសម្រាប់អ្នក ចត្តាឡីស័ក ដែលទទួលស្គាល់ដោយក្រសួងសុខាភិបាល និងឱ្យមានការសម្របសម្រួលពីរដ្ឋាភិបាលទៅលើថ្លៃជួលទីតាំងប្រកបអាជីវកម្ម និងសុំឱ្យដំណើរការឡើងវិញនូវកន្លែងកម្សាន្ត និងឱ្យក្រសួងអប់រំ ជ្រើសរើសសាលាអន្តរជាតិមួយចំនួន ធ្វើជាគំរូក្នុងការបើកដំណើរការឡើងវិញ ដោយមានការកំណត់ស្តង់ដារសុវត្ថិភាពពីក្រសួងសុខាភិបាល។
ទី៣ ក្រុមការងារគ “កម្មន្តសាល សហគ្រាសធុនតូច និងមធ្យម និងសេវា” ស្នើសុំឱ្យមានការយកទំនិញតាំងពិពរណ៌មកពីក្រៅប្រទេស មានចំនួនកំណត់ និងសមរម្យ។ទី៤ ក្រុមការងារង “ សេវាធនាគារ និងហិរញ្ញវត្ថុ”៖ ច្បាប់នៃការលាងសម្អាតសាច់ប្រាក់ថ្មី ស្នើសុំឱ្យរដ្ឋាភិបាលសម្របសម្រួល ឱ្យមានការប្រើប្រាស់សេវាប្រាក់តម្កល់៣០០០ ដុល្លារតាមប្រព័ន្ធធនាគារ។
ទី៥ ក្រុមការងារឆ “ដឹកជញ្ជូន និងហេដ្ឋារចនាសម្ព័ន្ធ” ៖ស្នើសុំឱ្យរដ្ឋាភិបាលមានការសម្របសម្រួល ឱ្យមានការបើកច្រកព្រំដែនឡើងវិញ តាមការព្រមព្រៀងទ្វេភាគីកម្ពុជា វៀតណាម។ ទី៦ ក្រុមការងារឈ “ស្រូវ-អង្ករ” ៖ស្នើសុំរដ្ឋាភិបាលបង្កើតនូវមន្ទីរពិសោធន៍ DNA ស្រូវអង្ករ និងពិនិត្យជំងឺស្រូវអង្ករ ក្នុងស្រុកដែលទទួលស្គាល់ដោយអន្តរជាតិ និងឱ្យមានរោងចក្រផលិតចំណីសត្វក្នុងស្រុក ។ ស្នើឱ្យធនាគារអភិវឌ្ឍន៍ជនបទពន្យាពេលនៃការប្រមូលប្រាក់កម្ចីដល់១២ខែ។
ទី៧ ក្រុមការងារ “អប់រំ” ៖ស្នើសុំឱ្យបើកដំណើរការឡើងវិញ នូវសាលារៀនឯកជនទាំងអស់ រួមទាំងក្លឹបហាត់ប្រាណទៅតាមស្តង់ដារសុវត្ថិភាព របស់ក្រសួងសុខាភិបាលក្នុងខែសីហា ឬខែកញ្ញា។ ទី៨ ក្រុមការងារ “សំណង់ និងអចលនទ្រព្យ” ៖ សមគមអ្នកអភិវឌ្ឍលំនៅដ្ឋានកម្ពុជា ស្នើសុំកុំឱ្យមានការតម្លើងពន្ធដោយធៀបទៅនឹងឆ្នាំ ២០១៩។
អ្នកឧកញ៉ា គិត ម៉េង ប្រធានសភាពណិជ្ជកម្មកម្ពុជា និងជាប្រធានសម្រប់សម្រួលក្រុមការងារទាំង១៣ ផ្នែកឯកជននៃវេទិការាជរដ្ឋាភិបាល-ផ្នែកឯកជន បានប្រាប់ឱ្យវិស័យឯកជនកុំមានការព្រួយបារម្ភទៅលើបញ្ហាEBA និងនាំយកនូវបញ្ហាប្រឈម និងសំណូមពរពាក់ព័ន្ធនឹងគ្រប់វិស័យដែលបានលើកឡើងនេះ ដើម្បីដាក់ជូនថ្នាក់ដឹកនាំ៕
