ដោយៈ ម៉ាណេត
ភ្នំពេញៈ ក្រុមហ៊ុន YCH និង Infrastructure Asia (IA) ដែលទទួលបានបន្ទុកលើគម្រោងសាងសង់ មជ្ឈមណ្ឌលភ័ស្តុភារកម្មភ្នំពេញ (PPLC) ឬមជ្ឈមណ្ឌលផ្ទុកទំនិញនៅកម្ពុជា បានប៉ាន់ប្រមាណថា មជ្ឈមណ្ឌលភ័ស្តុភារភ្នំពេញ នឹងត្រូវចំណាយទុនវិនិយោគប្រមាណ២០០លានដុល្លារអាមេរិក សម្រាប់ការសាងសង់។
នៅពេលបញ្ចប់ការសាងសង់ មជ្ឍមណ្ឌលភ័ស្តុភារកម្មភ្នំពេញនេះ នឹងជួយឱ្យកម្ពុជាកាត់បន្ថយថ្លៃដើមដឹកជញ្ជូន លើកកម្ពស់ប្រសិទ្ធភាពខ្សែសង្វាក់ផ្គត់ផ្គង់ទំនិញ និងការធ្វើសមា ហរណកម្ម ទៅក្នុងខ្សែសង្វាក់ផ្គត់ផ្គង់ក្នុងតំបន់ និងលើកកម្ពស់សមត្ថភាពប្រកួតប្រជែងរបស់កម្ពុជាលើឆាកអន្តរជាតិផងដែរ។
ក្រុមហ៊ុនខាងលើបានឱ្យដឹងនៅថ្ងៃទី២១ ខែមេសា ឆ្នាំ២០២១ថា “គម្រោងសាងសង់មជ្ឈមណ្ឌលភ័ស្តុភារភ្នំពេញ ត្រូវបានប៉ាន់ប្រមាណថា នឹងចំណាយថវិកាប្រមាណ២០០លានដុល្លារអាមេរិក (២៦៥លានដុល្លារសិង្ហបុរី) រួមបញ្ចូលទាំងមជ្ឈមណ្ឌលប្រតិបត្តិការកំពង់ផែ និងភស្តុភារចម្រុះសាលាបណ្តុះបណ្តាល និងមជ្ឈមណ្ឌល start-up” ។
លោក Seth Tan នាយកប្រតិបត្តិក្រុមហ៊ុន Infrastructure Asia បានថ្លែងថា កត្តាជោគជ័យដ៏សំខាន់មួយគឺការចូលរួម របស់រដ្ឋាភិបាលកម្ពុជា ក្នុងការអភិវឌ្ឍកំពង់ផែ ការរៀបចំប្រជុំផ្សេងៗរវាងក្រុមហ៊ុន YCH និងទីភ្នាក់ងាររដ្ឋាភិបាល ដើម្បីស្វែងយល់កាន់តែច្បាស់អំពីព័ត៌មានលម្អិតរបស់គម្រោង។
លោកបានមានប្រសាសន៍ថា “កិច្ចសហការរវាងរដ្ឋាភិបាលកម្ពុជា និងក្រុមហ៊ុនគឺមានភាពទូលំទូលាយណាស់ ហើយវាគឺជាធាតុចូលមួយ ដែលផ្តល់ឱ្យនូវឱកាសជោគជ័យខ្ពស់ និងកាត់បន្ថយការចំណាយផងដែរ” ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់បានថ្លែងថា មជ្ឈមណ្ឌលភ័ស្តុភារកម្មភ្នំពេញនេះ នឹងជួយលើកស្ទួយ វិស័យដឹកជញ្ជូនកម្ពុជាឱ្យកាន់តែមានប្រសិទ្ធភាព មានលក្ខណៈប្រកួតប្រជែង ជាមួយនឹងប្រទេសក្នុងតំបន់អាស៊ាន និងសកលលោកទាំងតម្លៃ និងសេវាកម្ម ជាពិសេសវានឹងក្លាយជាកម្លាំងចលករប្រកបដោយសក្កានុពល ក្នុងការចូលរួមចំណែកដល់ការជំរុញកំណើនសេដ្ឋកិច្ចជាតិឱ្យងើបស្ទុះឡើង សំដៅសម្រេចបាននូវចក្ខុវិស័យលើការអភិវឌ្ឍកម្ពុជា ឱ្យទៅជាប្រទេសចំណូល មធ្យមកម្រិតខ្ពស់នៅឆ្នាំ២០៣០ និងប្រទេសចំណូលខ្ពស់នៅឆ្នាំ២០៥០ ។
លោកបន្ថែមថា គម្រោងមជ្ឈមណ្ឌលភ័ស្តុភារកម្មភ្នំពេញ ជាគម្រោងយុទ្ធសាស្ត្រមួយមានទីតាំងស្ថិតនៅចំកណ្តាលប្រទេស ជាមួយនឹងការគាំទ្រពី បណ្តាញផ្លូវជុំវិញទីក្រុងភ្នំពេញ ដើរតួនាទីជាចំណុចកណ្តាល សម្រាប់បណ្តាញចែកចាយទំនិញនៅក្នុងប្រទេស និងជាចំណុចតភ្ជាប់នៃការដឹកជញ្ជូនឆ្លងកាត់ដែលរួមមាន៖ ផ្លូវថ្នល់ ផ្លូវដែក ផ្លូវទឹក និងផ្លូវអាកាស ស្ថិតក្នុងចម្ងាយ១០គីឡូម៉ែត្រពីទីក្រុង និងអាចបម្រើជាមណ្ឌលដឹកជញ្ជូន និងភ័ស្តុភារកម្ម ក្នុងតំបន់ដោយហេតុថាកម្ពុជា មានទីតាំងភូមិសាស្ត្រឋិតនៅចំកណ្តាលប្រទេសមហាអនុតំបន់ទន្លេមេគង្គ។
រាជរដ្ឋាភិបាលកម្ពុជា បានសម្រេចជ្រើសរើសក្រុមហ៊ុន YCH និង Infrastructure Asia (IA) របស់ប្រទេសសិង្ហបុរី ជាដៃគូឯកជនដើម្បីសិក្សា និងអភិវឌ្ឍសំណើគម្រោងមជ្ឈមណ្ឌលភ័ស្តុភារកម្មភ្នំពេញ (Phnom Penh Logistics Complex – PP-LC) និងបានផ្តល់ភារកិច្ចជូនក្រសួងសាធារណការ និងដឹកជញ្ជូន ក្នុងឋានៈជាប្រធានគណៈកម្មាធិការជាតិភ័ស្តុភារកម្ម ដឹកនាំរៀបចំកិច្ចព្រមព្រៀងក្របខណ្ឌនេះ (Framework Agreement – FA) ជាមួយក្រុមហ៊ុនYCH និងក្រុមហ៊ុន IA ដូច ដែលធ្លាប់បានអនុវត្តកន្លងមកសម្រាប់ គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ និងគម្រោងផ្លូវល្បឿនលឿនភ្នំពេញ-បាវិត៕
