ដោយៈសុខុម
សហរដ្ឋអាមេរិកៈ សង្កាត់ផ្សារភាគហ៊ុនដ៏ល្បីល្បាញ របស់សហរដ្ឋអាមេរិក Wall Street បានហក់ឡើងខ្ពស់មិនធ្លាប់មានកាលពីថ្ងៃពុធ ទី២០ មករា នៅពេលលោក ចូ បៃឌិន បានស្បថចូលកាន់តំណែង ជាប្រធានាធិបតីសហរដ្ឋអាមេរិកទី៤៦។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters។
ភាគហ៊ុនរបស់ក្រុមហ៊ុនអាមេរិកNetflix ដែលជាអ្នកផ្ដល់សេវាកម្ម Streaming Services (សេវាកម្មជាវភាពយន្ត និងកម្មវិធីទូរទស្សន៍ ដែលអ្នកអាចមើលបណ្ដើរ ដោនឡូតបណ្ដើរទុកមើលលើកក្រោយទៀត) ធំបំផុតរបស់ពិភពលោក បានហក់ឡើងខ្ពស់រហូតដល់ទៅ១៦,៨៥% ក្រោយពីក្រុមហ៊ុននេះនិយាយថា ខ្លួននឹងលែងត្រូវការខ្ចីប្រាក់រាប់ពាន់លានដុល្លារ ដើម្បីទប់ការចំណាយលើកម្មវិធីទូរទស្សន៍ និងភាពយន្តរបស់ខ្លួនទៀតហើយ។
ក្រុមហ៊ុនផ្សេងទៀតដែលស្ថិតក្នុងក្រុម FAAMG ឬ GAFAM (ក្រុមហ៊ុនបច្ចេកវិទ្យាយក្សទាំង ៥ របស់អាមេរិក រួមមាន Facebook, Amazon, Apple, Microsoft, Google) ក៏បានហក់ឡើងដែរ ដោយAlphabet Inc ដែលជាក្រុមហ៊ុនមេរបស់ Google បានហក់ឡើង៥,៣៦%។ សន្ទស្សន៍ផ្សារភាគហ៊ុន NYSE FANG+TM Index បានហក់ឡើង ៤,៧៧%។
លោកRoss Mayfield អ្នកវិភាគអំពីយុទ្ធសាស្ត្រវិនិយោគ ប្រចាំនៅធនាគារវិនិយោគពហុជាតិសាសន៍អាមេរិកBaird បានលើកឡើងថា វាជាថ្ងៃដែលក្រុមហ៊ុនបច្ចេកវិទ្យា ទទួលបានលទ្ធផលយ៉ាងល្អ ដែលពិតជាកម្រមានណាស់ក្នុងរយៈពេល ២ ឬ៣ ខែមកនេះ ហើយបណ្ដាក្រុមហ៊ុនដែលស្ថិតក្នុងក្រុម FAAMG និងក្រុមហ៊ុនបច្ចេកវិទ្យាផ្សេងៗទៀត ដែលចុះបញ្ជីក្នុងផ្សារភាគហ៊ុនអាមេរិក S&P 500 អាចនឹងចំណេញកប់ក្ដោងនៅពេលដ៏ខ្លីខាងមុខ បើយោងតាមការព្យាករ។
ក្រុមទីប្រឹក្សានិយាយថា លោក ចូ បៃឌិន នឹងមិនខ្ជះខ្ជាយពេលវេលាឡើយនៅក្នុងការស្ដារប្រទេសឡើងវិញ ក្រោយរដ្ឋការរបស់លោកដូណាល់ ត្រាំ បានបញ្ចប់។
គ្រាន់តែឡើងកាន់តំណែងភ្លាម លោកចូ បៃឌិន បានចុះហត្ថលេខាលើបទបញ្ជានីតិប្រតិបត្តិ (Executive Order) រហូតដល់ទៅ១៥លើបញ្ហានានា ដែលមានចាប់ពីបញ្ហាឆ្លងរាតត្បាតវីរុសកូវីដ-១៩ បញ្ហាសេដ្ឋកិច្ច រហូតដល់បញ្ហាប្រែប្រួលអាកាសធាតុ៕
