ដោយៈ ម៉ាណា
ភ្នំពេញៈ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្មបានអញ្ជើញដឹកនាំកិច្ចប្រជុំពិនិត្យ និងវាយតម្លៃលើវឌ្ឍនភាពការងាររបស់ផ្សារពាណិជ្ជកម្ម តាមប្រព័ន្ធអេឡិចត្រូនិក ខេមបូឌាត្រេដ (CambodiaTrade.com) និងគម្រោងពង្រឹងពាណិជ្ជកម្មអេឡិចត្រូនិកជនបទ (Rural E-commerce Empowerment Project – REEP)។
ផ្សារពាណិជ្ជកម្ម CambodiaTrade.com គឺជាគំនិតផ្ដួចផ្ដើមដ៏សំខាន់របស់ក្រសួងពាណិជ្ជកម្ម ក្នុងគោលបំណងលើកកម្ពស់ផលិតផលក្នុងស្រុក និងផ្ដល់វេទិកាឌីជីថល ប្រកបដោយទំនុកចិត្តសម្រាប់ធុរជនកម្ពុជា។
បន្ថែមពីនេះ ថ្នាលនេះនឹងបង្កើតជាឱកាសសម្រាប់កសិករ -ផលិតករនៅតាមទីជនបទ អាចដាក់លក់ផលិតផលរបស់ពួកគាត់ នៅក្នុងថ្នាលនេះបាន ហើយថ្នាលនេះនឹងជួយជំរុញ ឱ្យពួកគាត់មានការអភិវឌ្ឍទំនិញទាំងនោះ ប្រកបដោយស្ដង់ដា អនាម័យ និងគុណភាពខ្ពស់ ព្រមទាំងផ្ដល់ជាវគ្គបណ្តុះបណ្តាលបន្ថែម ទាក់ទងបច្ចេកទេស និងការវេចខ្ចប់ជាដើម។
ដោយឡែក គម្រោងREEP នឹងដើរតួយ៉ាងសំខាន់ក្នុងការបណ្ដុះបណ្ដាល និងពង្រឹងសមត្ថភាពពាណិជ្ជកម្ម តាមប្រព័ន្ធអេឡិចត្រូនិកដល់អាជីវករនៅតាមតំបន់ជនបទ ដើម្បីធានាថា “គ្មាននរណាម្នាក់ត្រូវបានបោះបង់ចោលក្នុងសេដ្ឋកិច្ចឌីជីថល” ផងដែរ៕
