ដោយៈ និស្ស័យ
ភ្នំពេញៈ របាយការណ៍បានបង្ហាញថា ការធ្វើពាណិជ្ជកម្មទំនិញរវាងប្រទេសកម្ពុជា ជាមួយបណ្តាប្រទេសដៃគូទាំងអស់ នៅតែបង្ហាញកំណើនគួរឱ្យកត់សម្គាល់ ដោយក្នុងរយៈពេល ៤ខែ ដើមឆ្នាំ២០២៦ នេះសម្រេចបាន ក្នុងទឹកប្រាក់ជាង២៣ពាន់លានដុល្លារ។
ទំហំនេះបានបញ្ជាក់ពីការកើនជិត ២០% បើធៀបនឹងរយៈពេលដូចគ្នាកាលពីឆ្នាំ២០២៥។ ទោះយ៉ាងណា អតុល្យភាពនៃជញ្ជីងពាណិជ្ជកម្មអន្តរជាតិកម្ពុជា នៅតែបន្តស្ថិតក្នុងរង្វង់ប្រមាណ១០០០លានលានដុល្លារ។
យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ចេញផ្សាយក្នុងថ្ងៃទី១១ ខែឧសភា បង្ហាញថា ចាប់ពីខែមករា ដល់ខែមេសា ឆ្នាំ២០២៦ ការផ្លាស់ប្តូរទំនិញរវាងកម្ពុជា ជាមួយបណ្តាប្រទេសដៃគូទាំងអស់ មានទឹកប្រាក់សរុប២៣,៣៨ ពាន់លានដុល្លារ កើនឡើង១៩,៩% បើធៀបនឹងរយៈពេលដូចគ្នា ក្នុងឆ្នាំ២០២៥ ដែលមាន ១៩,៥ ពាន់លានដុល្លារ។
ក្នុងចំនួននេះ កម្ពុជានាំទំនិញចេញទៅទីផ្សារអន្តរជាតិ១១,១២ ពាន់លានដុល្លារ កើនឡើង២១,៧% និងនាំចូលវិញ១២,២៦ ពាន់លានដុល្លារ កើន១៨,៣%។ ប្រទេសដៃគូពាណិជ្ជកម្មសំខាន់ៗរបស់កម្ពុជា រួមមាន ចិន អាមេរិក វៀតណាម ជប៉ុន ថៃ សិង្ហបុរី និងម៉ាឡេស៊ី។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បានមានប្រសាសន៍ថា ការកើនឡើងនៃសមត្ថភាពផលិតកម្ម ក្នុងស្រុក និងចំនួនរោងចក្រថ្មីៗ ដែលទើបបើកដំណើរការ បានរុញឱ្យសកម្មភាពនាំចេញ-នាំចូលទំនិញរវាងកម្ពុជាជាមួយប្រទេសនានា ហក់ឡើងជាបន្តបន្ទាប់។ ចំនួននេះនឹងបន្តកើនឡើងថែមទៀតនាពេលខាងមុខ។
លោកបន្តថា សម្រាប់កំណើនទឹកប្រាក់នាំចេញរបស់កម្ពុជា គឺដោយសារកត្តាចម្បងចំនួន២ គឺទី១ ការកើនឡើងនៃសមត្ថភាពផលិតកម្មក្នុងស្រុក ដែលបានពីកំណើនរោងចក្រ/សហគ្រាស និងកំណើនទិន្នផលក្នុងវិស័យកសិកម្ម និងទី២ កម្ពុជាមានទីផ្សារនាំចេញធំៗ ដែលទទួលបានពីការផ្តល់ប្រព័ន្ធអនុគ្រោះពន្ធគយ នាំទំនិញទៅប្រទេសមួយចំនួន ព្រមទាំងការចូលជាធរមាន នៃកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី ដែលកម្ពុជាបានចុះហត្ថលេខាជាមួយប្រទេសជាច្រើនលើពិភពលោក។
លោកថ្លែងថា “ខ្ញុំមានជំនឿថា ទឹកប្រាក់នៃការនាំចេញទំនិញកម្ពុជានឹងបន្តកើនឡើងទៀតក្នុងឆ្នាំនេះ ព្រោះបច្ចុប្បន្នកម្ពុជាមានផលិតផលជាច្រើនមុខសម្រាប់នាំចេញ ខណៈកេរ្តិ៍ឈ្មោះ គុណភាព និងតម្លៃទំនិញកម្ពុជាក៏មានលក្ខណៈប្រកួតប្រជែងខ្លាំងផងដែរ”៕
