ដោយៈ ម៉ាណា
ភ្នំពេញៈ ទំហំពាណិជ្ជកម្មកម្ពុជា ជាមួយប្រទេសជាសមាជិកនៃព្រមព្រៀងភាព ជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP) ក្នុងរយៈពេល៨ខែឆ្នាំ២០២៥ មានទឹកប្រាក់ជាង៦,៦ពាន់លានដុល្លារ កើតឡើងជិត១០% បើធៀបនឹងរយៈពេលដូចគ្នាក្នុងឆ្នាំ២០២៤។ នេះបើយោងតាមក្រសួងពាណិជ្ជកម្ម។
RCEP គឺជាកិច្ចព្រមព្រៀងពាណិជ្ជកម្ម រវាងប្រទេសសមាជិកអាស៊ានទាំង១០ រួមជាមួយនឹងប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលហ្សេឡង់។ កិច្ចព្រមព្រៀងនេះ ត្រូវបានបង្កើតឡើងនៅក្នុងឆ្នាំ ២០១២។ គោលបំណងនៃកិច្ចព្រមព្រៀងនេះ ធ្វើឡើងដើម្បីបន្ទាបអត្រាពន្ធគយ បើកឱ្យមានការធ្វើពាណិជ្ជកម្មលើផ្នែកសេវាកម្ម និងលើកកម្ពស់ការវិនិយោគ ដើម្បីជួយដល់បណ្ដាប្រទេសកំពុងអភិវឌ្ឍន៍ឱ្យតាមទាន់ប្រទេសដទៃទៀតនៅលើពិភពលោក។
កិច្ចព្រមព្រៀងនេះ រួមបញ្ចូលប្រជាពលរដ្ឋប្រហែល២,២ ពាន់លាននាក់ ដោយប្រទេសជាសមាជិក នៃកិច្ចព្រមព្រៀងនេះមានផលិតផលក្នុងស្រុកសរុបGDP ស្មើប្រហែលជិត៣០% នៃGDP សរុបនៅលើពិភពលោក។
RCEP បានចូលជាធរមាននៅកម្ពុជាចាប់ពីថ្ងៃទី ១ ខែមករា ឆ្នាំ ២០២២។
ទិន្នន័យបានបង្ហាញថា ចន្លោះពីខែមករា-សីហា ឆ្នាំ២០២៤ កម្ពុជាបាននាំចេញទំនិញ ទៅបណ្តាប្រទេសសមាជិក RCEP ក្នុងទឹកប្រាក់សរុប ៦,៦៣ ពាន់លានដុល្លារ កើនឡើង៩,៥%បើធៀបនឹងរយៈពេលដូចគ្នាកាលពីឆ្នាំ២០២៤។
ប្រទេសសមាជិកRCEP ដែលទទួលទិញទំនិញពីកម្ពុជាច្រើនជាងគេ គឺវៀតណាម ចិន ជប៉ុន ថៃ និងកូរ៉េខាងត្បូង។
ទន្ទឹមនឹងការនាំចេញនេះ កម្ពុជាក៏បាននាំចូលទំនិញពីក្រុមប្រទេសសមាជិកRCEP ក្នុងទឹកប្រាក់ប្រមាណ១៩,៧២ លានដុល្លារផងដែរ ដោយកើនឡើងជិត១៧% ដែលភាគច្រើននាំមកពីប្រទេសចិន វៀតណាម ថៃ សិង្ហបុរី និងប្រទេសឥណ្ឌូនេស៊ី។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ធ្លាប់បានប្រាប់ភ្នំពេញប៉ុស្តិ៍ថា កិច្ចព្រមព្រៀងRCEP កំពុងចូលរួមចំណែកយ៉ាងច្រើន ក្នុងការជំរុញសកម្មភាព ពាណិជ្ជកម្មអន្តរជាតិរបស់កម្ពុជា តាម រយៈការបង្កើនសមត្ថភាពនាំចេញ-នាំចូលទំនិញរវាងប្រទេសសមាជិកទាំង ១៥។
លោកបានបន្តថា អត្ថប្រយោជន៍ដែលកម្ពុជា ទទួលបានពីកិច្ចព្រមព្រៀងនេះ រួមមានការអនុគ្រោះពន្ធលើទំនិញផ្សេងៗ ការផ្ទេរបច្ចេកវិទ្យា ការអភិវឌ្ឍជំនាញ និងឱកាសការងារដែលជំរុញដោយការវិនិយោគផ្ទាល់ពីបរទេស(FDI)។
លោកបានបញ្ជាក់ថា “អត្ថប្រយោជន៍ ដែលRCEP បានផ្ដល់មកកម្ពុជា គឺមានទំហំធំធេងណាស់ សម្រាប់ការនាំចេញរបស់កម្ពុជា ក៏ដូចជា ការបង្កើនពាណិជ្ជកម្មពិភពលោក ដែលជាការរួមចំណែកមួយ សម្រាប់ការនាំចេញ និងនាំចូល នៃបណ្ដាប្រទេស RCEP”៕
 ក្នុងរយៈពេល៨ខែឆ្នាំ២០២៥ មានទឹកប្រាក់ជាង៦,៦ពាន់លានដុល្លារ កើតឡើងជិត១០% បើធៀបនឹងរយៈពេលដូចគ្នាក្នុងឆ្នាំ២០២៤។ នេះបើយោងតាមក្រសួងពាណិជ្ជកម្ម។){kind=link}