ដោយៈ គង់ សូរិយា
ពោធិ៍សាត់ៈ សម្ដេចធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជាបានលើកឡើងថា ក្រុមហ៊ុន FORD របស់សហរដ្ឋអាមេរិកហ៊ានដាក់ទុនវិនិយោគរាប់លាននៅក្នុងប្រទេសកម្ពុជា ព្រោះគេយល់ថា កម្ពុជា មានស្ថិរភាព សន្តិភាព ដែលអំណោយផលទៅដល់ការវិនិយោគ។
ថ្លែងនៅក្នុងពិធីសម្ពោធដាក់ឱ្យដំណើរការ ខ្សែសង្វាក់ផលិតកម្មថ្មី និងរោងចក្រដំឡើងគ្រឿងបង្គុំរថយន្ត FORD នាព្រឹកថ្ងៃទី២២ ខែមេសា ឆ្នាំ២០២៥ សម្តេចធិបតី ហ៊ុន ម៉ាណែត បានលើកឡើងថា ទន្ទឹមនឹងការទាក់ទាញអ្នកថ្មី ឱ្យចូលមកវិនិយោគនៅក្នុងប្រទេសកម្ពុជា គោលដៅសំខាន់ និងជាអាទិភាពគឺការថែរក្សាអ្នកចាស់ ដែលនៅមានវត្តមានវិនិយោគ វិនិយោគដែលមាននៅក្នុងប្រទេសកម្ពុជា បន្តរីកចម្រើន។
សម្តេចបានបញ្ជាក់ថា “ប្រសិនបើអ្នកវិនិយោគទាំងនោះ រកស៊ីនៅស្រុកខ្មែរខាត កុំទៅហៅគេមកទៀត ព្រោះគ្មានអ្នកណាគេហ៊ានមកវិនិយោគទៀតនោះទេ”។ សម្តេចបន្តថា “ប្រសិនបើវិនិយោគិនបរទេសទាំងនោះ រកស៊ីនៅស្រុកខ្មែរមានស្ថិរភាព ដោយសារកម្ពុជាទាក់ទាញ ដោយសារគោលនយោបាយលើកទឹកចិត្ត សេរីផ្តល់ច្រើន ភាពនិងនរ និងសន្តិភាព ស្ថិរភាព ធានាបាននូវស្ថិរភាពរយៈពេលវែង ទើប មានការទុកចិត្ត និងមានការវិនិយោគពង្រីកបន្ថែមនូវផលិតផលរបស់ពួកគេ ព្រោះគ្មានអ្នកណាចង់ដាក់រោងចក្រ ប្រសិនបើតទៅមុខទៀតត្រូវដួលរលំដោយសារការសង្គ្រាមនោះទេ”។
សម្តេចធិបតី បានអះអាងថា គ្មានអ្នកណាចង់បណ្ដាក់ទុនវិនិយោគ នៅក្នុងប្រទេសដែលអសន្តិសុខនោះទេ ប៉ុន្តែប្រសិនបើមកបណ្ដាក់ទុន នៅក្នុងប្រទេសមួយដែលស្ថិរភាព មានភាពនឹងនរ គឺគេវិនិយោគហើយ។
ដូចពេលនេះ ក្រុមហ៊ុន FORD ហ៊ានដាក់ទុនវិនិយោគរាប់លានដុល្លារនៅកម្ពុជា ផលិតខ្សែសង្វាក់ផលិតកម្មមួយ ដែលធានារហូតដល់១ម៉ឺនគ្រឿង មិនមែនធ្វើដើម្បីមួយឆ្នាំ តែធ្វើដើម្បីអនាគត ដូច្នេះក្រុមហ៊ុនFORD ហ៊ានដាក់ទុកវិនិយោគ ភ្ជាប់អនាគតក្រុមហ៊ុន ជាមួយអនាគតកម្ពុជា ដោយសារពួកគេគិតថា កម្ពុជាអាចធានាស្ថិរភាព សន្តិសុខ សន្តិភាព រយៈពេលវែង អំណោយផលដល់ការវិនិយោគ ដែលនេះ ជាមោទនភាពមួយរបស់ពលរដ្ឋកម្ពុជា។
ស្របពេលជាមួយគ្នានេះ សម្ដេចធិបតី ថ្លែងថា កាលណាប្រទេសជាតិមួយគ្មានស្ថិរភាព គ្មានសន្តិភាព ផ្ទុះសង្គ្រាម ក្រុមហ៊ុនដែលកំពុងវិនិយោគ និងវេចបង្វេចទៅស្រុកវិញ ឈប់វិនិយោគ។
រោងចក្រដំឡើងគ្រឿងបង្គុំរថយន្ត FORD ដែលបានសម្ពោធនាព្រឹកថ្ងៃនេះ មានសមត្ថភាពផលិតរថយន្តលើសពី១ ម៉ឺនគ្រឿងក្នុងមួយឆ្នាំ។ ក្នុងនោះ ក្រុមហ៊ុនបានពង្រីកការវិនិយោគ នូវទំហំទឹកប្រាក់ពី ២១លានដុល្លារអាមេរិក ទៅ២៦,៨ លានដុល្លារ និងបានពង្រីកផ្ទៃដីសាងសង់រោងចក្រពី៥ ហិកតា ដល់១២ហិកតា៕
