ដោយៈគង់ ម៉ាលីនណា
ភ្នំពេញៈ យោងតាមរបាយការណ៍ថ្មីបំផុតពីធនាគារអភិវឌ្ឍន៍អាស៊ី (ADB) បានឲ្យដឹងថា ប្រាក់ចំណូលឌីជីថលនៅកម្ពុជាមានចំនួនសរុប៤៧០លានដុល្លារ បើគិតតាមវិស័យ ពាណិជ្ជកម្មអេឡិចត្រូនិកមានចំនួន២៧,៦ភាគរយ សេវាកម្មអេឡិចត្រូនិកមាន៧,៨ ភាគរយជាដើម។
របាយការណ៍សមាហរណកម្មសេដ្ឋកិច្ចអាស៊ីឆ្នាំ ២០២១ របស់ ADB អំពី “ការធ្វើឱ្យដំណើរការវេទិកាឌីជីថលសម្រាប់អាស៊ី”បានបង្ហាញថា កាលពីឆ្នាំ២០១៩កម្ពុជាទទួលបានចំណូល៤៧០លានដុល្លារពីវិស័យនេះ ខណៈបច្ចេកវិទ្យាឌីជីថលកាន់តែផ្សារភ្ជាប់នឹងជីវិតកាន់តែសកម្ម ជាក់ស្តែការទូទាត់ប្រាក់តាមប្រព័ន្ឋឌីជីថល បានកើនឡើងនៅកម្ពុជា ក្នុងអំឡុងវិបត្តិកូវីដ១៩នេះ។
លោកYasuyuki Sawada ប្រធានសេដ្ឋវិទូជាន់ខ្ពស់របស់ADB បានឱ្យដឹងក្នុងអំឡុងពេលសិក្ខាសាលារបស់ ADB និងក្រសួងសេដ្ឋកិច្ច និងហិរញ្ញវត្ថុស្ដីពី “វេទិកាឌីជីថល និងការស្ទុះងើបឡើងវិញនៃសេដ្ឋកិច្ចក្រោយកូវីដ ១៩ របស់ប្រទេសកម្ពុជា” កាលពីថ្ងៃទី ២៨ ឧសភា តាមប្រព័ន្ធវីដេអូថា អំណាចកុំព្យូទ័រដែលកើនឡើង និងលទ្ធភាពទទួលបានឧបករណ៍វៃឆ្លាតតម្លៃសមរម្យ បាននាំយកបចេ្ចកវិទ្យាឌីជីថល ទៅក្នុងដៃរបស់ប្រជាជនកាន់តែច្រើនឡើងៗ។
លោកថ្លែងថា “កំណើនការប្រើប្រាស់កម្មវិធីឌីជីថលទាំងនេះ ត្រូវបានរំពឹងថា នឹងបន្តនៅឆ្នាំនេះ និងក្នុងរយៈពេលច្រើនឆ្នាំទៅខាងមុខ””។
ដោយពឹងផ្អែកលើការសិក្សាពេលថ្មីៗ ប្រសិនបើវិស័យនានាកើនឡើង២០ភាគរយធៀបនឹងមូលដ្ឋានគ្រឹះឆ្នាំ ២០២០ ទៅដល់ឆ្នាំ២០២៥ ទិន្នផលពិភពលោកនឹងកើនឡើង៤,៣ ពាន់ពាន់លានដុល្លារប្រចាំឆ្នាំ ទិន្នផលរបស់អាស៊ី១,៧ ពាន់ពាន់លានដុល្លារប្រចាំឆ្នាំ៕
