តើអ៊ីនធឺណិតល្បឿនលឿន 6G នឹងរួចរាល់ពេលណា ហើយលឿនជាងបច្ចេកវិទ្យា 5G ខ្លាំងកម្រិតណា?

ដោយ៖ សុខុម

អន្តរជាតិ: ល្បឿនបញ្ជូនទិន្នន័យនៃបច្ចេកវិទ្យាអ៊ីនធឺណិតជំនាន់ទី៦ ដែលគេស្គាល់ថា 6G នឹងលឿនជាងបច្ចេកវិទ្យា 5G រហូតដល់១០ទៅ១០០ដងស្ទើរមិនគួរឱ្យជឿ។ នេះបើយោងតាមក្រុមហ៊ុនតៃវ៉ាន់ MediaTek Inc បានលើកឡើងតាមកាសែតមួយដែលបានចេញផ្សាយកាលពីថ្ងៃទី១៨ មករា។

ក្រុមហ៊ុន MediaTek ដែលជាក្រុមហ៊ុនផលិតបន្ទះឈីបឈានមុខគេក្នុងពិភពលោកបានបញ្ជាក់ថា តាមការរំពឹងទុក ការធ្វើស្តង់ដារនីយកម្មបច្ចេកវិទ្យា 6G នឹងចាប់ផ្ដើមនៅឆ្នាំ២០២៤ ឬ ២០២៥ ហើយបច្ចេកវិទ្យានេះអាចនឹងត្រូវដាក់ឱ្យដំណើរការជាផ្លូវការលើកដំបូងនៅឆ្នាំ២០២៧ ឬ ២០២៨។

លោក Fan Ming-xi អគ្គនាយករងនៃនាយកដ្ឋានឌីហ្សាញប្រព័ន្ធទំនាក់ទំនងនៃក្រុមហ៊ុន MediaTek លើកឡើងថា វិស័យនេះកំពុងតែមានវឌ្ឍនភាពគួរឱ្យកត់សម្គាល់នៅក្នុងការសិក្សាស្រាវជ្រាវ និងអភិវឌ្ឍន៍ (R&D) នៃបច្ចេកវិទ្យា 6G ដ៏មានសារៈសំខាន់។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

លោកបញ្ជាក់ថា ក្រុមហ៊ុន MediaTek កំពុងបង្កើនសមត្ថភាពសិក្សាស្រាវជ្រាវ និងអភិវឌ្ឍន៍បច្ចេកវិទ្យា 6G ហើយកំពុងធ្វើការជាមួយក្រុមអ្នកសិក្សាស្រាវជ្រាវជាន់ខ្ពស់ផ្នែកសិក្សាធិការ និងឧស្សាហកម្មដើម្បីស្វែងរកនិន្នាការបច្ចេកវិទ្យាច្នៃប្រឌិត។

ក្រុមហ៊ុន MediaTek និយាយថា ការធ្វើស្តង់ដារនីយកម្ម និងការដាក់ឱ្យដំណើរការច្ចេកវិទ្យា 6G នឹងគោរពតាមពេលវេលា ដែលបានកំណត់ក្នុងចក្ខុវិស័យវិស័យទូរគមនាគមន៍ទូរស័ព្ទចល័តអន្តរជាតិសម្រាប់ឆ្នាំ២០៣០ និងហួសពីនេះ។

ក្រុមហ៊ុននេះរំពឹងថា កិច្ចប្រឹងប្រែងធ្វើស្តង់ដារនីយកម្មដំបូងនឹងចាប់ផ្ដើមនៅឆ្នាំ២០២៣ ឬ ២០២៤ ហើយថា ខ្លួននឹងបន្តអភិវឌ្ឍបច្ចេកវិទ្យា5G ដើម្បីជួយជំរុញការធ្វើស្តង់ដារនីយកម្ម និងការដាក់ឱ្យដំណើរការជាផ្លូវការនូវប្រព័ន្ធ 6G សម្រាប់គោលបំណងពាណិជ្ជកម្ម៕

LEAVE A REPLY

Please enter your comment!
Please enter your name here