ដោយៈសុខុម
ប៉េកាំង: ធនាគារកណ្តាលរបស់មហាយក្សចិន បានចេញសាចរណ៍ណែនាំឱ្យស្ថាប័នផ្ដល់ឥណទាន ឬប្រាក់កម្ចីនានារឹតបន្តឹងការផ្ដល់ប្រាក់កម្ចី ស្របពេលការកើនឡើងនូវឥណទាន ដែលបានជួយទ្រទ្រង់ដល់ការងើបឡើងវិញ នៃសេដ្ឋកិច្ចរបស់ប្រទេសនេះ បានបង្កការព្រួយបារម្ភជាថ្មី អំពីពពុះអចលនទ្រព្យ និងស្ថិរភាពហិរញ្ញវត្ថុ។ នេះបើយោងតាមសារព័ត៌មាន Financial Times ចុះផ្សាយកាលពីថ្ងៃ៤ មេសា។
យោងតាមប្រភពទម្លាយឱ្យដឹងថា ឥណទានថ្មីៗបានកើនឡើង១៦% ក្នុងរយៈពេល២ខែដើមឆ្នាំ២០២១នេះ។ ជាការឆ្លើយតបទៅនឹងកំណើននេះ ធនាគារប្រជាជនចិន (People’s Bank of China) ដែលជាធនាគារកណ្ដាលរបស់ប្រទេសចិន បានចេញសារាចរណ៍មួយកាលពីខែកុម្ភៈ ណែនាំឱ្យបណ្ដាស្ថាប័នផ្តល់ឥណទានក្នុងស្រុក និងបរទេសដែលធ្វើប្រតិបត្តិការ នៅក្នុងប្រទេសនេះ ជួយរក្សាឥណទានថ្មីៗក្នុងត្រីមាសទី១ ដើមឆ្នាំនេះ ឱ្យនៅកម្រិតប្រហាក់ប្រហែល នឹងរយៈពេលដូចគ្នាកាលពីឆ្នាំមុន ប្រសិនបើមិនអាចកាត់បន្ថយធ្វើឱ្យទាបជាងនេះទេនោះ។
ចំណាត់ការនេះ អាចនឹងធ្វើឱ្យធ្លាក់ចុះខ្លាំងនូវឥណទានធនាគារ ដែលជាប្រភពហិរញ្ញប្បទានដ៏ធំបំផុតសម្រាប់ប្រទេសចិន ដែលជាសេដ្ឋកិច្ចធំបំផុតទី២ របស់ពិភពលោក។
ចំណាត់ការឆ្លុះបញ្ចាំង ពីការផ្លាស់ប្តូរគោលនយោបាយ នៅពេលរដ្ឋាភិបាលក្រុងប៉េកាំង បានងាកទៅគ្រប់គ្រងហានិភ័យឥណទាន ជាជាងជំរុញកំណើនសេដ្ឋកិច្ច ដែលបានវិលត្រឡប់ទៅរកកម្រិត មុនពេលផ្ទុះវិបត្តិឆ្លងរាតត្បាតវីរុសកូវីដ-១៩ រួចទៅហើយ។
ផលិតផលក្នុងស្រុកសរុប (GDP) របស់ប្រទេសចិនទទួលបានកំណើន៦.៥% នៅក្នុងត្រីមាសចុងក្រោយនៃឆ្នាំ២០២០ ដោយធ្វើឱ្យមហាយក្សចិន ស្ថិតក្នុងចំណោមប្រទេសមួយចំនួនប៉ុណ្ណោះ ដែលទទួលបានកំណើនសេដ្ឋកិច្ចពេញមួយឆ្នាំ។ រដ្ឋាភិបាលក្រុងប៉េកាំង ក៏បានកំណត់គោលដៅ កំណើនសេដ្ឋកិច្ចយ៉ាងតិច ៦% សម្រាប់ឆ្នាំ២០២១ ។
លោក Larry Hu ប្រធានក្រុមអ្នកជំនាញសេដ្ឋកិច្ច ប្រចាំក្រុមហ៊ុនហិរញ្ញវត្ថុ Macquarie Group នៅទីក្រុងហុងកុងបានលើកឡើងថា “ការព្រួយបារម្ភអំពីវិបត្តិសេដ្ឋកិច្ច ដែលបង្កឡើងដោយសារការឆ្លងរាតត្បាតវីរុសកូវីដ-១៩ បានបញ្ចប់ទៅហើយ។ អាទិភាពចម្បងនៅពេលនេះ គឺត្រូវកាត់បន្ថយបន្ទុកបំណុលរបស់សេដ្ឋកិច្ច” ។
កំណើនប្រាក់កម្ចីនៅដើមឆ្នាំ២០២១ បានកើតមានឡើងក្រោយការងើបឡើងខ្លាំងក្នុងវិស័យអចលនទ្រព្យ និងការវិនិយោគរបស់ចិន នៅពេលកញ្ចប់ថវិកាស្ដារសេដ្ឋកិច្ចពីវិបត្តិកូវីដ-១៩ របស់រដ្ឋាភិបាលក្រុងប៉េកាំង បានធ្វើឱ្យទីផ្សារលំនៅដ្ឋានស្ទុះងើបឡើង។
ការលក់ផ្ទះថ្មីនៅប្រទេសចិន បានកើនឡើង១៣៣% ក្នុងខែមករា និងខែកុម្ភៈ ឆ្នាំ២០២១ នេះ ខណៈការវិនិយោគលើអចលនទ្រព្យបានកើនឡើង៣៨% ។ តម្រូវការនោះបានជួយជំរុញកំណើនឥណទាន អចលនទ្រព្យឱ្យកើនឡើង១៤% ដែលជាកម្រិតខ្ពស់ក្នុងរយៈពេល៧ឆ្នាំ។
ប៉ុន្តែនៅពេលតម្លៃផ្ទះបានហក់ឡើងខ្ពស់ នៅតាមតំបន់មាត់ឆ្នេរសមុទ្ររបស់ប្រទេសចិន រដ្ឋាភិបាលក្រុងប៉េកាំង បានដាក់ចេញវិធានការណជាច្រើន ដើម្បីគ្រប់គ្រងវិស័យលំនៅដ្ឋាន ហើយបានបង្ក្រាបលើការប្រើប្រាស់ ដោយមិនត្រឹមត្រូវនូវឥណទានអាជីវកម្មដើម្បីទិញអចលនទ្រព្យ។
កត្តានេះ បានធ្វើឱ្យហិរញ្ញប្បទានអចលនទ្រព្យទទួលរងសម្ពាធ ហើយបានធ្វើឱ្យបណ្ដាស្ថាប័នផ្ដល់ឥណទាននានារងផលប៉ះពាល់យ៉ាងខ្លាំង៕