ដោយៈ សាវុធ
ភ្នំពេញៈ ជាទូទៅ ថ្លៃភាគហ៊ុនប្រែប្រួលជារៀងរាល់ថ្ងៃ។ ការប្រែប្រួលនេះអាចពន្យល់បានយ៉ាងសាមញ្ញថា ដោយសារកំលាំងនៃផ្គត់ផ្គង់និងតម្រូវការនៅលើទីផ្សារ។ បានសេចក្តីថា ប្រសិនបើមានការផ្គត់ផ្គង់(ការលក់) ច្រើនជាងតម្រូវការ(ការទិញ) នោះថ្លៃមានទំនោរធ្លាក់ចុះ។
ហើយផ្ទុយមកវិញ ប្រសិនបើមានអ្នកត្រូវការ(អ្នកទិញ) ច្រើនជាងអ្នកផ្គត់ផ្គង់(អ្នកលក់) នោះថ្លៃនឹងមានទំនោរកើនឡើងវិញ។
ជាធម្មតា អ្នកលក់និងអ្នកទិញមានទស្សនៈផ្ទុយគ្នា។ នៅពេលមនុស្សម្នាក់ទិញភាគហ៊ុនមួយ បានន័យថាគាត់សង្ឃឹមនិងជឿជាក់ថា ភាគហ៊ុននោះនឹងផ្តល់ប្រាក់ចំណេញឱ្យគាត់នាពេលអនាគតច្រើនជាងបច្ចុប្បន្ន។
ផ្ទុយមកវិញ នៅពេលមនុស្សម្នាក់លក់ភាគហ៊ុនមួយចេញ បានន័យថាគាត់មិនសង្ឃឹមថា នៅពេលអនាគតភាគហ៊ុននោះនឹងផ្តល់ប្រាក់ចំណេញឱ្យគាត់ច្រើនជាងពេលបច្ចុប្បន្នឡើយ។ ដូច្នេះហើយ បានជាពេលខ្លះ គេនិយាយថា ផ្សារហ៊ុនជាវេទិកាតស៊ូមតិអំពីតម្លៃរបស់ក្រុមហ៊ុនចុះបញ្ជី និងថ្លៃហ៊ុនរបស់វា។
ការព្យាយាមស្វែងយល់ពីមូលហេតុនៅពីក្រោយនេះទៀត ពិតជាមានការពិបាក។ មនុស្សម្នាក់ៗមានទស្សនៈវិនិច្ឆ័យនិងការយល់ឃើញរបស់ខ្លួនរៀងៗខ្លួន ទៅលើការទិញឬលក់ភាគហ៊ុននីមួយ។ យើងអាចចែកកត្តាដែលធ្វើមនុស្សសម្រេចចិត្តទិញឬលក់ភាគហ៊ុនជាពីរធំៗគឺកត្តាវិទ្យាសាស្ត្រ និងកត្តាចិត្តសាស្ត្រ៕