ដោយៈ ម៉ាណេត
ភ្នំពេញៈ អគ្គនាយកដ្ឋានពន្ធដារ នៅថ្ងៃទី៣០ ខែមីនា ឆ្នាំ២០២១ បានចេញផ្សាយសៀវភៅណែនាំស្តីពី “ពន្ធលើដីធ្លីមិនបានប្រើប្រាស់” ដើម្បីផ្សព្វផ្សាយចំណេះដឹងជូនសាធារណជន និងអ្នកជាប់ពន្ធឱ្យបានយល់ដឹង កាន់តែទូលំទូលាយអំពីទិដ្ឋភាពច្បាប់បទ ប្បញ្ញត្តិនានា និងនីតិវិធីនៃការបង់ពន្ធ។
សៀវភៅណែនាំស្តីពី “ពន្ធលើដីធ្លីមិនបានប្រើប្រាស់”ត្រូវបានរៀបរៀងឡើងដោយនាយកដ្ឋានពន្ធចលនទ្រព្យ និងអចលនទ្រព្យ នៃអគ្គនាយកដ្ឋានពន្ធដារ អនុលោមតាមមាត្រា៩៦ នៃច្បាប់ស្តីពីសារពើពន្ធឆ្នាំ១៩៩៧ និងស្របតាមការអនុវត្តយុទ្ធសាស្ត្រកៀរគរចំណូល ២០១៩-២០២៣របស់រាជរដ្ឋភិបាលកម្ពុជា និងផែនការយុទ្ធសាស្ត្រ ២០១៩-២០២៣ របស់អគ្គនាយកដ្ឋានពន្ធដារ ក្នុងគោលបំណងផ្សព្វផ្សាយចំណេះដឹងជូនសាធារណជន និងអ្នកជាប់ពន្ធឱ្យបានយល់ដឹង កាន់តែទូលំទូលាយអំពីទិដ្ឋភាពច្បាប់ បទប្បញ្ញត្តិនានា និងនីតិវិធីនៃការបង់ពន្ធ។
សៀវភៅណែនាំស្តីពី “ពន្ធលើដីធ្លីមិនបានប្រើប្រាស់” ក៏នឹងក្លាយជាផ្នែកជំនួយស្មារតីបន្ថែម ក្នុងការបញ្ជា្របវប្បធម៌បង់ពន្ធ និងបំពេញកាតព្វកិច្ចបង់ពន្ធលើដីធ្លីមិនបានប្រើប្រាស់ឱ្យបានត្រឹមត្រូវ ច្បាស់លាស់ និងគ្រប់ជ្រុងជ្រោយ។
មាតិកានៃសៀវភៅនេះ ត្រូវបានជ្រើសរើស និងសម្រិតសម្រាំងជាពិសេស ដើម្បីបកស្រាយនូវចម្ងល់នានាពាក់ព័ន្ធ នឹងពន្ធនេះ ដោយត្រូវបានបែងចែកជា៥ ផ្នែកសំខាន់ៗដូចជា៖ ផ្នែកទី១ បង្ហាញអំពីទិដ្ឋភាពច្បាប់ និងបទប្បញ្ញត្តិនានា ដោយដកស្រង់នូវពាក្យគន្លឹះ និងខ្លឹមសារសំខាន់ៗមកធ្វើការពន្យល់បន្ថែម ឱ្យកាន់តែងាយយល់។
ផ្នែកទី២ ផ្តោតទៅលើអត្រាពន្ធមូលដ្ឋានកំណត់ពន្ធ និងការគណនាប្រាក់ពន្ធ។ ផ្នែកទី ៣ បង្ហាញអំពីកាតព្វកិច្ចអ្នកជាប់ពន្ធ និងនីតិវិធីសារពើពន្ធ នៃការដាក់ពាក្យស្នើសុំបង់ ពន្ធលើដីធ្លីមិនបានប្រើប្រាស់។
ដោយឡែក ទោសទណ្ឌ និងសិទ្ធិក្នុងការតវ៉ារបស់អ្នកជាប់ពន្ធ ត្រូវបានរំលេចនៅផ្នែកទី៤ ហើយផ្នែកបញ្ចប់ បានបង្ហាញអំពីសេវាអ្នកជាប់ពន្ធ ដែលអគ្គនាយកដ្ឋានពន្ធដារបាននិងកំពុងខិតខំប្រឹងប្រែងដោះស្រាយបញ្ហានានាជូនអ្នកជាប់ពន្ធ និងព័ត៌មានបន្ថែមសម្រាប់អ្នកជាប់ពន្ធ ធ្វើការទំនាក់ទំនងក្នុងករណីមានចម្ងល់បន្ថែម៕
