ដោយៈសុខុម
សិង្ហបុរី: ក្រុមហ៊ុនអចលនទ្រព្យ Swire Properties របស់ក្រុងហុងកុង បានចុះកិច្ចព្រមព្រៀង លក់ខុនដូប្រណីតទាំង២០យូនីតក្នុងអគារខុនដូ Eden ដែលសាងសង់រួចរាល់ជាស្ថាពររបស់ខ្លួនស្ថិតនៅឧទ្យាន 2 Draycott Park ប្រទេសសង្ហបុរី ក្នុងតម្លៃរហូតដល់ទៅប្រមាណរហូតដល់ ៣០០លានដុល្លារ។ នេះបើយោងតាមសារព័ត៌មាន The Business Times ចុះផ្សាយកាលពីថ្ងៃទី២៥ មីនា។
ទោះជាយ៉ាងណា គ្មានការបញ្ជាក់លម្អិតអំពី កិច្ចព្រមព្រៀងទិញលក់នេះទេ ប៉ុន្តែប្រភពមួយគ្រាន់តែទម្លាយឱ្យដឹងថា អ្នកទិញមកពីអាស៊ីខាងជើង (North Asia)។
យោងតាមប្រភពដដែលឱ្យដឹងទៀតថា កិច្ចព្រមព្រៀងទិញលក់នេះ ត្រូវបានធ្វើឡើងតាមរយៈស្ត្រីជាភ្នាក់ងារអចលនទ្រព្យ (អ្នកគួកជេ) ម្នាក់ឈ្មោះ Sandra Yiap មកពីក្រុមហ៊ុន HUTTONS ASIA PTE LTD ក្នុងប្រទេសសិង្ហបុរី រួមជាមួយនឹងក្រុមហ៊ុនភ្នាក់ងារអចលនទ្រព្យ Savills។
ទោះជាយ៉ាងណា នៅពេលសារព័ត៌មាន The Business Times ទាក់ទងដើម្បីសុំការបញ្ជាក់អំពីកិច្ចព្រមព្រៀងទិញលក់នេះ ក្រុមហ៊ុន HUTTONS ASIA PTE LTD បានបដិសេធមិនធ្វើអត្ថាធិប្បាយនោះទេ។
តម្លៃសរុបនេះមានន័យថា លក់បានថ្លៃខ្ពស់កប់ពពក រហូតដល់ប្រមាណ ៤.៩០០ដុល្លារក្នុងមួយហ្វីតការ៉េ ឬប្រមាណ ៥០.០០០ ដុល្លារក្នុងមួយម៉ែត្រការ៉េ។ គម្រោងខុនដូនេះមានកម្ពស់២២ជាន់ និងក្នុងមួយជាន់គឺមានតែមួយយូនីតប៉ុណ្ណោះ រាប់ចាប់ពីជាន់ទី៣ ដល់ជាន់ទី២២ ។ យូនីតនីមួយៗមានបន្ទប់គេងចំនួន៤ ជាមួយនឹងផ្ទៃសរុប ៣.០៣៥ ហ្វីតការ៉េ ឬ ២៨២ ម៉ែត្រការ៉េ។
អគារខុនដូ ដែលផ្ដល់កម្មសិទ្ធិកាន់កាប់ គ្មានរយៈពេលកាលកំណត់នេះ ត្រូវបានសាងសង់បញ្ចប់ជាស្ថាពរក្នុងឆ្នាំ២០១៩ ។ គម្រោងអគារនេះ រួមមានអាងហែលទឹកសម្រាប់មនុស្សពេញវ័យមួយ អាងហែលទឹកសម្រាប់កុមារមួយ សួនច្បារមួយ និងសួនច្បារជាន់ដំបូល (sky garden) មួយ៕