ដោយៈ សាវុធ
ភ្នំពេញៈ សហគ្រិនខ្មែរជាច្រើន ប្រាកដជាធ្លាប់ឆ្លងកាត់ និងជួបប្រទះការលំបាកក្នុងការវិនិយោគប្រាក់ឲ្យមានប្រសិទ្ធភាព និងមានផ្លែផ្កា ស្របគ្នានេះដែរការថ្លឹងថ្លែងហិរញ្ញវត្ថុផ្ទាល់ខ្លួន និងការរក្សាស្ថេរភាពជំនួញរបស់ខ្លួនដោយឯករាជ្យ ប្រាកដជាមានការលំបាកច្រើន។
ច្បាប់ទាំងបីក្នុងការរៀបចំហិរញ្ញវត្ថុផ្ទាល់ខ្លួន ឲ្យមានប្រសិទ្ធភាពសម្រាប់សហគ្រិនជំនាន់ថ្មី៖
ទី១) ផ្ដល់ប្រាក់ខែឲខ្លួនឯង
ជាការពិតណាស់ ទោះបីអ្នកជាម្ចាស់ក្រុមហ៊ុន ឬថៅកែសហគ្រាសណាមួយក៏ដោយ ក៏អ្នកចាំបាច់ត្រូវខ្វល់ខ្វាយពីសុខទុក្ខ និងសុវត្ថិភាពហិរញ្ញវត្ថុផ្ទាល់ខ្លួនរបស់អ្នក ដែរ។ នៅពេលដែលអ្នកក្រុមហ៊ុនរបស់អ្នកមានលំនឹង និងរកបានចំណូលសម្រាប់ទប់ទល់ការចាយវាយនានា និងប្រាក់ខែបុគ្គលិក អ្នកគួរពិចារណាដកទុកមួយចំណែកសម្រាប់ជាប្រាក់បៀវត្សន៍ប្រចាំខែផ្ទាល់ខ្លួន និងប្រាក់សន្សំសម្រាប់ពេលចូលនិវត្តន៍។
ទី២) បែងចែកឲដាច់នូវប្រាក់ផ្ទាល់ខ្លួននិងប្រាក់សម្រាប់វិនិយោគ
ជាទូទៅ សហគ្រិនខ្មែររមែងបែងចែកមិនដាច់ រវាងប្រាក់ផ្ទាល់ខ្លួន និងសម្រាប់ជំនួញ។ ពេលខ្លះពួកគាត់យកប្រាក់ផ្ទាល់ខ្លួន ទៅវិនិយោគក្នុងមុខជំនួញ ស្របគ្នានេះដែរពេលខ្លះពួកគេយកប្រាក់សម្រាប់ជំនួញ មកបំពេញតម្រូវការចាយវាយផ្ទាល់ខ្លួន។ ការធ្វើបែបនេះគឺខុស ហើយថែមទាំងអាចប៉ះពាល់អនាគតរបស់អាជីវកម្មផងដែរ។
ជាការល្អពួកគាត់គួរ បង្កើតគណនីពីរផ្សេងគ្នា មួយសម្រាប់អាជីវកម្ម និងមួយទៀតសម្រាប់ការចាយវាយផ្ទាល់ខ្លួន។
ទី៣) ការយកឈ្នះបំណុល
ពេលខ្លះបន្ទាប់ពីបញ្ចប់មហាវិទ្យាល័យ យុវជនមួយចំនួនអាចនឹងមិនទាន់ដកខ្លួនរួចពីបំណុល ឬប្រាក់កម្ចីសម្រាប់ថ្នាក់ឧត្តមសិក្សារបស់ពួកគេ។ ហេតុដូចនេះហើយ ទើបយុវជនមួយចំនួន មានភាពស្ទាក់ស្ទើរក្នុងការបណ្ដាក់ទុន ឬចាប់ផ្ដើមមុខជំនួញ។ យ៉ាងណាមិញ នេះមិនមែនជាបញ្ហាធំណាស់ណានោះទេ ដរាបណាអ្នកមានឆន្ទៈ គម្រោងផែនការ ការសន្សំ និងបញ្ជីថវិការឲ្យច្បាស់លាស់នោះ មុខជំនួញរបស់អ្នកនឹងមានការរីកចម្រើន ស្របពេលនេះអ្នកក៏អាចយកប្រាក់នោះទៅរំលោះបំណុលចាស់៕
