ដោយៈ សាវុធ
ភ្នំពេញៈ ប្រជាជនខ្មែររាប់លាននាក់ បានយកលុយទៅផ្ញើរឬបង្កើតគណនីសន្សំនៅធនាគារដែលខ្លួនទុកចិត្ត។ ចំណុចទាំង៣យ៉ាងសំខាន់ដែលអ្នកគួរដឹង មុនសម្រេចចិត្តយកលុយទៅដាក់ធនាគារមានដូចជា៖
ទី១) ទីតាំងធនាគារ
ជាការពិតណាស់បន្ទាប់ ពីសម្រេចចិត្តយកលុយទៅដាក់ នៅធនាគារណាមួយហើយ អ្នកក៏ពុំគួរមើលរំលងទីតាំងធនាគារនោះផងដែរ។ ជួនកាលធនាគារអាចផ្ដល់ការប្រាក់ខ្ពស់ ក៏ប៉ុន្ដែទីតាំងឆ្ងាយពីលំនៅស្ថានអ្នក ពុំមានសាខាច្រើន ហើយទូរដកប្រាក់ក៏មានកំណត់ ដែលប៉ះពាល់ដល់ពេលវេលារបស់អ្នកក្នុងការធ្វើដំណើរ ដាក់ប្រាក់ឬដកប្រាក់ជាដើម។
ទី២) ប្រាក់កម្ចី
ការសម្រេចចិត្ត ក្នុងការទុកដាក់លុយនៅធនាគារ ដែលមានសុវត្ថិភាពជាការល្អ តែយ៉ាងណាមិញ អ្នកកុំភ្លេចគិតគូរពីគម្រោងនាពេលអនាគតផងដែរ។ ឧទាហរណ៌ថា អ្នកចង់បើកមុខរបររកស៊ីហើយគ្មានដើមទុន នោះអ្នកប្រាកដជានឹកឃើញ ដល់ធនាគារមុនគេហើយ។ ពេលខ្លះធនាគារ ដែលអ្នកផ្ញើរប្រាក់អាចគិតការខ្ពស់ ដែលអ្នកមិនអាចទ្រាំទ្របាន អាស្រ័យហេតុនេះហើយ អ្នកត្រូវគិតគូរឲ្យបានវែងឆ្ងាយមុនសម្រេចចិត្ត ព្រមទាំងគិតពីប្រយោជន៍នាពេលអនាគតផង។
ពិនិត្យតាមដានឲ្យបានទៀងទាត់
មិនថាមនុស្សឬម៉ាស៊ីនទេ តែងមានកំហុសជានិច្ច ដូចគ្នាទៅនឹងធនាគារដែរ ពេលខ្លះវាអាចមានកំហុស ដោយអចេតនាមួយកើតឡើង ចំពោះហិរញ្ញវត្ថុរបស់អ្នក។ ដូចនេះមានតែការតាមដាន ឲ្យបានទៀងទាត់ទេជាការល្អ។ លើសពីនេះទៅទៀត មុននឹងសម្រេចចិត្ត អ្នកគួរតែអានឯកសារគោលការណ៍ និងពត៌មានរបស់ធនាគារឲ្យបានច្បាស់លាស់សិន ជៀសវាងការភ័ន្ដច្រឡំដោយប្រការណាមួយ៕
