ដោយៈលក្ខិណា
ភ្នំពេញៈ ផ្នត់គំនិតរបស់ប្រជាជនកម្ពុជាមួយចំនួនធំ ពេលដែលខ្លួនបានខ្ចីលុយពីធនាគារឬពីមីក្រូហិរញ្ញវត្ថុ ហាក់មានភាពលាក់លៀម មិនចង់ឱ្យអ្នកណាដឹងនោះទេ ដោយគិតថាខ្មាសគេ ខ្លាចគេថាអន់ បើទោះបីជាខ្លួនយកលុយនោះ មកពង្រីកអាជីវកម្ម មកធ្វើឱ្យប្រាក់ចំណូលកើនឡើងក្ដី។
ប៉ុន្តែសម័យនេះ ការខ្ចីលុយពីធនាគារឬមីក្រូហិរញ្ញវត្ថុ គេត្រូវបានចាត់ទុកថាជាមនុស្សឆ្លាតវៃចេះប្រើលុយដើម្បីរកលុយ។
យ៉ាងណាក៏ដោយ មុននឹងសម្រេចខ្ចីលុយពីធនាគារ ឬក៏មីក្រូហិរញ្ញវត្ថុក៏ត្រូវមានការគិតពិចារណាលើចំណុចមួយចំនួនផងដែរ។
១ ប្រើប្រាស់បំណុលនោះ ជាបំណុលល្អ
ការខ្ចីលុយយកទៅអភិវឌ្ឍមុខជំនួញ ដែលអាចធ្វើឱ្យអាជីវកម្មកាន់តែរីកចម្រើន ឬ ការទិញផ្ទះ ឬដី ដែលអាចដាក់ជួលឬ ទុកលក់យកចំណេញ សុទ្ធជាការវិនិយោគយកលុយបង្កើតលុយ ហើយអាចចាត់ទុកវាជាបំណុលល្អ។
ប៉ុន្តែបើកម្ចីនោះត្រូវបានប្រើប្រាស់ ទៅលើចំណាយមិនចាំបាច់ ដូចជា ទិញសម្ភារប្រើប្រាស់ដែល មិនបានបង្កើតចំណូល ឬផលចំណេញណាមួយ ក្នុងរយៈពេលវែងឬខ្លីក៏ដោយ អ្នកគួរពិចារណាឱ្យបានម៉ត់ចត់ជាមុន ជាពិសេសគឺលើលទ្ធភាពសងបំណុល ដើម្បីចៀសវាងកម្ចីនោះក្លាយជាកម្ចីអាក្រក់ ដែលអាចប៉ះពាល់ដល់ស្ថានភាពហិរញ្ញវត្ថុរបស់អ្នកនៅថ្ងៃក្រោយ។
២. ជៀសវាងខ្ចីលុយលលើសពី៤០% នៃប្រាក់ចំណូលរបស់ខ្លួន
បើយោងតាមក្រុមអ្នកជំនាញសេដ្ឋកិច្ច ហិរញ្ញវត្ថុបានឱ្យដឹងថា ការខ្ចីលុយពីធនាគារគឺ ចាំបាច់ត្រូវសិក្សាពីប្រាក់ចំណូលខ្លួនឯង ឱ្យច្បាស់ជាមុនសិន។ អ្នកពុំគួរខ្ចីលើសពី៤០ ឬ៥០% នៃប្រាក់ចំណួលប្រចាំខែដែលរកបានទេ។ បើមិនដូច្នោះ វាអាចនឹងបង្កឲ្យមានហានិភ័យខ្ពស់។ រីឯខាងធនាគារ ក៏មើលលើសមត្ថភាពរបស់យើងផងដែរថាយើងអាចមានលទ្ធភាព ក្នុងការសងបំណុលបានឬអត់។
ដូចនេះទោះយ៉ាងណា ការខ្ចីលុយពីធនាគារ ក៏មានសុវត្ថិភាពជាងការខ្ចីលុយពីអ្នកចងការប្រាក់ក្រៅប្រព័ន្ធដែរ។
លោកង៉ែត ជូ ទីប្រឹក្សាជាន់ខ្ពស់នៃក្រុមហ៊ុន EMC បានឱ្យដឹងថា “ការមិនមានជំពាក់បំណុល គឺជាឥរិយាបទហិរញ្ញវត្ថុមិនសមហេតុផល។ បំណុលល្អ គឺជាគន្លឹះឈានទៅរកការកសាងទ្រព្យសម្បត្តិ” ៕
