ដោយៈ សាវុធ
ហុងកុងៈ ប្រភពជាក់លាក់មួយបានឱ្យដឹងថា ក្រុមហ៊ុនផលិតរថយន្តអគ្គិសនីចិន (EV) ដែលចុះបញ្ជីនៅសហរដ្ឋអាមេរិក រួមមានក្រុមហ៊ុន Li Auto Inc ក្រុមហ៊ុន Nio Inc និងក្រុមហ៊ុន Xpeng Inc គ្រោងនឹងចុះបញ្ជីនៅហុងកុងនៅឆ្នាំនេះ ដើម្បីទាក់ទាញអ្នកវិនិយោគនៅប្រទេសខ្លួនផ្ទាល់។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៩ ខែមីនា ឆ្នាំ២០២១ ។
ក្រុមហ៊ុនទាំងបីនេះ មានគោលបំណងលក់ហ៊ុន យ៉ាងហោចណាស់៥ភាគរយ នៃមូលធនភាគហ៊ុនសរុប នៅក្នុងមជ្ឈមណ្ឌលហិរញ្ញវត្ថុអាស៊ីមួយនេះ។ ផ្អែកលើមូលធននីយកម្ម ទីផ្សារញូវយ៉ករបស់ក្រុមហ៊ុនទាំងបី កាលពីថ្ងៃចន្ទ ការប្រមូលមូលនិធិពីផ្សារហ៊ុននៅហុងកុងអាចឈានដល់៥ពាន់លានដុល្លារអាមេរិក។
ប្រភពមួយដែលបានបដិសេធ មិនបញ្ចេញឈ្មោះបាននិយាយថា ក្រុមហ៊ុនបាននិងកំពុងធ្វើការ ជាមួយអ្នកប្រឹក្សាយោបល់អំពីការលក់ភាគហ៊ុន ដែលអាចចាប់ផ្តើមនៅពាក់កណ្តាលឆ្នាំនេះ។
ក្រុមហ៊ុន Li Auto ក្រុមហ៊ុន Nio និងក្រុមហ៊ុន Xpeng ដែលប្រមូលប្រាក់បានចំនួន១៤,៧ពាន់លានដុល្លារ នៅក្នុងផ្សារហ៊ុនសហរដ្ឋអាមេរិក ចាប់តាំងពីឆ្នាំ២០១៨ ។ ភាគហ៊ុន ដែលបានចុះបញ្ជីនៅអាមេរិក របស់ក្រុមហ៊ុនផលិតរថយន្តទាំងបី បានកើនឡើងចន្លោះពី៣,៧ភាគរយ ទៅ៥,៣ភាគរយនៅក្នុងការលក់ភាគហ៊ុនដំបូង។
ផែនការនេះធ្វើឡើង នៅពេលដែលក្រុមហ៊ុនទាំងបីបង្កើនដើមទុន ដើម្បីផ្តល់មូលនិធិដល់ការអភិវឌ្ឍបច្ចេកវិទ្យា និងពង្រីកបណ្តាញលក់ ដើម្បីប្រកួតប្រជែងនៅក្នុងទីផ្សាររថយន្តអគ្គិសនីធំបំផុតរបស់ពិភពលោក ដែលក្រុមហ៊ុន Tesla Inc របស់សហរដ្ឋអាមេរិកកំពុងជំរុញការលក់យានយន្តផលិតនៅប្រទេសចិន។
ឆ្នាំនេះត្រូវបានគេមើលឃើញថា មានសារៈខ្លាំងសំខាន់ណាស់ សម្រាប់ក្រុមហ៊ុនផលិតរថយន្តអគ្គិសនី ដើម្បីដណ្តើមចំណែកទីផ្សារ ខណៈឧស្សាហកម្មនេះរំពឹងថា ការលក់រថយន្តថាមពលថ្មីរបស់ចិន នឹងកើនឡើងជិត ៤០ភាគរយ ដែលកាលពីឆ្នាំមុនមានត្រឹមតែ ១,៨លានគ្រឿង។
លោក Shi Ji អ្នកវិភាគរបស់ក្រុមហ៊ុន Haitong International បាននិយាយថា “ទោះបីមានធនធានហិរញ្ញវត្ថុច្រើននាពេលបច្ចុប្បន្ន បើប្រៀបធៀបទៅនឹងឆ្នាំមុនក៏ដោយ ក្រុមហ៊ុនផលិតរថយន្តអគ្គិសនី នៅតែត្រូវការវិនិយោគយ៉ាងច្រើនសម្បើម លើបច្ចេកវិទ្យាជំនាន់ថ្មី។ ការស្វែងរកបញ្ជីផ្សារហ៊ុននៅទីផ្សាររបស់ខ្លួនគឺរឿងមួយដ៏ល្អ” ៕
