ដោយៈ រ៉ាណេត
កែបៈ រដ្ឋបាលខេត្តកែប បាននិងបង្កើនសោភ័ណឆ្នេរកម្សាន្តមួយទៀត ដែលជាសមិទ្ធផលទេសចរណ៍ថ្មីនៅក្នុងខេត្ត សម្រាប់រង់ចាំក្រុមអ្នកទេសចរណ៍ កំពុងមានការចាប់អារម្មណ៍យ៉ាងខ្លាំង បន្ទាប់ពីក្រុមការងារបានបំផុស ដល់ប្រជាពលរដ្ឋនៅតំបន់នោះ ឱ្យយកចិត្តទុកដាក់លើផ្នែកបរិស្ថាន ការធ្វើអនាម័យជាប្រចាំ ជាពិសេសកំពុងត្រូវបានរៀបចំ ជាតំបន់ឆ្នេរទេសចរណ៍ដ៏ទាក់ទាញប្រចាំខេត្តកែប។
អភិបាលខេត្តកែប លោកសោម ពិសិដ្ឋ បានមានប្រសាសន៍កាលពីថ្ងៃដើមសប្ដាហ៍នេះថា ខេត្តបានរៀបចំឆ្នេរអង្កោល ដែលជាកន្លែងកម្សាន្តចាស់ ប៉ុន្តែមិនសូវមានទេសចរចាប់អារម្មណ៍នោះ ឱ្យក្លាយទៅជាគោលដៅទេសចរណ៍មួយ ប្រកបដោយទេសភាពទាក់ទាញបំផុត ដែលគេមិនអាចមើលរំលង ហើយសង្ឃឹមថាក្រោយពេលធ្វើការអភិវឌ្ឍន៍បានរួចរាល់ ភ្ញៀវច្បាស់ជាសម្រុកទៅលំហែកម្សា ន្តនៅទីនោះច្រើនជាក់ជាមិនខាន ព្រោះផ្លូវទៅកាន់រមណីយដ្ឋានឆ្នេរអង្កោលនេះ អ្នកទេសចរអាចធ្វើដំណើរតាមផ្លូវមួយខ្សែ ចេញពីឆ្នេរកែប ប្រ៉បតាមឆ្នេរសមុទ្រប្រវែងប្រមាណ១០គីឡូម៉ែត្រតែប៉ុណ្ណោះ។
លោកអភិបាលបានបញ្ជាក់ថា “ដោយមើលឃើញពីសក្តានុពលខេត្តកែប បច្ចុប្បន្នរដ្ឋបាលខេត្តបានព្យាយាមអភិវឌ្ឍន៍ និងកែលម្អតំបន់ទេសចរណ៍នានាឱ្យកាន់តែល្អ និងទាក់ទាញ ធ្វើយ៉ាងណាអាចជួយជំរុញភ្ញៀវជាតិ និងអន្តរជាតិមកកម្សាន្តនៅខេត្តកែប មានចំនួនជាង៤ម៉ឺននាក់ក្នុង១ថ្ងៃ” ។
ជាមួយនឹងការកើនឡើងនូវចំនួនភ្ញៀវនេះ រដ្ឋបាលខេត្តបានស្នើដល់ប្រជាពលរដ្ឋក្នុងតំបន់ ដែលអាស្រ័យផលពីតំបន់កម្សាន្តមួយនេះ ត្រូវយកចិត្តទុកដាក់ ដើម្បីរក្សាអនាម័យជូនភ្ញៀវទេសចរឱ្យមានការពេញចិត្តពេញថ្លើម” ។
លោកសោម ពិសិដ្ឋបានបន្តថា នៅក្នុងកំឡុងពេលមានការគំរាមកំហែង ពីជំងឺនៅពេលនេះ ចំពោះអាជីវករទាំងអស់ ត្រូវមានទឹកអាល់កុល សាប៊ូ សម្រាប់ភ្ញៀវលាងសម្អាតដៃ និងត្រូវរៀបចំធុងសំរាមឱ្យបានល្អ និងមានរបៀបរៀបរយ។ ដោយឡែកចំពោះភ្ញៀវទេសចរ គួរតែមានម៉ាស់ អាល់កុលឬជែលតាមខ្លួន ដើម្បីការពារជំងឺឆ្លងកូវីដ១៩ ។
លោកបន្ថែមថា “តំបន់ឆ្នេរកំសាន្តខេត្តកែប បានរៀបចំយ៉ាងស្អាត ប្រកបដោយអនាម័យ មានសុវត្តិភាព ដោយអនុវត្តន៍តាមប្រសាសន៍សម្តេចតេជោ និងតាមការណែនាំរបស់ក្រសួងសុខាភិបាលអំពីការពារជំងឺកូវីដ១៩” ។
បច្ចុប្បន្ន រដ្ឋបាលខេត្តកែបបាន និងកំពុងជំរុញ ផែនការទីផ្សារទេសចរណ៍ខេត្តកែប ២០២០-២០២៤ ដើម្បីរួមចំណែកប្រែក្លាយខេត្តកែបឱ្យទៅជា “គោលដៅទេសចរណ៍លម្ហែរកាយកម្រិតខ្ពស់”ដ៏ទាក់ទាញមួយនៅកម្ពុជា ។
ផែនការទីផ្សារទេសចរណ៍ខេត្តកែបនេះ នឹងដើរតួជាផែនទីបង្ហាញផ្លូវ សម្រាប់ការធ្វើទីផ្សារទេសចរណ៍ ក្នុងរយៈពេល៥ឆ្នាំខាងមុខ ប្រកបដោយទស្សនៈវែងឆ្ងាយ ដើម្បីចង្អុលបង្ហាញ និងរួមចំណែកក្នុងកិច្ចខិតខំប្រឹងប្រែង ដើម្បីទាក់ទាញ “ទីផ្សារទេសចរណ៍មានគុណភាព” តាមរយៈការទាក់ទាញ ចំណែកទីផ្សារសក្តានុពលដូចជា “ទេសចរលំដាប់ខ្ពស់” “ទេសចរវ័យចំណាស់ ចូលនិវត្តន៍” និង “ ទេសចរធ្វើដំណើរជាមួយគ្រួសារ” ។
រដ្ឋាភិបាលតាមរយៈក្រសួងទេសចរណ៍បាន និងកំពុងរៀបចំផែនការមេអភិវឌ្ឍន៍ទេសចរណ៍ខេត្តកែប ដើម្បីក្លាយជាគោលដៅទេសចរណ៍ធម្មជាតិ ស្ងប់ស្ងាត់ ប្រណីតកម្រិតខ្ពស់ ប្រកបដោយភាពទាក់ទាញ និងភាពប្រកួតប្រជែងនៅក្នុងតំបន់ និងពិភពលោក៕
