ដោយៈសុខុម
តូក្យូ: ភាគហ៊ុនអាស៊ីបានហក់ឡើងខ្ពស់ កាលពីថ្ងៃអង្គារ ទី១៦ កុម្ភៈ ដោយធ្វើឱ្យទីផ្សារភាគហ៊ុនពិភពលោក ហក់ឡើង១២ វគ្គជាប់គ្នា ខណៈភាពសុទិដ្ឋិនិយម ចំពោះការងើបឡើងវិញនៃសេដ្ឋកិច្ចពិភពលោក និងការរំពឹងទុកចំពោះអត្រាការប្រាក់ទាប បានជួយជំរុញការវិនិយោគលើទ្រព្យសកម្មដែលមានហានិភ័យខ្ពស់។
យោងតាមទីភ្នាក់ងារព័ត៌មាន Reuters ចុះផ្សាយក្នុងថ្ងៃដដែលឱ្យដឹងថា តម្លៃប្រេងបានកើនឡើងដល់កម្រិតខ្ពស់មិនធ្លាប់មាន ក្នុងរយៈពេល១៣ខែ នៅពេលអាកាសធាតុត្រជាក់ខ្លាំងដែលបង្កឡើង ដោយសារព្យុះព្រិលនៅសហរដ្ឋអាមេរិក មិនត្រឹមតែធ្វើឱ្យតម្រូវការថាមពលកើនឡើងប៉ុណ្ណោះទេ ថែមទាំងគំរាមកំហែងដល់ផលិតកម្មប្រេង នៅរដ្ឋតិចសាស់ទៀតផង។
សន្ទស្សន៍ផ្សារភាគហ៊ុនធំបំផុត របស់អាស៊ីប៉ាស៊ីហ្វិកឈ្មោះ MSCI ក្រៅប្រទេសជប៉ុន បានហក់ឡើង០,៤៥% ខណៈផ្សារភាគហ៊ុនជប៉ុន Nikkei បានហក់ឡើង០,៤% ដល់កម្រិតខ្ពស់មិនធ្លាប់មានក្នុងរយៈពេល៣០ឆ្នាំ។
នៅក្រុងហុងកុង ឯណោះវិញសន្ទស្សន៍ផ្សារភាគហ៊ុន Hang Seng Index បានហក់ឡើង១,៧៩% ដល់កម្រិតខ្ពស់មិនធ្លាប់មាន ក្នុងរយៈពេល៣២ខែនៅក្នុងវគ្គជួញូដូរដំបូងរបស់ខ្លួនចាប់តាំងពីថ្ងៃព្រហស្បតិ៍ ទី១១ កុម្ភៈមក។
ទីផ្សារភាគហ៊ុនបស់ចិនដីគោក នឹងនៅតែបិទនៅឡើយរហូត ដល់ថ្ងៃព្រហស្បតិ៍ ទី១៨ កុម្ភៈ។ ចំណែកឯទីផ្សារភាគហ៊ុនរបស់សហរដ្ឋអាមេរិក Wall Street ក៏ត្រូវបានបិទដែរកាលពីថ្ងៃច័ន្ទ ដើមសប្ដាហ៍នេះ។
ទន្ទឹមនេះ ផ្សារភាគហ៊ុនអាមេរិក S&P500 ក៏បានហក់ឡើង០,៦៥% ដល់កម្រិតខ្ពស់មិនធ្លាប់មានដែរ។
យើងដឹងហើយថា ពេលនេះប្រធានាធិបតីសហរដ្ឋអាមេរិក លោកចូ បៃឌិន កំពុងតែជំរុញផែនការទម្លាក់កញ្ចប់ថវិកា ស្ដារសេដ្ឋកិច្ចឡើងវិញចំនួន១,៩ទ្រីលានដុល្លាររបស់លោកឱ្យចេញ ហើយនេះក៏ជាហេតុផលមួយទៀត ដែលធ្វើឱ្យមានសុទិដ្ឋិនិយមចំពោះទីផ្សារផងដែរ៕
