ដោយៈលក្ខិណា
ភ្នំពេញៈ វិនិយោគិនមួយក្រុម បានបង្ហាញពីឆន្ទៈ ក្នុងការវិនិយោគលំនៅឋានប្រណីតនៅក្នុងប្រទេសកម្ពុជា ជាពិសេសនៅតំបន់ដែលពោរពេញ ដោយសក្ដានុពលលំនៅឋានបែបស៊ីវិល័យ នៅក្នុងរាជធានីភ្នំពេញ ដោយពួកគេបានរួមសហការក្នុងការសាងសង់នូវគម្រោងវីឡាដ៏ទំនើប នៅប៉ែកខាងកើតរាជធានីភ្នំពេញ។
យោងតាមសេចក្តីប្រកាសរួម រវាងក្រុមហ៊ុនវិនិយោគទុនមកពីប្រទេសចិនពីរ ដែលគ្រោងនឹងអភិវឌ្ឍន៍ផ្ទះវីឡាទំនើប នៅតាមដងទន្លេមេគង្គប៉ែកខាងកើត រាជធានីភ្នំពេញ បានឱ្យដឹងថា គម្រោងរបស់ពួគកេ គឺជាគម្រោងអិវឌ្ឍន៍សួនវីឡាទំនើប ជំរុញការរស់នៅបែបទំនើបរបស់ប្រជាជនកម្ពុជា ក៏ដូចជា ប្រជាជនដទៃទៀត ដែលកំពុងរស់នៅនិងប្រកបការងារនៅក្នុងប្រទេសកម្ពុជា ។
គម្រោងដែលមានឈ្មោះថា Morgan Park Villa នៅជ្រោយចង្វារ នឹងកាន់តែធ្វើឱ្យតំបន់នេះ មានភាពទាក់ទាញ និងទទួលបានការវិនិយោគបន្ថែមទៀត ពីវិនិយោគិននិងក្រៅប្រទេស ខណៈបច្ចុប្បន្នក៏មានគម្រោងធំៗមួយចំនួន កំពុងមានការអភិវឌ្ឍជាបន្តបន្ទាប់ផងដែរ ។
គម្រោងការនេះ ត្រូវបានលេចឡើងក្នុងពេលដែលវិបត្តិកូវីដ១៩ មិនទាន់ត្រូវបានបញ្ចប់ទាំងស្រុងនៅឡើយ និងក្នុងពេលរាជរដ្ឋាភិបាលកម្ពុជា កំពុងធ្វើយុទ្ធនាការចាក់វ៉ាក់សាំងដល់ពលរដ្ឋកម្ពុជាស្មគ្រចិត្ត ។
បើតាមអ្នកជំនាញនៃវិស័យអចលនទ្រព្យបានលើកឡើងកន្លងមកថា នៅពេលកម្ពុជាមានវ៉ាក់សាំងចាក់ជូនពលរដ្ឋ ពេលនោះវិនិយោគិនក្នុង និងក្រៅប្រទេសនឹងចាប់ផ្ដើមចូលមកបណ្ដាក់ទុនវិនិយោគជាបណ្ដើរៗឡើងវិញ តែនៅជំហានដំបូងគ្រាន់តែគម្រោងតូចៗហើយនឹងដើរតាមដោយគម្រោងធំៗបន្តបន្ទាប់។
លោក សំ សុខនឿន ប្រធានសមាគមអចលនទ្រព្យសកល បានមានប្រសាសន៍ថា បើសិនជាកម្ពុជាមានវ៉ាក់សាំង ហើយវ៉ាក់សាំងនោះ មានប្រសិទ្ធភាព និងអាចទប់ស្កាត់ការចម្លងនៃជំងឺកូវីដ១៩បាននោះ កម្ពុជានឹងទទួលបានការវិនិយោគ នឹងធ្វើឲ្យមានកំនើននៃវិស័យអចលនទ្រព្យ ដែលស្ថានភាពនឹងអាចល្អប្រសើរជាង កាលពី២០១៩ទៅទៀត ផងដែរ៕
