ដោយៈលក្ខិណា
ភ្នំពេញៈ ទោះបីឆ្នាំ២០២០កន្លងទៅនេះ សេដ្ឋកិច្ចកម្ពុជាជួបវិបត្តិដោយសារតែការរាតត្បាតនៃជំងឺកូវីដ១៩ក្ដី តែវិស័យធនាគារនៅតែមានដំណើរការល្អ និងទទួលបានប្រាក់ចំណេញដដែល។
ជាក់ស្ដែងធនាគារអេស៊ីលីដារកបានប្រាក់ចំណេញ ប្រមាណ១៤១លានដុល្លារអាមេរិក ទោះបីវិស័យផ្សេងៗជួបវិបត្តិយ៉ាងណាក្ដី ។ នេះបើតាមរបាយការណ៍របស់ធនាគារអេស៊ីលីដាចេញផ្សាយកាលពីពេលថ្មីៗនេះ។
យោងតាមរបាយការណ៍ដដែលបានបង្ហាញថា ប្រាក់ចំណេញ១៤១លានដុល្លារអាមេរិក គឺជាប្រាក់ចំណេញក្រោយបង់ពន្ធរួច ហើយបើធៀបនឹងឆ្នាំ២០១៩មានកំនើនប្រមាណ១៧ភាគរយ ខណៈកំណើនអាជីវកម្ម ត្រូវបានប្រធានធនាគារនេះប្រកាសថាចំនេញប្រមាណ១៥ភាគរយ ។
លោកបណ្ឌិតអ៊ិន ចាន់នីប្រធាននាយកប្រតិបត្តិធនាគារអេស៊ីលីដា បានមានប្រសាសន៍ថា ការទទួលបានប្រាក់ចំណេញនិងកំណើនអាជីវកម្ម របស់ធនាគារអេស៊ីលីដា ក៏ដូចជាធនាគារដទៃទៀត ដោយសារតែការអនុគ្រោះរបស់ធនាគារជាតិ ក៏ដូចជា រាជរដ្ឋាភិបាលក្នុងអំឡុងពេលវិបត្តិកូវីដ១៩ ។
លោកថា “ក្នុងអំឡុងពេលមានវិបត្តិកូវីដ១៩ រដ្ឋាភិបាលបានជួយយើងច្រើន ដូចជាការណែនាំឱ្យរៀបចំឥណទានឡើងវិញ ការអនុគ្រោះផ្សេងៗមួយចំនួនទៀតផងដែរ” ។
លោកបណ្ឌិតបន្តថា ក្នុងឆ្នាំ២០២០កន្លងទៅ បណ្ដាធនាគារទាំងអស់បានហែលឆ្លងនូវឧបសគ្គជាច្រើន រហូតបានសម្រេចលទ្ធផលបានប្រសើរ ហើយឆ្នាំ២០២១នេះ ធនាគារទាំងអស់ក៏រំពឹងថា អ្វីៗនឹងប្រសើរឡើងវិញដូចក្នុងឆ្នាំ២០១៩ ជាមួយនឹងការរំពឹងពីការបញ្ចប់នៃវិបត្តិកូវីដ១៩ ដោយសារតែការរកឃើញនៃវ៉ាក់សាំងប្រឆាំងនឹងកូវីដ១៩ ៕