ដោយៈ សាវុធ
ភ្នំពេញៈ សហព័ន្ធនៃអង្គការទីផ្សារមូលធនថៃ (Fetco) បានរាយការណ៍ថា សន្ទស្សន៍ នៃទំនុកចិត្តរបស់វិនិយោគិនថៃ បានកើនឡើង១,៥ភាគរយ នៅក្នុងខែមករា ឆ្នាំ២០២១ ដែលការកើនឡើងកក្នុងរយៈពីរខែជាប់គ្នា គិតចាប់តាំងពីខែធ្នូ ឆ្នាំមុន។ នេះបើយោងតាមការចេញផ្សាយពីThe Nation នៅថ្ងៃទី៤ ខែកុម្ភៈ ឆ្នាំ២០២១ ។
លោក Paiboon Nalinthrangkurn ប្រធានសហព័ន្ធ Fetco បានថ្លែងថា សន្ទស្សន៍នេះ បានកើនឡើងដល់១៣២.៥៥ពិន្ទុ ដោយផ្អែកលើរំហូរចូល នៃមូលនិធិបរទេស ការទទួលបានវ៉ាក់សាំងកូវីដ១៩ និងការប្រតិបត្តិការ របស់ក្រុមហ៊ុន ដែលបានចុះបញ្ជីនៅក្នុងផ្សារហ៊ុនថៃ (SET) ។
ទន្ទឹមនឹងនេះ កត្តាធ្លាក់ចុះ ដែលបណ្តាលឱ្យមានភាពមិនប្រាកដប្រជា សម្រាប់វិនិយោគិន អាចមកពីការផ្ទុះឡើងជំងឺកូវីដ១៩ ។ កាលថ្មីៗនេះ ការព្រួយបារម្ភអំពីសេដ្ឋកិច្ចរបស់តំបន់ប្រើប្រាស់អឺរ៉ូ និងការធ្លាក់ចុះសេដ្ឋកិច្ចរបស់ប្រទេសថៃ។
លោកបន្ថែមថា បច្ចុប្បន្ននេះ វិនិយោគិនបានងាក ទៅរកការវិនិយោគលើវិស័យថាមពល គីមីឥន្ធនៈ និងពាណិជ្ជកម្មជាដើម។ ពួកគេបានបង្ហាញចំណាប់អារម្មណ៍តិចតួចលើវិស័យទេសចរណ៍ និងភាគហ៊ុនរបស់ក្រុមហ៊ុនដែក ក៏ដូចជាមូលនិធិអចលនទ្រព្យ និងការវិនិយោគលើអចលនទ្រព្យ។
លោក Paiboon ព្យាករថា ទីផ្សារភាគហ៊ុនថៃ នឹងកើនដល់១.៦០០ពិន្ទុនៅឆ្នាំនេះ ពីការហូរចូលនៃមូលនិធិបរទេស ដែលបានជំរុញដោយការងើបឡើងវិញ នៃសេដ្ឋកិច្ចនៅឆមាសទី២ ប្រាក់ចំណេញរបស់ក្រុមហ៊ុនដែលបានចុះបញ្ជីនៅក្នុង SET និងការទទួលបានវ៉ាក់សាំងកូវីដ១៩ ។
លោកបន្ថែមថា ទន្ទឹមនឹងនេះ ការធ្វើរដ្ឋប្រហារនៅមីយ៉ាន់ម៉ា នឹងជះឥទ្ធិពលតិចតួចដល់ទីផ្សារភាគហ៊ុនថៃ ព្រោះប្រាក់ចំណូលរបស់ថៃពីអាជីវកម្ម នៅមួយមីយ៉ាន់ម៉ានៅមានកម្រិតទាប។
លោកបានមានប្រសាសន៍ថា “ទោះយ៉ាងណា យើងសូមព្រមានវិនិយោគិន ឱ្យប្រើការសម្រេចចិត្តច្បាស់លាស់ មុនពេលទិញភាគហ៊ុន ដែលមានការរំពឹងទុកខ្ពស់ ដូចជា GameStop នៅក្នុងទីផ្សារសហរដ្ឋអាមេរិក ពីព្រោះតម្លៃអាចធ្លាក់ចុះយ៉ាងខ្លាំង ដោយសារវាមានហានិភ័យខ្ពស់” ៕
