ដោយៈម៉ាណេត
ភ្នំពេញៈ ទីផ្សារខុនដូត្រូវបានអ្នកជំនាញរំពឹងថា នឹងចាប់ផ្តើមមានភាពប្រសើរឡើងវិញ ក្នុងពេលឆាប់ៗខាងមុខនេះ នៅពេលដែលវិនិយោគិនបរទេស នឹងអាចចាប់ផ្តើមធ្វើដំណើរឡើងវិញ សម្រាប់ការធ្វើធុរកិច្ចរបស់ពួកគេរយៈពេលពី៦ខែ ឬ៩ខែខាងមុខ។
លោកស្រីអាន សុធីតានាយិកាប្រចាំប្រទេស នៃក្រុមហ៊ុន CBRE Cambodia បានថ្លែងប្រាប់កាលពីម្សិលម៉ិញថា ទីផ្សារខុនដូនៅដើមឆ្នាំនេះ ហាក់ដូចជាមានភាពស្ងប់ស្ងាត់បន្តិច ដោយសារតែវិបត្តិកូវីដ១៩ មិនទាន់បានបញ្ចប់នៅឡើយ តែនឹងមានភាពប្រសើរឡើងវិញនាពេលមុខនេះ។
ទោះជាយ៉ាងនេះក្តី លោកស្រីបានថ្លែងថា ទីផ្សារខុនដូរំពឹងថានឹងចាប់ផ្តើមមានតម្រូវការប្រសើរឡើងវិញ ក្នុងពេលឆាប់ៗនេះ ដោយសារវ៉ាក់សាំងកូវីដ១៩ បាននិងកំពុងត្រូវបានចែកចាយ មិនត្រឹមតែនៅប្រទេសមួយចំនួនជុំវិញពិភពលោកទេ កម្ពុជាក៏នឹងទទួលបានក្នុងពេលឆាប់ខាងមុខនេះដែរ ដែលធ្វើឱ្យវិនិយោគិនបរទេស មានទំនុកចិត្តក្នុងការវិនិយោគឡើងវិញ។
លោកស្រីបានបន្តថា “នៅពេលទទួលបានវ៉ាក់សាំងគ្រប់គ្រាន់ វិនិយោគិនបរទេស នឹងចាប់ផ្តើមធ្វើដំណើរឡើងវិញ សម្រាប់ការធ្វើធុរកិច្ចរបស់ពួកគេ ដូច្នេះមិនយូរទេ ប្រហែលរយៈពេលពី៦ខែឬ៩ខែខាងមុខ ទីផ្សារខុនដូរំពឹងនឹងត្រឡប់ទៅរកភាពប្រសើរឡើងវិញ” ។
ជាមួយគ្នានេះ លោកឌឹត ចណ្ណានាយកប្រតិបត្តិក្រុមហ៊ុនអចលនទ្រព្យ ឡាក់គី រៀលធីបានឱ្យដឹងថា ទីផ្សារខុនដូភាគច្រើន ពឹងផ្អែកលើទីផ្សារក្រៅស្រុក ហើយទោះបីជាបច្ចុប្បន្ន ប្រជាជនក្នុងស្រុកចាប់ផ្តើមវិនិយោគ ក្នុងទីផ្សារខុនដូក៏ដោយ ក៏ចំនួនវិនិយោគិនក្នុងស្រុកនេះនៅចំនួនតិចនៅឡើយ។
លោកថ្លែងថា “វាជាសញ្ញាល្អហើយ ដែលអ្នកវិនិយោគក្នុងស្រុក ចាប់ផ្តើមធ្វើការវិនិយោគក្នុងវិស័យខុនដូ ប៉ុន្តែទីផ្សារនេះនៅត្រូវការវិនិយោគបរទេស ដើម្បីបំពេញបន្ថែមលើការផ្គត់ផ្គង់ដែលនៅសល់” ។
លោកចណ្ណាបានឱ្យដឹងទៀតថា នៅពេលមានវ៉ាក់សាំងកូវីដ១៩ គ្រប់យ៉ាងនឹងត្រឡប់ទៅរកភាពប្រក្រតីឡើងវិញ មិនថាខុនដូ និងផ្នែកផ្សេងៗទៀតក៏នឹងមានភាពល្អប្រសើរឡើងវិញផងដែរ។
យោងតាមការស្រាវជ្រាវរបស់ក្រុមហ៊ុនអចលនទ្រព្យ CBRE Cambodia ខុនដូចំនួន៩៣៧យូនីត បានបញ្ចប់ការសាងសង់ និងដាក់ចូលទីផ្សារក្នុងត្រីមាសទី៤ ឆ្នាំ ២០២០ ដែលធ្វើឱ្យចំនួនបន្ទប់ខុនដូ ក្នុងរាជធានីភ្នំពេញ គិតត្រឹមដំណាច់ឆ្នាំ២០២០ កើនឡើងដល់២៥.៩១៤យូនីត៕