ដោយ: សុខុម
សិង្ហបរី: វេទិកាសេដ្ឋកិច្ចពិភពលោក (World Economic Forum) ដែលគ្រោងធ្វើក្នុងប្រទេសសិង្ហបុរី នៅខែឧសភា ឆ្នាំ២០២១ ខាងមុខនេះត្រូវបានលើកពេលទៅធ្វើនៅខែសីហា ជំនួសវិញ។នេះបើយោងតាមសារព័ត៌មានCNA ចុះផ្សាយកាលពីថ្ងៃទី៤ខែកុម្ភៈ ឆ្នាំ២០២១។
តាមគម្រោងដំបូង កិច្ចប្រជុំនេះត្រូវធ្វើនៅថ្ងៃទី២៥ ឧសភា ដល់ថ្ងៃទី២៨ ខែឧសភា ប៉ុន្តែពេលនេះ ត្រូវបានលើកពេលមកធ្វើនៅថ្ងៃទី១៧ ខែសីហា ដល់ថ្ងៃទី២០ ខែសីហា ជំនួសវិញ។
វេទិកាសេដ្ឋកិច្ចពិភពលោក បានចេញសេចក្ដីប្រកាសកាលពីថ្ងៃពុធ ទី៣ កុម្ភៈ ថា “ទោះបីជាវេទិកាសេដ្ឋកិច្ចពិភពលោក និងរដ្ឋាភិបាលសិង្ហបុរី នៅតែមានទំនុកចិត្តចំពោះវិធានការត្រៀមជាស្រេច ដើម្បីធានាឱ្យកិច្ចប្រជុំនេះប្រព្រឹត្តទៅដោយរលូន និងមានសុវត្ថិភាព ហើយការឆ្លងវីរុសកូវីដ-១៩ នៅសិង្ហបុរី ស្ថិតក្នុងកម្រិតតិចតួចយ៉ាងណាក្ដី ក៏ការលើកពេលកិច្ចប្រជុំនេះ ឆ្លុះបញ្ចាំងពីបញ្ហាប្រឈមជាអន្តរជាតិ នៅក្នុងការទប់ការឆ្លងរាតត្បាតវីរុសកូវីដ-១៩”។
ស្ថាប័ននេះបានបន្តទៀតថា “ការរឹតបន្តឹងការធ្វើដំណើរទូទាំងពិភពលោក នាពេលបច្ចុប្បន្ន បានធ្វើឱ្យការធ្វើផែនការសម្រាប់កិច្ចប្រជុំ ចូលរួមផ្ទាល់នៅក្នុងឆមាសទី១ ដើមឆ្នាំនេះមានការលំបាក។ លើសពីនេះវិធានខុសៗគ្នានៃការធ្វើចត្តាឡីស័ក និងការធ្វើដំណើរតាមផ្លូវអាកាស បានធ្វើឱ្យការកំណត់ពេលវេលារៀបចំព្រឹត្តិការណ៍ ដ៏សំខាន់ចាំបាច់ខ្លាំងដើម្បីធានាថា អ្នកចូលរួមទូទាំងពិភពលោកអាចមកចូលរួមបានគ្រប់គ្នា”។
ក្រសួងពាណិជ្ជកម្ម និងឧស្សាហកម្មសិង្ហបុរី បានលើកឡើងក្រោយពីសេចក្ដីប្រកាសនេះថា រដ្ឋាភិបាលសិង្ហបុរី “យល់ពីបញ្ហាប្រឈម” ដែលវេទិកាសេដ្ឋកិច្ចពិភពលោកកំពុងប្រឈមមុខ ហើយក៏បានព្រមព្រៀងលើកពេលតាមសំណើ។
ក្រសួងពាណិជ្ជកម្ម និងឧស្សាហកម្មសិង្ហបុរី បានឆ្លើយតបសំណួររបស់ប្រព័ន្ធផ្សព្វផ្សាយថា “យើងនឹងបន្តសហការជាមួយវេទិកាសេដ្ឋកិច្ចពិភពលោក យ៉ាងស្អិតរមួត ដើម្បីរៀបចំកិច្ចប្រជុំពិសេសប្រចាំឆ្នាំនេះនៅសិង្ហបុរី ដោយជោគជ័យ និងមានសុវត្ថិភាព”៕
