ដោយ៖ លក្ខិណា
ភ្នំពេញ៖ សៀមរាបបាននិងកំពុងបង្ហាញពីភាពទាក់ទាញ បន្ថែមទៀតដល់វិនិយោគិនក្នុងនិងក្រៅប្រទេស ខណៈខេត្តនេះបានទទួលគម្រោងវិនិយោគជាច្រើនរួចមកហើយនៅពេលកន្លងនេះ។
លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍នៅថ្ងៃទី២ ខែកុម្ភៈ ឆ្នាំ២០២១នេះថា សៀមរាបគឺជាប៉ូលសេដ្ឋកិច្ចដ៏សំខាន់មួយបន្ទាប់ពីភ្នំពេញ និងខេត្តព្រះសីហនុ ហើយបច្ចុប្បន្នមានវិនិយោគិនជាច្រើន កំពុងបង្ហាញការចាប់អារម្មណ៍លើការវិនិយោគក្នុងខេត្តសៀមរាប។
លោកបានថ្លែងថា មូលហេតុ គឺដោយសារសៀមរាបជាតំបន់ទេសចរណ៍ ហើយហេដ្ឋរចនាសម្ព័ន្ធ ក្នុងខេត្តនេះ ក៏កំពុងត្រូវបានរដ្ឋាភិបាលអភិវឌ្ឍន៍និងសាងសង់ថ្មីៗបន្ថែម ដូច្នេះនៅពេលហេដ្ឋារចនាសម្ប័ន្ធទាំងនោះ សាងសង់រួច វិនិយោគិនក្នុង និងក្រៅប្រទេស នឹងអាចចូលទៅកាន់ខេត្ត ដើម្បីស្វែងរកការវិនិយោគបន្ថែមទៀត។
លោកបានលើកឡើងផងដែរថា វិនិយោគិនចូលចិត្តវិនិយោគ នៅតំបន់ណា ដែលមានហេដ្ឋារចនាសម្ព័ន្ធគ្រប់គ្រាន់ ដូចជាផ្លូវ ភ្លើង និងទឹកជាដើម។ ជាការកត់សម្គាល់តំបន់ណាដែលមានការអភិវឌ្ឍលើហេដ្ឋារចនាសម្ព័ន្ធ តំបន់នោះ នឹងទទួលបានគម្រោងអភិវឌ្ឍន៍បន្តបន្ទាប់ ដូច្នេះហើយទើបរដ្ឋាភិបាលបានអភិវឌ្ឍន៍ហេដ្ឋារចនាសម្ព័ន្ធបន្តបន្ទាប់នៅភ្នំពេញ ពីភ្នំពេញទៅកាន់បណ្ដាខេត្ត និងនៅក្នុងបណ្ដាខេត្តដែលមានសក្ដានុពលខ្ពស់ជាដើម ។
លោក Steven Wang នាយកប្រតិបត្តិក្រុមហ៊ុនអភិវឌ្ឍន៍អចលនទ្រព្យ Print Real Estate Group បានឱ្យដឹងថា ក្រុមហ៊ុនបានជ្រើសយកខេត្តពីរជាស្លាបនៃការអភិវឌ្ឍ ដោយភ្នំពេញជាដងខ្លួន។ ក្នុងចំណោមខេត្តទាំងពីរនោះ ក៏មានខេត្តសៀមរាបផងដែរ ដោយក្រុមហ៊ុនគ្រោងនឹងវិនិយោគឱ្យបាន៦០ពាន់លានដុល្លារក្នុងរយៈពេល១០ឆ្នាំខាងមុខទៀតនៅក្នុងប្រទេស។
លោកបន្តថា កម្ពុជាជាទីតាំងមួយនៅកណ្ដាលអាស៊ីអាគ្នេយ៍ហើយជាទីតាំងដែលទាក់ទាញដល់បណ្ដាវិនិយោគិនមកពីគ្រប់ទិសទី ចូលមកវិនិយោគក្នុងវិស័យអចលនទ្រព្យ។ ព្រីនស៍ ជ្រើសយកកម្ពុជា ជាតំបន់ស្នូលសម្រាប់វិនិយោគនៅក្នុងតំបន់អាស៊ីអាគ្នេយ៍៕