ដោយៈ ម៉ាណេត
ភ្នំពេញៈ សមតុល្យឥណទានលក្ខណៈបុគ្គល បានបន្តកើនឡើងជាលំដាប់ ខណៈឥណទានហិរញ្ញវត្ថុផ្ទាល់ខ្លួន មានចំណែកជិតពាក់កណ្តាល នៃសមតុល្យឥណទានលក្ខណៈបុគ្គលចំនួន៩,៧៦ពាន់លានដុល្លារនៅត្រីមាសទី៤ ឆ្នាំ២០២០ ។ នេះបើយោងតាមការរបាយការណ៍ចុងក្រោយរបស់ក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌី (CBC)។
ឥណទានលក្ខណៈបុគ្គល បង្ហាញអំពីបំណងរបស់អ្នកប្រើប្រាស់ ក្នុងការទទួលបានឥណទានក្នុងលក្ខណៈជា ឥណទានសម្រាប់ប្រើប្រាស់ផ្ទាល់ខ្លួន ប័ណ្ណឥណទាន និងកម្ចីអចលនទ្រព្យ។
របាយការណ៍បានឱ្យដឹងថា “សមតុល្យឥណទានហិរញ្ញវត្ថុផ្ទាល់ខ្លួន មានចំណែក៤៧,៤០ភាគរយ ស្មើនឹងជាង ៤.៦២ពាន់លានដុល្លារ នៃសមតុល្យឥណទានលក្ខណៈបុគ្គល។ បើទោះបីជាចំនួនគណនី នៃកម្ចីអចលនទ្រព្យមានចំនួនត្រឹម១០,៧៦% នៃចំនួនគណនីសរុប ក៏ប៉ុន្តែចំនួននេះមានទំហំច្រើនជាងពាក់កណ្តាល នៃសមតុល្យឥណទានសរុប” ។
សមតុល្យប័ណ្ណឥណទាន មានចំណែកតូចគឺត្រឹមតែ០,៦១ភាគរយប៉ុណ្ណោះ។ និយាយជារួម កំណើនវិជ្ជមានមាននៅគ្រប់តំបន់ទាំងអស់ដូចជា តំបន់ទំនាប+៧,៧ភាគរយ តំបន់ខ្ពង់រាប+៧,៣ភាគរយ តំបន់ឆ្នេរ+៦,៦ភាគរយ និងតំបន់ទន្លេសាប+៤,៨ភាគរយ។
លោកអឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌីមានប្រសាសន៍នៅក្នុងរបាយការណ៍ថា នៅក្នុងត្រីមាសទាំងពីរចុងក្រោយនេះទីផ្សារឥណទានមានភាពវិជ្ជមាន។
លោកបានថ្លែងថា “ទោះបីជាមានការកើនឡើង នៃពាក្យស្នើសុំឥណទានលក្ខណៈបុគ្គល និងដំណើរការឥណទានលក្ខណៈបុគ្គល អនុបាទនៃគណនីប្រាក់កម្ចីជាមួយនឹងការសងយឺត៣០ថ្ងៃ ហួសកាលបរិច្ឆេទកំណត់ នៅត្រឹមនៅគ្រប់តំបន់ទាំងអស់នៃព្រះរាជាណាចក្រកម្ពុជា” ៕