ដោយៈសុខុម
សិង្ហបុរី: ក្រុមហ៊ុន China Communications Construction Company, Ltd. (CCCC) ទទួលបានកិច្ចសន្យាតម្លៃ ១៨០លានដុល្លារសិង្ហបុរី (ជាង១៣៥ លានដុល្លារអាមេរិក) ដើម្បីសាងសង់ស្ពានមួយកម្ពស់២៥ម៉ែត្រ និងផ្លូវក្រោមដីសម្រាប់គម្រោងផ្លូវរថភ្លើងល្បឿនលឿន Rapid Transit System (RTS Link) ដែលភ្ជាប់ប្រទេសសិង្ហបុរី និងក្រុង Johor Bahru នៃរដ្ឋ Johor ប្រទេសម៉ាឡេស៊ី។ នេះបើយោងតាមការចុះផ្សាយរបស់សារព័ត៌មាន CNA ។
អាជ្ញាធរដឹកជញ្ជូនផ្លូវគោក (Land Transport Authority (LTA)) របស់សិង្ហបុរី បានបញ្ជាក់កាលពីថ្ងៃសុក្រ ទី២៩ មករា ថា នេះជាកិច្ចសន្យាទី២ ហើយដែលត្រូវបានប្រគល់ឱ្យក្រុមហ៊ុនឯកជន សម្រាប់គម្រោងផ្លូវរថភ្លើងល្បឿនលឿននេះ។
កិច្ចសន្យាទី១ ដែលមានតម្លៃ៩៣២,៨លានដុល្លារសិង្ហបុរី (ជាង៧០១លានដុល្លារអាមេរិក) បានទៅលើក្រុមហ៊ុនសាងសង់ជប៉ុន Penta-Ocean Construction កាលពីខែវិច្ឆិកា ឆ្នាំ២០២០ ។
តាមការរំពឹងទុក ការសាងសង់ស្ពាន និងការផ្លូវក្រោមដីសម្រាប់គម្រោងផ្លូវរថភ្លើងល្បឿនលឿន RTS Link នឹងចាប់ផ្ដើមនៅត្រីមាសទី២ នៃឆ្នាំ២០២១ នេះ។
អាជ្ញាធរដឹកជញ្ជូនផ្លូវគោកសិង្ហបុរី បានគូសបញ្ជាក់ថា ពេលសាងសង់បញ្ចប់ជាស្ថាពរ ស្ពានខាងលើនេះនឹងមានកម្ពស់២៥ម៉ែត្រ ពីលើកម្រិតទឹកនៃច្រកសមុទ្រ Johor Strait ដែលស្ថិតក្នុងដែនអធិបតេយ្យរបស់សិង្ហបុរី។
ដោយគ្រោងចាប់ផ្ដើមសេវាដឹកអ្នកដំណើរ នៅត្រឹមដំណាច់ឆ្នាំ២០២៦ រថភ្លើងល្បឿនលឿនក្នុងគម្រោង RTS Link នេះនឹងអាចដឹកអ្នកដំណើរបានរហូតដល់ទៅ ១០.០០០នាក់ក្នុងមួយម៉ោងក្នុងទិសដៅនីមួយ។ ការធ្វើដំណើរចម្ងាយផ្លូវ៤គីឡូម៉ែត្រចន្លោះស្ថានីយទាំងពីរ នឹងចំណាយពេលប្រហែល៥នាទី។ ពេលមកដល់សិង្ហបុរី អ្នកដំណើរអាចបន្តដំណើររបស់ខ្លួន ដោយការប្ដូរទៅស្ថានីយផ្លូវដែក Thomson-East Coast Line (TEL)។
យោងតាមសារព័ត៌មានដដែលឱ្យដឹងថា ប្រទេសម៉ាឡេស៊ី បានចាប់ផ្ដើមសាងសង់គម្រោងនេះនៅថ្ងៃទី២២ ខែវិច្ឆិកា ឆ្នាំ២០២០ ចំណែកភាគីខាងសិង្ហបុរី បានចាប់ផ្ដើមការងារសាងសង់លើស្ថានីយ RTS Link របស់ខ្លួននៅថ្ងៃទី២២ មករា ឆ្នាំ២០២១នេះ៕