ដោយៈ លក្ខិណា
កំពតៈ ក្នុងរយៈពេលបីឆ្នាំចុងក្រោយនេះ ខេត្តកំពតកាន់តែបង្ហាញពីសក្ដានុពលក្នុងការទាក់ទាញ គម្រោងវិនិយោគអចលនទ្រព្យ ជាពិសេសលើគម្រោងដែលគាំទ្រដល់វិស័យទេសចរណ៍ ដូចជា គម្រោងអភិវឌ្ឍន៍លំនៅឋានលំហែកាយ សណ្ឋាគារ ផ្ទះសំណាក់ជាដើម។
លោកអ៊ឹង ឆាយ អភិបាលរងខេត្តកំពត បានមានប្រសាសន៍ក្នុងសន្និសីទសារព័ត៌មានកាលពីថ្ងៃទី២៨ មករា ២០២១បានឱ្យដឹងថា អ្វីដែលធ្វើឱ្យកំពត មានសក្ដានុពលក្នុងការទាក់ទាញវិនិយោគិន ក៏ដូចជាទេសចរជាតិ និងអន្តរជាតិនោះ ដោយសារតែជាខេត្តជាប់មាត់សមុទ្រមួយ ដែលមានសក្កដានុពលធនធានធម្មជាតិសម្បូរបែប មានសម្បត្តិបិតិកភណ្ឌប្រវត្តិសាស្រ្ត និងមានឆ្នេរសមុទ្រជាង៦០គីឡូម៉ែត្រជាទីទាក់ទាញ។
លោកបន្តថា បន្ថែមពីនេះ ខេត្តក៏មានវិស័យកសិកម្ម ទេសចរណ៍និងឧស្សាហកម្ម ដែលធ្វើឱ្យខេត្តនេះ ស្រូបយកវិនិយោគិន និងទេសចរណ៍បានយ៉ាងច្រើនសន្ធឹកសន្ឋាប់ក្នុង១ឆ្នាំៗ និងមានផលិតផលនាំចេញទៅកាន់ទីផ្សារក្នុងតំបន់និងអឺរ៉ុប ដែលបានទាញចំណូលរាប់សិបលានដុល្លារចូលក្នុងសេដ្ឋកិច្ចរបស់ជាតិ។
លោកអភិបាលរងខេត្តបានបន្តថា ក្រៅពីនេះកំពតក៏មានការអភិវឌ្ឍយ៉ាងខ្លាំងលើ វិស័យសំណង់ លំនៅដ្ឋាន ហេដ្ឋារចនាសម្ព័ន្ធរូបវ័ន្ត ព្រមទាំងទទួលបានការគាំទ្រ និងទុកចិត្តពីសំណាក់ប្រជាពលរដ្ឋ អ្នកទេសចរជាតិ និងអន្តរជាតិ ជាពិសេសអ្នកវិនិយោគិន លើការរក្សាបានយ៉ាងល្អ នូវសន្តិសុខសណ្តាប់ធ្នាប់សាធារណៈ ធានាដល់ការស្នាក់នៅនិងប្រតិបត្តិការអាជីវកម្មរបស់ពួកគេ បានយ៉ាងសុខស្រួល និងមានសុវត្ថិភាព។
ជាមួយគ្នានេះ លោក ញ៉ូវ សាឯម សមាជិកក្រុមប្រឹក្សាខេត្តកំពត ក៏បានមានប្រសាសន៍ឲ្យដឹងផងដែរថា ផែនការអភិវឌ្ឍន៍ប្រាំឆ្នាំ និងកម្មវិធីវិនិយោគបីឆ្នាំរំកិលរបស់រដ្ឋបាលខេត្តកំពត បានគ្របដណ្តប់លើវិស័យសេដ្ឋកិច្ច សង្គមកិច្ច គ្រប់គ្រងដីធី្លធនធានធម្មជាតិបរិស្ថានការប្រែប្រួលអាកាសធាតុ និងគ្រោះមហន្តរាយរដ្ឋបាលសនិ្តសុខ សណ្តាប់ធ្នាប់សាធារណៈ សម្រាប់គម្រោងអភិវឌ្ឍន៍របស់ ខេត្តរហូតដល់ទៅ២៨៩គម្រោង ក្នុងនោះមានថវិកាគាំទ្រ២១៣គម្រោង អនុវត្តចប់សព្វគ្រប់ចំនួន៩៧គម្រោង កំពុងអនុវត្ត៧៩ គម្រោង និងមិនទាន់អនុវត្តន៍៣៧ គម្រោង។
លោកកែវ សុជាតិ ប្រធានក្រុមហ៊ុន KW Cambodia ប្រចាំខេត្តកំពត បានឱ្យដឹងថា គម្រោងអភិវឌ្ឍន៍មួយចំនួន នៅក្នុងខេត្តកំពត បានក្លាយជាទីទាក់ទាញវិនិយោគិនដទៃទៀត ចូលមកបណ្ដាក់ទុនវិនិយោគនៅក្នុងខេត្តមួយនេះ បើទោះបីជាកម្ពុជា និងពិភពលោកជួបប្រទះនឹងបញ្ហាកូវីដ១៩ ។
លោកបន្តថា នៅក្នុងរយៈពេលចុងក្រោយនេះ គេឃើញមានគម្រោងអភិវឌ្ឍន៍មួយចំនួនបានចូលទៅកាន់ទឹកដីខេត្តកំពត និងបានចាប់ផ្ដើមអភិវឌ្ឍន៍បណ្ដើរៗហើយ ដូចជាគម្រោងកំពតឋានសួគ៌ គម្រោងអគារខ្ពស់ គម្រោងសណ្ឋាគារ បុរីមួយចំនួនទៀត៕
