ដោយ៖ លក្ខិណា
ភ្នំពេញ៖ ដោយមើលឃើញថាវិស័យសហគ្រាសខ្នាតតូច និងមធ្យម (SME) នៅកម្ពុជានៅតែដើរតួនាទីសំខាន់ក្នុងសេដ្ឋកិច្ចជាតិ ធនាគារអេស៊ីលីដា ដែលជាធនាគារពាណិជ្ជធំជាងគេមួយនៅកម្ពុជា បានត្រៀមមូលនិធិប្រមាណ៦០០លានដុល្លារអាមេរិក ដើម្បីផ្ដល់ជូនសហគ្រាសខ្នាតតូចនិងមធ្យម ក្នុងឆ្នាំ២០២១។
លោកបណ្ឌិតអ៊ិន ចាន់នីប្រធាននាយកប្រតិបត្តិធនាគារអេស៊ីលីភីអិលស៊ី មានប្រសាសន៍ក្នុងកិច្ចសម្ភាសន៍ជាមួយអ្នកសារព័ត៌មាននៅព្រឹកថ្ងៃទី២៩ ខែមករា ២០២១នេះថា ក្នុងឆ្នាំ២០២១ ធនាគារអេស៊ីលីដា បានត្រៀមមូលនិធិប្រមាណ៦០០លានដុល្លារអាមេរិក សម្រាប់គាំទ្រដល់វិស័យ SME។
លោកបន្តថា រៀងលរាល់ឆ្នាំ ធនាគារអេស៊ីលីដា បានបញ្ចេញកញ្ចប់ថវិកាឥណទានរាប់រយលាន ដើម្បីជួយដល់វិស័យសហគ្រាសខ្នាតតូច និងធម្យមសម្រាប់យកទៅប្រើប្រាស់ ក្នុងការពង្រីកអាជីវកម្មរបស់ខ្លួនបន្ថែមទៀត។ ឆ្នាំនេះ ធនាគារបញ្ចេញជិត៦០០លានដុល្លារអាមេរិក សម្រាប់សហគ្រាសខ្នាតតូចនិងមធ្យម ហើយឆ្នាំក្រោយក៏នឹងបញ្ចេញមូលនិធិប្រហាក់ប្រហែលនេះដែរដើម្បីគាំទ្រវិស័យនេះ។
លោកបន្តថា តាមពិតទៅធនាគារអេស៊ីលីដា ក៏ផ្ដើមចេញពី SME នេះដែរ តែដោយសារតែការគ្រប់គ្រង និងមានផែនការច្បាស់លាស់ ធ្វើឱ្យធនាគារអេស៊ីលីដា បានក្លាយជាធនាគារពាណិជ្ជធំជាងគេនៅកម្ពុជា រហូតឈានដល់ជាធនាគារ ដែលបានបោះផ្សាយភាគហ៊ុននៅក្នុងផ្សារមូលបត្រមុនគេ ក្នុងចំណោមធនាគារពាណិជ្ជក្នុងប្រទេសទាំងអស់។
លោកបន្ថែមថា ការលូតលាស់របស់វិស័យធនាគារនៅកម្ពុជា ក្នុងឆ្នាំ២០២០កន្លងទៅក៏ទទួលបានដោយសារតែ វិស័យSME នេះដែរ ក្នុងនោះធនាគារសហគ្រាសខ្នាតតូចនិងមធ្យម បានបញ្ចេញកញ្ចប់១០០លានដុល្លារដើម្បីចាក់បញ្ចូលក្នុងវិស័យSME។ ក្នុងចំណោម១០០លានដុល្លារអាមេរិកនេះ គឺ៥០ភាគរយជាថវិការាជរដ្ឋាភិបាល និង៥០ភាគរយទៀត គឺជាថវិការបស់ដៃគូធនាគារ SME។
លោកបានថ្លែងថា “ក្នុងចំណោមថវិការបស់ដៃគូធនាគារSME អេស៊ីលីដាក៏បានដាក់ចូលក្នុងនោះ២៣លានដុល្លារ ឬជិតពាក់កណ្ដាលនៃថវិកាដៃគូសរុប ដូច្នេះបានបញ្ជាក់ថា ធនាគារអេស៊ីលីដា នៅតែយកចិត្តទុកដាក់លើវិស័យSME ជាវិស័យស្នូលសម្រាប់សេដ្ឋកិច្ចកម្ពុជា”។
លោកជិម តេងម្ចាស់រោងម៉ាស៊ីនកិនស្រូវមួយកន្លែងក្នុងស្រុកសូត្រនិគម ខេត្តសៀមរាប បានឱ្យដឹងថា អាជីវកម្មរបស់លោកបានរីកលូតលាស់មកដល់ពេលនេះ ក៏មានចំណែកពីការជួយជ្រោមជ្រែងរបស់ធនាគារអេស៊ីលីដា ដែលអនុញ្ញាតឱ្យលោកខ្ចី សម្រាប់ពង្រីកអាជីវកម្ម។
លោកបានថ្លែងបន្តថា មុននឹងលោកប្រើឥណទានរបស់ធនាគារអេស៊ីលីដា លោកក៏បានទៅសាកសួរធនាគារផ្សេងដែរ ហើយបុគ្គលិកធនាគារនោះ ក៏បានមកមើលអាជីវកម្មរបស់លោក រួចក៏ស្ងាត់ទៅវិញ។ សម្រាប់ធនាគារអេស៊ីលីដា បានមកសិក្សារួចហើយក៏បានសម្រេចឱ្យលោក យកទុនមកពង្រីកអាជីវកម្មបន្ថែមទៀត ៕
