ដោយ៖ លក្ខិណា
ភ្នំពេញ៖ អ្នកជំនាញបានលើកឡើងថា ខេត្តចំនួនពីរ រួមមានខេត្តព្រះសីហនុ និងខេត្តសៀមរាប កំពុងត្រូវបានយកចិត្តទុកដាក់អភិវឌ្ឍន៍ហេដ្ឋារចនាសម្ព័ន្ធ ដែលនឹងអាចធ្វើឱ្យទាំងខេត្តពីរនេះ ទទួលបានគម្រោងវិនិយោគថ្មីៗបន្តបន្ទាប់ នៅពេលអនាគត។
លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍នៅថ្ងៃទី២៨ ខែមករា ឆ្នាំ២០២១ ថា ការអភិវឌ្ឍអចលនទ្រព្យត្រូវមើលទៅលើទិសដៅអភិវឌ្ឍន៍របស់រាជរដ្ឋាភិបាលផងដែរ។ បច្ចុប្បន្ន ក្រៅពីរាជធានីភ្នំពេញ មានខេត្តពីរដែលរាជរដ្ឋាភិបាលយកចិត្តទុកដាក់អភិវឌ្ឍន៍ ហេដ្ឋារចនាសម្ព័ន្ធ ក្នុងនោះមានខេត្តព្រះសីហនុ និងខេត្តសៀមរាប។
លោកបានបន្តថា ខេត្តទាំងពីរ ត្រូវបានមើលឃើញថារាជរដ្ឋាភិបាលបោះទុនរាប់រយលានដុល្លារអាមេរិក ដើម្បីកសាងហេដ្ឋារចនាសម្ព័ន្ធ ក្នុងខេត្តទាំងនោះ។
លោកបន្តថា រាជរដ្ឋាភិបាលបានចាប់យកខេត្តព្រះសីហនុជាខេត្តគោលក្នុងការអភិវឌ្ឍ បន្ទាប់ខេត្តសៀមរាប ដោយសារតែខេត្តទាំងពីរនេះ គឺជាខេត្តដែលមានសក្ដានុពលលើវិស័យទេសចរណ៍ និងបានចាប់ផ្ដើមអភិវឌ្ឍន៍ហេដ្ឋារចនាសម្ព័ន្ធ ក្នុងពេលមានវិបត្តិកូវីដ១៩ ហើយនៅពេលចប់កូវីដ១៩ ភ្ញៀវទេសចរមកកម្សាន្តនៅកម្ពុជា ងាយស្រួលធ្វើដំណើរ។
លោកបន្ថែមថា បន្ទាប់ខេត្តសំខាន់ៗទាំងពីរនេះ ខេត្តផ្សេងទៀត ដូចជាមណ្ឌលគីរី ក៏ជាប៉ូលសំខាន់ក្នុងការអភិវឌ្ឍផងដែរ ដោយសារតែជាតំបន់ទេសចរណ៍ ហើយភ្ញៀវទេសចរជាតិ និងអន្តរជាតិ ក៏បានចាប់ផ្ដើមបុកទៅលើខេត្តមួយនេះ។ កំពតនិងកែប ក៏ទទួលបានការអភិវឌ្ឍគួរឱ្យកត់សម្គាល់ដែរ ក្នុងរយៈពេលចុងក្រោយនេះ ដោយមានផ្លូវធ្វើដំណើរស្រួលពីភ្នំពេញ ទៅកាន់តំបន់ទាំងនោះ។
លោកសំ សុខនឿនប្រធានសមាគមអចលនទ្រព្យសកល ក៏បានលើកឡើងផងដែរថា ដោយសារតែឆ្នាំ ២០២០ជាឆ្នាំ ដែលជួបវិបត្តិ ហើយវិស័យអចលនទ្រព្យក៏មានបញ្ហាប្រឈមជាច្រើនដែរ ដូច្នេះឆ្នាំ២០២១ យើងរំពឹងថាវិស័យអចលនទ្រព្យ ជាពិសេសការវិនិយោគ ពីខាងក្រៅប្រទេសនឹងចាប់ផ្ដើមកម្រើកឡើងវិញ ហើយបើសិនជាយើងដើរត្រូវ នោះនឹងធ្វើឱ្យវិស័យនេះអាចនឹងប្រសើរជាងឆ្នាំ២០១៩គ្រាដែលមុនផ្ទុះជំងឺកូវីដ១៩ទៅទៀត៕