ដោយៈលក្ខិណា
ភ្នំពេញៈ រដ្ឋមន្ត្រីក្រសួងពាណិជ្ជកម្មដែលទើបតែងតាំងថ្មី នៃរដ្ឋបាលប្រធានាធិបតីសហរដ្ឋអាមេរិកលោកJoe Biden បានបង្ហាញពីគោលបំណងរបស់ខ្លួន ក្នុងជំហររឹងមាំលើក្រុមហ៊ុនបច្ចេកវិទ្យាចិន ដូចកាលអតីតរដ្ឋបាលមុនបានធ្វើ។
លោកស្រី Gina Raimondo បានថ្លែងនៅចំពោះមុខក្រុមសមាជិកព្រឹទ្ធសភាកាលពីថ្ងៃអង្គារនៅក្នុងសវនាការ ដោយបានចាត់ទុកការអនុវត្តពាណិជ្ជកម្ម របស់ប្រទេសចិន ជាការប្រឆាំងទៅនឹងការប្រកួតប្រជែង និងធ្វើទុក្ខបុកម្នេញដល់បុគ្គលិក និងពាណិជ្ជកម្មរបស់ជនជាតិអាមេរិក។ លោកស្រីក៏បានចាត់ទុកសកម្មភាពរបស់ប្រទេសចិន ជាការរំលោភសិទ្ធិមនុស្សដ៏ធ្ងន់ធ្ងរ ។
លោកស្រី Raimondo បានលើកឡើងថា លោកស្រីមានបំណងប្រើគ្រប់មធ្យោបាយ ប្រឆាំងនឹងពាណិជ្ជកម្មរបស់ប្រទេសចិន ដូចជាការចុះបញ្ជីអង្គភាពពន្ធគយ តាមដែលអាចធ្វើទៅបាន។ ជំហររបស់លោកស្រី ហាក់ដូចជាការបន្តនូវជំហររបស់ក្រសួងពាណិជ្ជកម្ម ក្រោមអតីតប្រធានាធិបតីសហរដ្ឋអាមេរិក លោកដូ ណាល់ត្រាំ។
អតីតក្រសួងពាណិជ្ជកម្ម របស់រដ្ឋបាលលោក ដូ ណាល់ត្រាំ បានហាមឃាត់ក្រុមហ៊ុនសហរដ្ឋអាមេរិក យ៉ាងមានប្រសិទ្ធភាព ក្នុងការធ្វើជំនួញជាមួយក្រុមហ៊ុនបច្ចេកវិទ្យាចិន ដូចជាក្រុមហ៊ុន Huawei ជាដើម ដោយលើកឡើងពីការព្រួយបារម្ភផ្នែកសន្តិសុខ ។
លោកស្រីRaimondo បាននិយាយថា លោកស្រីនឹងពិនិត្យឡើងវិញ នូវគោលនយោបាយ ពិគ្រោះយោបល់ជាមួយសមាជិកសភា ផ្នែកឧស្សាហកម្ម និងសម្ព័ន្ធមិត្តសហរដ្ឋអាមេរិក ហើយធ្វើការវាយតម្លៃទៅលើអ្វីដែលល្អបំផុត សម្រាប់សន្តិសុខជាតិនិងសេដ្ឋកិច្ចសហរដ្ឋអាមេរិក។ សមាជិកគណៈរដ្ឋមន្រ្តីរបស់លោក ចូ បៃដិន ទទួលបន្ទុកផ្នែកការទូតនិងសន្តិសុខ បានសម្តែងនូវភាពចាំបាច់នៃជំហររឹងប៉ឹងប្រឆាំងនឹងប្រទេសចិន។
ទីក្រុងប៉េកាំង បានអំពាវនាវឱ្យទីក្រុងវ៉ាស៊ីនតោន ធ្វើវិសោធនកម្មគោលយោបាយដែលមានគោលជំហរខ្ពស់របស់រដ្ឋបាលលោក Trump លើប្រទេសចិន ។
ជំលោះពាណិជ្ជកម្មរវាងសហរដ្ឋអាមេរិក និងប្រទេសចិន បានកើតឡើងជាយូរមកហើយ ហើយបណ្ដាក្រុមហ៊ុនធំៗជាច្រើន ដែលមានមូលដ្ឋាននៅប្រទេសចិន ក៏បានរើចេញទៅរកប្រទេស ដែលរួចផុតពីទណ្ឌកម្មរបស់សហរដ្ឋអាមេរិក ជាពិសេសទៅរកប្រទេសដែលទទួលបានការអនុគ្រោះពីសហរដ្ឋអាមេរិក៕