ដោយ៖ សាវុធ
ភ្នំពេញ៖ ការនាំចូលដែករបស់កម្ពុជា មានការធ្លាក់ចុះយ៉ាងកំហុគនៅឆ្នាំ២០២០ ខណៈសកម្មភាពសាងសង់គម្រោងធំៗមួយចំនួន ត្រូវបានពន្យាពេលសាងសង់ ដោយសារវិបត្តិកូវីដ១៩។
កម្ពុជាបាននាំចូលដែកពីទីផ្សារក្រៅប្រទេស មានតម្លៃប្រមាណ២៨១,០៦លានដុល្លារ កាលពីឆ្នាំ២០២០ ធ្លាក់ចុះ៤១,១១ភាគរយ បើធៀបនឹងការនាំចូលដែកក្នុងឆ្នាំ២០១៩មានតម្លៃ៤២៧,២៦លានដុល្លារ។ នេះបើយោងតាមរបាយការណ៍របស់ក្រសួងចេញផ្សាយកាលពីថ្មីៗនេះ។
របាយការណ៍បានឱ្យដឹងថា ការនាំចេញដែករបស់កម្ពុជាសម្រេចបានទំហំ៦,២០លានដុល្លារ ក្នុង២០២០ កើនឡើង៣៥១ភាគរយ បើធៀបនឹងការនាំចេញក្នុង២០១៩មានតម្លៃ១,៣៧លានដុល្លារ។
អ្នកជំនាញក្នុងវិស័យសំណង់ និងអចលនទ្រព្យ បានលើកឡើងថា បើទោះបីជាវិស័យសំណង់ ត្រូវបានទទួលបានរងផលប៉ះដល់ខ្លាំង ដូចវិស័យទេសចរណ៍ និងបដិសណ្ឋាកិច្ចក៏ដោយ ក៏គម្រោងអភិវឌ្ឍន៍ធំៗមួយបានប្រកាសផ្អាក និងពន្យាសាងសង់ ដោយសារតែវិបត្តិកូវីដ១៩ ដែលធ្វើឱ្យការដំណើររបស់អ្នកវិនិយោគ និងការដឹកជញ្ជួន មានការរឹតបណ្តឹង អំឡុងពេលវិបត្តិនេះ។
នៅដើមឆ្នាំ២០២១នេះ ក្រុមហ៊ុន Hong De Sheng (Cambodia) Steel Co., បានប្រកាសថា រោងចក្រផលិតដែកតម្លៃ១៦,៧លានដុល្លាររបស់ខ្លួននៅស្រុកឧដុង្គ ក្នុងខេត្តកំពង់ស្ពឺ បានដាក់ឱ្យដំណើរការជាផ្លូវការ ដោយមានសមត្ថភាពផលិតដែកចំនួន ៥០០.០០០ តោនក្នុងមួយឆ្នាំក្នុងដំណាក់កាលដំបូងរបស់ខ្លួន។
លោក LIN XIANGRONG ( លីន ស៊ាងគ្រុង) អគ្គនាយកក្រុមហ៊ុន Hong De Sheng (Cambodia) បានលើកឡើងថា រោងចក្រស្លរដែកនេះ នឹងចូលរួមចំណែកដល់ការផ្គត់ផ្គង់ដែកក្នុងវិស័យសំណង់នៅកម្ពុជា បានមួយផ្នែកធំ៕
