ដោយៈសាវុធ
ភ្នំពេញៈ រោងចក្រប្រព្រឹត្តកម្មទឹកស្អាតនៅបាក់ខែង នឹងបើកការដ្ឋានសាងសង់នៅថ្ងៃទី២៧ ខែមករា ឆ្នាំ២០២១ ខាងមុខនេះ ខណៈរោងចក្រនេះនឹងមានសមត្ថភាពផ្គត់ផ្គង់ទឹកស្អាតចំនួន១៩៥,០០០ម៉ែត្រគូបក្នុងមួយថ្ងៃ។ នេះបើយោងតាមការចេញផ្សាយរបស់សារព័ត៌មានរបស់រដ្ឋ នៅថ្ងៃទី២២ ខែមករា ឆ្នាំ២០២១ ។
រោងចក្រប្រព្រឹត្តកម្មទឹកស្អាតនេះត្រូវបានរចនា និងសាងសង់ដោយក្រុមហ៊ុន Vinci Construction Grands Projects.។ គម្រោងនេះ នឹងចំណាយថវិកាប្រមាណ១៩០លានដុល្លារ ដែលមានការសហហិរញ្ញប្បទាន ដោយទីភ្នាក់ងារអភិវឌ្ឍន៍បារាំង (AFD) ធនាគារវិនិយោគអឺរ៉ុប និងរដ្ឋាករទឹកស្វយ័តក្រុងភ្នំពេញ (PPWSA)។
ក្នុងដំណាក់កាលទី១ ទុនចំនួន១៥៥លានដុល្លារ នឹងត្រូវប្រើប្រាស់ សម្រាប់ការសាងសង់ និងនៅដំណាក់កាលទី២ ទុនចំនួន៤៥លានដុល្លារទៀត នឹងត្រូវវិនិយោគ ដើម្បីបង្កើនសមត្ថភាពផលិតទឹកស្អាតបាក់ខែង ឱ្យបានទ្វេដង ស្មើនឹង ៣៩០.០០០ម៉ែត្រគូបក្នុងមួយថ្ងៃ។
លោកអ៊ុ សុថា អ្នកនាំពាក្យក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ បានមានប្រសាសន៍ថា គម្រោងនេះនឹងត្រូវសាងសង់លើផ្ទៃដីជាង១៥ហិកតា។
ដំណាក់កាលទី១ នៃគម្រោងនេះ មានសមត្ថភាពផលិតទឹកស្អាតចំនួន ១៩៥.ម៉ឺនម៉ែត្រគូបក្នុងមួយថ្ងៃ ហើយនឹងត្រូវបញ្ចប់នៅចុងឆ្នាំ២០២២ រីឯដំណាក់កាលទី២មានសមត្ថភាពផលិតបាន ចំនួន ៣៩០.០០០ម៉ែត្រគូប ក្នុងមួយថ្ងៃ ហើយនឹងបញ្ចប់នៅឆ្នាំ២០២៣ ។
លោកបន្តថា “រោងចក្រប្រព្រឹត្តិកម្មទឹកស្អាតបាក់ខែង គឺជារោងចក្រធំជាងគេនៅភ្នំពេញ ហើយនៅពេលសាងសង់ចប់ យើងអាចផ្គត់ផ្គង់ទឹកបានប្រហែល១លានម៉ែត្រគូបក្នុងមួយថ្ងៃនៅក្នុងទីក្រុង” ។
បច្ចុប្បន្ននេះ មានរោងចក្រផលិតទឹកស្អាតចំនួន៤ នៅទីក្រុងភ្នំពេញ ដែលមានសមត្ថភាពបាន៦៥០,០០០ ម៉ែត្រគូបក្នុងមួយថ្ងៃ៕