ដោយ សុខុម
ក្រុងម៉ានីល: យោងតាមការចុះផ្សាយរបស់គេហទំព័រ inquirer.net កាលពីថ្ងៃទី១៨ មករា ឱ្យដឹងថា Lobien Realty Group (LRG) ដែលជាក្រុមហ៊ុនផ្ដល់ប្រឹក្សាផ្នែកអចលនទ្រព្យ និងយុទ្ធសាស្ត្រវិនិយោគលើអចលនទ្រព្យជឿថា ស្ថានការណ៍អាក្រក់បំផុតដែលបង្កឡើងដោយសារការឆ្លងរាត្បាតវីរុសផ្លូវដង្ហើមប្រភេទថ្មីដ៏កាចសាហាវកូវីដ-១៩ បានបញ្ចប់ហើយ។
គំនិតសុទិដ្ឋិនិយមនេះគឺផ្អែកទៅលើការផលិតបានវ៉ាក់សាំងមានប្រសិទ្ធភាពខ្ពស់ និងសុវត្ថិភាពជាច្រើន ដែលពេលនេះកំពុងត្រូវបានចែកចាយក្នុងប្រទេសផ្សេងៗ ហើយប្រទេសហ្វីលីពីន ក៏បានចាប់ផ្ដើមចរចាទិញវ៉ាក់សាំងទាំងនោះផងដែរ។ តាមការរំពឹងទុកថា វ៉ាក់សាំងទាំងនោះនឹងមកដល់ហ្វីលីពីន នៅត្រីមាសទី២ ដើមឆ្នាំ២០២១ ។
ទន្ទឹមនេះ ធនាគារអភិវឌ្ឍន៍អាស៊ី (ADB) និយាយថា សេដ្ឋកិច្ចរបស់ប្រទេសហ្វីលីពីន ធ្លាក់ចុះនៅឡើយ ប៉ុន្តែកំពុងតែងើបឡើងសន្សឹមៗហើយ ខណៈការធ្លាក់ចុះ GDP (ផលិតផលក្នុងស្រុកសរុប) បានថយពី ១៦,៩% ក្នុងត្រីមាសទី២ នៃឆ្នាំ២០២០ មកនៅត្រឹម ១១,៥% ក្នុងត្រីមាសទី៣ នៃឆ្នាំដដែល។
ការព្យាករកំណើន GDP មួយឆ្នាំពេញក្នុងឆ្នាំ២០២០ បានធ្លាក់ចុះមកដល់ -៧,៣% ប៉ុន្តែតាមការរំពឹងទុកថានឹងកើនឡើងវិញចំនួន ៦,៥% ក្នុងឆ្នាំ២០២។ លទ្ធផលស្ទង់មតិអំពីក្ដីរំពឹងរបស់អាជីវកម្មដែលធ្វើឡើងដោយធនាគារកណ្ដាលហ្វីលីពីន Bangko Sentral ng Pilipinas (BSP) បង្ហាញថា សន្ទស្សន៍ការងារប្រហែលជាទទួលបានកំណើន ៥,៣% បន្ទាប់ពីធ្លាក់ចុះដល់ -៥,៥% ក្នុងត្រីមាសទី៣ នៃឆ្នាំ២០២០ ។
មិនខុសពីវិស័យផ្សេងៗទៀតនោះទេ ទីផ្សារអចលនទ្រព្យក្នុងប្រទេសហ្វីលីពីន បានរងផលប៉ះពាល់ខ្លាំងក្នុងឆ្នាំ២០២។ ទោះជាយ៉ាងណា ក្រុមហ៊ុន Lobien Realty Group (LRG) បានព្យាករថា ក្នុងឆ្នាំ២០២១ ទីផ្សារអចនលទ្រព្យ ជាពិសេសផ្នែកការិយាល័យ និងលំនៅដ្ឋាននឹងទទួលបានកំណើនជាវិជ្ជមានគួរឱ្យអបអរសាទរ៕