ដោយៈសុខុម
ញូយ៉កៈ សង្កាត់ហិរញ្ញវត្ថុ Wall Street ក្នុងក្រុងញូវយ៉ក បានបោះជំហានឆ្ពោះទៅរកការចាប់ផ្ដើមដ៏រឹងមាំ កាលពីថ្ងៃអង្គារ ទី១២ មករា នៅពេលការលក់ចេញសញ្ញាប័ណ្ណរបស់សហរដ្ឋអាមេរិក បានធ្វើតម្រូវការរូបិយប័ណ្ណដុល្លារកើនឡើង។
ទីផ្សារមានសុទិដ្ឋិនិយមថា ការចូលកាន់តំណែងជាផ្លូវការរបស់លោក ចូ បៃឌិន ជាប្រធានាធិបតីសហរដ្ឋអាមេរិក នៅសប្ដាហ៍ក្រោយនឹងប្រព្រឹត្តទៅដោយរលូន។
យោងតាមការចុះផ្សាយ របស់ទីភ្នាក់ងារព័ត៌មាន Reuters ឱ្យដឹងថា សកម្មភាពទិញចូលភាគហ៊ុនអឺរ៉ុបតិចតួច បូករួមគ្មានដំណឹងសំខាន់ៗអំពីក្រុមហ៊ុនសាជីវកម្ម ឬទិន្នន័យសេដ្ឋកិច្ចផងនោះ បានផ្ដល់សញ្ញាតិចតួចណាស់អំពីការតម្រង់ទិសទីផ្សារ។
លោក Ned Rumpeltin ប្រធានផ្នែកយុទ្ធសាស្ត្ររូបិយប័ណ្ណនៅធនាគារ TD Securities ដែលជាធនាគារវិនិយោគពហុជាតិសាសន៍ របស់ប្រទេសកាណាដាបានថ្លែងថា ទីផ្សារនានាកំពុងតែបញ្ជូនសារចម្រុះ សម្រាប់ដើមឆ្នាំ២០២១នេះ នៅពេលដែលភាគហ៊ុនហក់ឡើងខ្ពស់ ហាងឆេងមាស និងរូបិយប័ណ្ណដុល្លារហាក់នៅទ្រឹង ហើយសញ្ញាប័ណ្ណធ្លាក់ចុះ។
លោកបានបន្ថែមថា “វាជាសប្ដាហ៍ដែលតានតឹងខ្លាំងនៅឡើយ សម្រាប់នយោបាយរបស់សហរដ្ឋអាមេរិក ហើយរយៈពេលពីរបីថ្ងៃខាងមុខ អ្វីៗក៏អាចកើតឡើងបានដែរ។ នោះនឹងធ្វើឱ្យបណ្ដាវិនិយោគិនប្រយ័ត្នប្រយែងបន្តិចហើយ” ។
បក្សប្រជាធិបតេយ្យបានប្រកាសថា ខ្លួននឹងទុកឱកាសជាលើកចុងក្រោយឱ្យប្រធានាធិបតីដូណាល់ ត្រាំ ចុះចេញពីតំណែងមុនពេលកំណត់ ដោយមិនបាច់រង់ចាំដល់អាណត្តិរបស់លោកផុត ជាផ្លូវការនៅថ្ងៃទី២០ មករា ដ៏ខ្លីខាងមុខនេះឡើយ ដោយសារតែលោកបានញុះញង់ ឱ្យអ្នកគាំទ្ររបស់ខ្លួនធ្វើការប្រហារ ទៅលើវិមានរដ្ឋអាសភាកាពីតូល របស់សហរដ្ឋអាមេរិកកាលពីថ្ងៃទី៦ មករា។
ក្រឡេកមកមើលផ្សារភាគហ៊ុនវិញឃើញថា ផ្សារភាគហ៊ុន Dow Jones បានហក់ឡើង ០,២% ហើយផ្សារភាគហ៊ុន S&P 500 បានហក់ឡើង ០,២៦% ។ ចំណែកឯផ្សារភាគហ៊ុន Nasdaq បានហក់ឡើង ០,៣% ។
ក្រុមអ្នកវិភាគលើកឡើងថា ការលក់ចេញសញ្ញាប័ណ្ណរបស់សហរដ្ឋអាមេរិក ធ្វើឡើងដោយសារមានការរំពឹងទុកថា រដ្ឋាភិបាលក្រោមការដឹកនាំរបស់លោកចូ បៃឌិន ដែលនឹងចូលកាន់តំណែង នៅសេតវិមានសប្ដាហ៍ក្រោយ នឹងបញ្ចេញកញ្ចប់ថវិកាស្ដារសេដ្ឋកិច្ចបន្ថែមទៀត៕
