ដោយម៉ាណេត
ភ្នំពេញៈ ក្រុមហ៊ុនសម្ព័ន្ធ Bluebell Group បានប្រកាសឈានជើងចូលទីផ្សារកម្ពុជា ដោយទទួលបានឳកាសគ្រប់គ្រងគំរោងផ្សារទំនើបដ៏ធំ ក្នុងគំរោងThe PeAk នៅក្រុងភ្នំពេញ។
Bluebell Group ជាក្រុមហ៊ុនឈានមុខគេមានភាពជោគជ័យ ក្នុងការបង្កើតម៉ាកផលិតផលមួយចំនួន នៅទ្វីបអាស៊ីចាប់តាំងពីឆ្នាំ១៩៥៤មក។ ក្នុងនាមជាជំរើសដៃគូអាជីវកម្មនៅអាស៊ី ក្រុមហ៊ុនសម្ព័ន្ធBluebell Group បច្ចុប្បន្នមានវត្តមាននៅប្រទេសជប៉ុន កូរ៉េខាងត្បូង សាធារណៈប្រជាមានិតចិន ហុងកុង តៃវ៉ាន់ ម៉ាកាវ សិង្ហបូរី ម៉ាឡេស៊ី ឥណ្ឌូនេស៊ី និងប្រទេសថៃ។
បណ្តាញចែកចាយរបស់ក្រុមហ៊ុនសម្ព័ន្ធនេះ រួមបញ្ចូលទាំងខ្សែសង្វាក់ផ្សារទំនើបដើម្បីលើកកំពស់ប្រជាប្រិយភាពផលិតផល បណ្តាហាងទំនិញនានា បញ្ជរលក់ទំនិញនានា រចនាបទនៃបណ្តុំម៉ាកផលិតផលរបស់ខ្លួនជាដើម ក៏ដូចជាបណ្តាញបោះដុំដែលបានឆ្លងកាត់ការជ្រើសរើសកំរិតគុណភាពខ្ពស់ រួមនឹងអាជីវកម្មតាមប្រព័ន្ធអេឡិចត្រូនិច និងអាជីវកម្មតាមទីផ្សារដោយផ្ទាល់ទាំងក្នុងស្រុក និងផ្សារទំនើបដែលបំរើការដល់ការធ្វើដំណើរផ្សេងៗ។
ក្រុមហ៊ុនសម្ព័ន្ធនេះ ក៏បានដាក់អោយដំណើរការ នូវប្រភេទផលិតផលមួយចំនួនដូចជា៖ សំភារៈលម្អ ស្បែកជើង សំលៀកបំពាក់ គ្រឿងក្រអូប ផលិតផលថែរក្សាសម្រស់ ភោជនីយអាហារ គ្រឿងអលង្ការ នាឡិកា វ៉ែនតា និងថ្នាំជក់ជាដើម។
ទោះបីជាក្រុមហ៊ុនសម្ព័ន្ធ Bluebell Group ជាក្រុមហ៊ុនសម្ព័ន្ធមួយមានលក្ខណៈគ្រួសារក៏ដោយ ក៏ប៉ុន្តែក្រុមហ៊ុននេះ មានបុគ្គលិកបច្ចុប្បន្នចំនួនប្រមាណជាង៤,០០០នាក់ ដោយមានទីតាំងលក់ទំនិញចំនួន១,០០០កន្លែង និងចំណូលសរុបប្រមាណ២,៥០០លានដុល្លារអាមេរិក៕
