ដោយៈសុខុម
ប៉េកាំង: និយ័តករហិរញ្ញវត្ថុ (Financial Regulator) របស់ចិនកាលពីថ្ងៃអាទិត្យ ទី២៧ ធ្នូ បានជំរុញឱ្យក្រុមហ៊ុន Ant Group ដែលជាបុត្រសម្ព័ន្ធនៃក្រុមហ៊ុន Alibaba Group បង្ហាញផែនការជាក់លាក់ និងធ្វើការកែតម្រូវជាបន្ទាន់ ដើម្បីបំពេញបានតាមលក្ខខណ្ឌទាមទាររបស់ក្រុមនិយ័តករ។ នេះបើយោងតាមទីភ្នាក់ងារព័ត៌មាន Reuters ចុះផ្សាយក្នុងថ្ងៃដដែល។
ធនាគារកណ្ដាលចិន គណៈកម្មការគ្រប់គ្រងធនាគារ និងធានារ៉ាប់រងចិន (China Banking and Insurance Regulatory Commission) គណៈកម្មការគ្រប់គ្រងមូលបត្រចិន (China Securities Regulatory Commission) និងរដ្ឋបាលគ្រប់គ្រងអត្រាប្ដូរប្រាក់បរទេស (State Administration of Foreign Exchange) បានជំរុញឱ្យក្រុមហ៊ុនខាងលើនេះ ធ្វើការកែតម្រូវសកម្មភាពខុសច្បាប់របស់ខ្លួនផ្នែកហិរញ្ញវត្ថុ ដែលរួមមាននៅក្នុងឥណទាន ការធានារ៉ាប់រង និងអាជីវកម្មគ្រប់គ្រងទ្រព្យសម្បត្តិរបស់ខ្លួន និងឱ្យក្រុមហ៊ុននេះ គ្រប់គ្រងអាជីវកម្មវាយតម្លៃឥណទានរបស់ខ្លួន ឱ្យបានល្អប្រសើរ ដើម្បីការពារព័ត៌មានផ្ទាល់ខ្លួនរបស់អតិថិជន។
នេះបើយោងតាមការលើកឡើងរបស់លោក Pan Gongsheng ទេសាភិបាលរងនៃធនាគារប្រជាជនចិន (People’s Bank of China) ដែលជាធនាគារកណ្ដាល មួយថ្ងៃក្រោយពីជួបជាមួយតំណាងក្រុមហ៊ុនបច្ចេកវិទ្យាហិរញ្ញវត្ថុខាងលើ។
ជាការឆ្លើយតប ក្រុមហ៊ុន Ant Group បានចេញសេចក្ដីថ្លែងការណ៍ថា ខ្លួននឹងបង្កើតក្រុមការងារ “ធ្វើការកែតម្រូវ” ហើយនឹងអនុវត្តតាមលក្ខខណ្ឌតម្រូវរបស់ក្រុមនិយ័តករឱ្យបានពេញលេញ។
កាសែត Economic Daily ដែលមាននិន្នាការគាំទ្ររដ្ឋាភិបាល បានលើកឡើងក្នុងបទវិចារណកថាមួយថា ក្រុមហ៊ុនAnt Group គួរតែបម្រើសេចក្ដីត្រូវការរបស់ប្រជាជន និងការអភិវឌ្ឍសេដ្ឋកិច្ចជាតិ ដោយមានទំនួលខុសត្រូវឱ្យផ្នែកសង្គម។
ក្រុមនិយ័តករហិរញ្ញវត្ថុចិនកាលពីខែមុន បានបញ្ជាឱ្យផ្អាកភ្លាមៗនូវការបោះផ្សាយមូលបត្រលើកដំបូងជាសាធារណៈ (Initial Public Offering) ហៅកាត់ថា IPO តម្លៃ ៣៧ ពាន់លានដុល្លាររបស់ក្រុមហ៊ុន Ant Group នៅ ២ ថ្ងៃមុនពេលមូលបត្ររបស់ខ្លួនដល់ពេលចាប់ផ្ដើមធ្វើការជួញដូរនៅក្រុងសៀងហៃ និងហុងកុង។
កាលពីថ្ងៃព្រហស្បតិ៍ ទី២៤ធ្នូ អាជ្ញាធរចិន និយាយថា ខ្លួនបានបើកការស៊ើបអង្កេតបទរំលោភសេចក្ដីទុកចិត្ត លើក្រុមហ៊ុនមេ Alibaba Group ហើយថា នឹងកោះហៅក្រុមហ៊ុនបុត្រសម្ព័ន្ធ Ant Group ដែលនេះជាការវាយប្រហារយ៉ាងដំណំ លើកចុងក្រោយមកលើអាណាចក្រអាជីវកម្មតាមអនឡាញ និងបច្ចេកវិទ្យាហិរញ្ញវត្ថុ របស់កំពូលមហាសេដ្ឋីចិនលោក Jack Ma ។
លោក Pan Gongsheng បានគូសបញ្ជាក់ថា ការទាមទារថ្មីៗទាំងនេះក៏រួមានផងដែរនូវការទាមទារឱ្យក្រុមហ៊ុន Ant Group មានតម្លាភាពជាងមុនទាក់ទិន ការធ្វើប្រតិបត្តិការរបស់តតិយជន (ភាគីទី៣) និងមិនត្រូវធ្វើការប្រកួតប្រជែង ក្នុងរូបភាពត្រឹមត្រូវឡើយ ហើយត្រូវតែគោរពច្បាប់ឱ្យបានល្អ ដើម្បីធានាបាននូវភាពគ្រប់គ្រាន់នៃដើមទុន (capital adequacy)៕
