ដោយៈសុខុម
មីយ៉ាន់ម៉ាៈ ប្រទេសមីយ៉ាន់ម៉ា នឹងបើកដំណើរការអាកាសយានដ្ឋានថ្មី Lailenpi Airport ដែលជាអាកាសយានដ្ឋានទី២ ប្រចាំរដ្ឋឈីន (Chin) ប្រទេសមីយ៉ាន់ម៉ា ត្រូវបានរំពឹងថា នឹងសម្ពោធដាក់ឱ្យដំណើរការនៅដើមឆ្នាំ២០២១ ខណៈការងារសាងសង់បញ្ចប់បានប្រមាណ៨០% ។ នេះបើយោងតាមការឱ្យដឹងពីមន្ត្រីជាន់ខ្ពស់មួយរូបនៃរដ្ឋឈីន។
យោងតាមសេចក្តីរាយការណ៍របស់កាសែត Myanmar Times កាលពីថ្ងៃទី២៥ ធ្នូបានឲ្យដឹងថា លោក Salai Lian Luaiin អភិបាលរដ្ឋឈីន បានលើកឡើងកាលពីខែឧសភាថា នៅពេលសាងសង់រួចរាល់ជាស្ថាពរ អាកាសយានដ្ឋាននេះ នឹងមានសមត្ថភាពអាចទទួលយន្តហោះធុនតូច ដែលដឹកអ្នកដំណើរត្រឹម២០នាក់។
លោកថ្លែងថា “Lailenpi ជាអាកាសយានដ្ឋានទី២ ប្រចាំរដ្ឋឈីន។ យើងបានសាងសង់អាកាសយានដ្ឋាននេះជាមួយជំនួយបរទេស។ គោលបំណងនៃការសាងសង់អាកាសយានដ្ឋាននេះ គឺដើម្បីជួយសម្រួលដល់ការធ្វើដំណើររបស់ភ្ញៀវជាតិ និងអន្តរជាតិទៅមករវាងរដ្ឋឈីន និងក្រុងយ៉ង់ហ្គូន សម្រាប់បំពេញមុខជំនួញ ទេសចរកម្សាន្ត ឬក្នុងករណីមានអាសន្នបន្ទាន់” ។
បច្ចុប្បន្នការធ្វើដំណើរទៅមករវាងរដ្ឋឈីន និងក្រុងយ៉ង់ហ្គូនតាមផ្លូវគោក ត្រូវចំណាយពេលរហូតដល់ទៅ៣ថ្ងៃឯណោះ ហើយបើអាកាសយានដ្ឋាននេះដំណើរការ វានឹងជួយកាត់បន្ថយពេលវេលាធ្វើដំណើរបានច្រើន។
អាកាសយានដ្ឋាននេះ កំពុងស្ថិតក្រោមដំណើរការសាងសង់ ជាមួយជំនួយបរទេស២លានដុល្លារ ពីអង្គការគ្រីស្ទៀនអន្តរជាតិ Mission Aviation Fellowship MIF ដែលមានមូលដ្ឋាននៅប្រទេសអង់គ្លេស។
ក្រុង Lailenpi ស្ថិតនៅតំបន់ភាគខាងត្បូងនៃរដ្ឋឈីន ជិតព្រំដែនមីយ៉ាន់ម៉ា-ឥណ្ឌា។ ព្រឹទ្ធាចារ្យម្នាក់ឈ្មោះ U Hla Shwe ដែលរស់នៅក្នុងទីក្រុងខាងលើនេះនិយាយថា នៅពេលអាកាសយានដ្ឋាននេះ សាងសង់ចប់ជាស្ថាពរ វាក៏នឹងជួយសម្រួលដល់ការធ្វើពាណិជ្ជកម្មនៅតាមព្រំដែនផងដែរ។
យោងតាមអាកាសចរណ៍ស៊ីវិលឱ្យដឹងថា រដ្ឋឈីន គឺជារដ្ឋក្រីក្រី ដែលទទួលបានការអភិវឌ្ឍន៍តិចបំផុត នៅប្រទេសមីយ៉ាន់ម៉ា ប៉ុន្តែការសាងសង់បញ្ចប់ជាស្ថាពរនូវអាកាសយានដ្ឋានថ្មីនេះ នឹងធ្វើលើកកម្ពស់វិស័យទេសចរណ៍៕