ដោយៈ លក្ខិណា
ភ្នំពេញៈ រដ្ឋាភិបាលកម្ពុជា បានចំណាយថវិកាប្រមាណ១៧៥លានដុល្លារអាមេរិករួចហើយ គិតមកដល់ពេលនេះ សម្រាប់ផ្ដល់ជូនពលរដ្ឋក្រីក្រ និងរងគ្រោះដោយសារតែកូវីដ១៩ ។ នេះបើតាមបាយការណ៍របស់ក្រសួងសេដ្ឋកិច្ច និងហិរញ្ញវត្ថុនៅថ្ងៃទី២៣ ធ្នូ ២០២០ ។
លោកវង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងរដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានដឹកនាំប្រជុំដើម្បីពិនិត្យ និងពិភាក្សាលើលទ្ធផលនៃការតាមដាន និងការអនុវត្តកម្មវិធីឧបត្ថម្ភសាច់ប្រាក់ ជូនគ្រួសារក្រីក្រនិងងាយរងគ្រោះក្នុងអំឡុងពេលប្រយុទ្ធប្រឆាំងនឹងជំងឺកូវីដ១៩ ។
កិច្ចប្រជុំនេះបានពិនិត្យ និងពិភាក្សាលើលទ្ធផលនៃការតាមដាន និងប្រតិតុល្យការការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ដែលរាជរដ្ឋាភិបាលបានប្រកាស ដាក់ឱ្យអនុវត្តន៍ចាប់តាំងពីថ្ងៃទី២៤ ខែមិថុនា ឆ្នាំ២០២០កន្លងទៅនេះ។
ការងារធ្វើការតាមដាន និងប្រតិតុល្យការនេះ ធ្វើឡើងក្នុងគោលបំណងធានាឱ្យបានថាប្រជាជនក្រីក្រ និងងាយរងគ្រោះ ទទួលបានការឧបត្ថម្ភសាច់ប្រាក់ ពីរាជរដ្ឋាភិបាលត្រឹមត្រូវ និងការអនុវត្តយន្តការនៃកម្មវិធីមានប្រសិទ្ធភាព និងស័ក្តសិទ្ធិភាព ដោយបានប្រើប្រាស់វិធីសាស្ត្រចំនួន២រួមគ្នា ដោយផ្តោតទៅទិដ្ឋភាពខាងបរិមាណផង និងទិដ្ឋភាពខាងគុណភាពផង ហើយផ្តោតលើកិច្ចសម្ភាសន៍សំខាន់ៗចំនួន៣ គឺ កិច្ចសម្ភាសន៍គ្រួសារក្រីក្រ និងជនងាយរងគ្រោះតាមរយៈទូរស័ព្ទ ការចុះសម្ភាសន៍ផ្ទាល់ដល់មូលដ្ឋានជាមួយមន្ត្រី និងមេភូមិ-ឃុំមូលដ្ឋាន និងគ្រួសារក្រីក្រ និងកិច្ចសម្ភាសន៍ជាមួយអាជីវករ និងភ្នាក់ងារវីង។
លោកវង្សី វិស្សុតបានឱ្យដឹងថា របាយការណ៍តាមដានការអនុវត្តន៍ កម្មវិធីខាងលើនេះ ពិតជាមានសារៈសំខាន់ណាស់ សម្រាប់ជួយតម្រង់ផ្លូវយើងថែមទៀត ក្នុងការកែសម្រួលឡើងវិញនូវប្រព័ន្ធរបស់យើង ទាំងក្នុងកម្រិតនៃការរៀបចំគោលនយោបាយ និងទាំងក្នុងកម្រិតនៃការរៀបចំផែនការ និងយន្តការសម្រាប់អនុវត្ត ពិសេសដើម្បីកែលំអរនូវចំណុចខ្វះខាតទាំងឡាយ ដើម្បីធ្វើឱ្យប្រព័ន្ធរបស់យើងកាន់តែមានប្រសិទ្ធភាព និងស័ក្តិសិទ្ធភាព។
លោកបានបន្តទៀតថា “ការអនុវត្តកម្មវិធីគាំពារសង្គម របស់រាជរដ្ឋាភិបាលទាំងមូល ទាំងសម្រាប់កម្មវិធីដែលត្រូវបន្តអនុវត្តរាល់ឆ្នាំ និងទាំងកម្មវិធីដែលត្រូវអនុវត្តតែពេលមានគ្រោះអាសន្ន ឬវិបត្តិផ្សេងៗ ដូចពេលមានផ្ទុះជំងឺកូវីដ-១៩នាពេលនេះដើម។
យោងតាមរបាយការណ៍ធនាគារពិភពលោកកន្លងមក ក៏បានគាំទ្រកម្មវិធីឧបត្ថម្ភសាច់ប្រាក់របស់រាជរដ្ឋាភិបាលកម្ពុជា ទៅកាន់ប្រជាជនក្រីក្រ ហើយថាវាក៏ជាផ្នែកមួយនៃការទប់ការធ្លាក់ចុះ នៃអត្រាប្រជាជនក្រីក្របន្ថែមទៀតនៅក្នុងពេលវិបត្តកូវីដ១៩ ៕