ដោយៈ លក្ខិណា
ភ្នំពេញៈ ក្នុងពេលវិបត្តិកូវីដ១៩ នៅតែមិនទាន់បានបញ្ចប់នៅឡើយ វិនិយោគិនក្នុងស្រុកមួយចំនួន បានចាប់ផ្ដើមដំណើរការវិនិយោគគម្រោងជាបណ្ដើរៗ ដោយមានសុទិដ្ឋនិយមថា វិបត្តិនឹងត្រូវបញ្ចប់នៅពេលឆាប់ៗ ពោលគឺនៅឆ្នាំ២០២១ខាងមុខនេះ។
ជាក់ស្ដែងវិនិយោគិនក្នុងស្រុកមួយរូប បានចាប់ផ្ដើមអភិវឌ្ឍន៍គម្រោង១៣០ហិចតា ដើម្បីសង់លំនៅឋាន និងដីឡូត៏ ហើយក៏បានត្រៀមដីជាង៥០០ហិចតារួចហើយសម្រាប់អភិវឌ្ឍន៍បន្តបន្ទាប់នៅពេលខាងមុខ។
លោកឧកញ៉ាអ៊ឹង គីមហុង វិនិយោគិនក្នុងស្រុកមួយរូបបានឱ្យដឹងតាមទទូរស័ព្ទកាលពីថ្ងៃសុក្រទី១៨ ធ្នូកន្លងមកថា លោកបានត្រៀមដី នៅតាមបណ្ដោយផ្លូវ៥១ចំនួនជាង៥០០ហិចតា ដែលលោកបានទិញជាយូរមកហើយ ដើម្បីអភិវឌ្ឍន៍គម្រោងអចលនទ្រព្យនានា ទោះបីជាកូវីដ១៩មិនទាន់បានបញ្ចប់ក្ដី ។
លោកនិយាយថា “សម្រាប់ជំងឺកូវីដ១៩នេះ ប្រទេសធំៗ គេនឹងមិនទុកឱ្យវានៅអូសបន្លាយយូរនោះទេ។ ដូច្នេះលោកជឿជាក់ថា នៅពេលឆាប់ៗខាងមុខនេះ វានឹងត្រូវបញ្ចប់ ហើយសម្រាប់កម្ពុជាក៏ជាប្រទេសតូចមួយ ដែលបាននិងកំពុងរងគ្រោះដោយសារតែកូវីដ១៩ក៏នឹងត្រូវបញ្ចប់វិបត្តិនេះដូចគ្នា” ។
លោកឧកញ៉ាបានបន្តថា កត្តាដែលលោកសម្រេចវិនិយោគ គម្រោងអចលនទ្រព្យនៅផ្លូវ៥១ ដោយសារតែលោកមើលឃើញថាតំបន់នេះ ត្រូវបានចាប់អារម្មណ៍ពីសំណាក់វិនិយោគិនជាច្រើនទៀត ហើយវាក៏ជាទីតាំងដែលកំពុងអភិវឌ្ឍន៍ ទៅជាតំបន់រោងចក្រសហគ្រាសជាច្រើន។ ជាក់ស្ដែងបច្ចុប្បន្នមានគម្រោងរោងចក្រជាច្រើន កំពុងបាញឆ្ពោះមករកតំបន់ផ្លូវ៥១ ។ ដូច្នេះហើយទើបលោកដាក់ទុនសាងសង់ជាលំនៅឋាន ឃ្លាំងរោងចក្រនិងដីឡូត៏ ដើម្បីពលរដ្ឋមានចំណូលទាប ទិញសម្រាប់ទុកនៅពេលរោងចក្រមកដល់ទីនោះ ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានឱ្យដឹងថា តំបន់ដែលមានហេដ្ឋារចនាសម្ព័ន្ធផ្លូវ ទឹក ភ្លើង តំបន់នោះនឹងមានការទាក់ទាញវិនិយោគទៅបណ្ដាក់ទុន។ នេះគឺជាចំនុចដ៏សំខាន់មួយ សម្រាប់ទាក់ទាញវិនិយោគិន ហើយរដ្ឋាភិបាលក៏បានខិតខំ ក្នុងការអភិវឌ្ឍហេដ្ឋារចនាសម្ព័ន្ធបន្ថែមទៀត ដើម្បីសម្រួលដល់ការវិនិយោគរបស់វិនិយោគិនជាតិ អន្តរជាតិ ក៏ដូចជាសម្រួលដល់ប្រជាពលរដ្ឋធ្វើដំណើរផងដែរ៕
