ដោយៈសាវុធ
ភ្នំពេញៈ ក្រុមហ៊ុនផ្សារមូលបត្រកម្ពុជា (CSX) បានទទួលពាក្យសុំចុះបញ្ជីលើទីផ្សារកំណើន (Growth Board) ជាលើកដំបូងពីសហគ្រាសធុនតូច និងមធ្យម (SME) ដែលនឹងជំរុញ SME នៅលើផ្សារហ៊ុន ក្នុងការប្រមូលមូលនិធិ តាមរយៈទីផ្សារមូលធនមួយនេះ ដើម្បីពង្រីកអាជីវកម្ម។ នេះយោងតាមការលើកឡើងរបស់ CSX ចេញផ្សាយកាលពីថ្មីៗនេះ។
ការបោះផ្សាយលក់មូលបត្រកម្មសិទ្ធិ លើកដំបូងជាសាធារណៈ (IPO) មិនត្រូវបានបង្ហាញទេនៅពេលនេះ ដោយត្រូវរង់ចាំរហូតដល់គណៈកម្មការមូលបត្រកម្ពុជា (SECC) ផ្ដល់ការយល់ព្រមលើការបោះផ្សាយលក់ មូលបត្រកម្មសិទ្ធិលើកដំបូងជាសាធារណៈជាមុន។
ទីផ្សារកំណើន ត្រូវបានដាក់ឱ្យដំណើរការកាលពីឆ្នាំ២០១៥ ហើយ CSX ព្យាយាមយ៉ាងខ្លាំងក្នុងការទាក់ទាញ SME ដើម្បីចុះបញ្ជីបោះផ្សាយមូលបត្រកម្មសិទ្ធិ។
ក្រុមហ៊ុនប្រភេទ SMEs ត្រូវមានមូលធនប្រតិបត្តិការអប្បបរមា ចំនួន៥សែនដុល្លារក្នុងការចុះបញ្ជី បើធៀបនឹង ៧,៥លានដុល្លារលើទីផ្សារគោល។ នេះបើយោងតាមបទ ប្បញ្ញត្តិរបស់ SECC។
ចំពោះក្រុមហ៊ុនដែលចុះបញ្ជីនៅលើទីផ្សារនេះ តម្រូវឱ្យចេញផ្សាយលទ្ធផលហិរញ្ញវត្ថុ ដែលធ្វើសវនកម្មរួចហើយរយៈពេល១ឆ្នាំ ធៀបនឹងរយៈពេល២ឆ្នាំ ដែលតម្រូវសម្រាប់ក្រុមហ៊ុនធំ។ លើសទៅទៀតនេះលទ្ធផលនេះ ត្រូវតែបង្ហាញប្រាក់ចំណេញសុទ្ធវិជ្ជមាន ឬលំហូរសាច់ប្រាក់ប្រតិបត្តិការវិជ្ជមាន ជាមួយនឹងប្រាក់ចំណេញដុលយ៉ាងហោចណាស់១០ភាគរយ។
បច្ចុប្បន្ន ក្រុមហ៊ុនចុះបញ្ជីនៅក្នុងផ្សារមូលបត្រកម្ពុជាមានចំនូន១៣ ក្នុងនោះក្រុមហ៊ុនចំនួន៧ចុះបញ្ជីភាគហ៊ុន និងក្រុមហ៊ុន៦ផ្សេងទៀតចុះបញ្ជីសញ្ញាបណ្ណសាជីវកម្ម។
យោងតាមទិន្នន័យរបស់ CSX បានឱ្យដឹងថា ក្រុមហ៊ុនទាំង១៣នេះបានប្រមូលមូលនិធិរួមចំនួន២៥៣លានដុល្លារ និងសន្ទស្សន៍ភាគហ៊ុន បានកើនឡើងជាង៥៧ភាគរយកាលពីឆ្នាំមុនធៀបនឹងឆ្នាំ ២០១៨ ។
ទិន្នន័យដដែលនេះក៏បានបង្ហាញថា នៅក្នុងរយៈពេល៩ខែដំបូងឆ្នាំនេះ ក្រុមហ៊ុនចំនួន២បានចុះបញ្ជីភាគហ៊ុន និងក្រុមហ៊ុន៣បានចុះបញ្ជីសញ្ញាបណ្ណសាជីវកម្ម។ ក្រុមហ៊ុនទាំង៥នេះ បានប្រមូលមូលនិធិរួមចំនួន៩២លានដុល្លារ៕