ដោយៈ គង់ សូរិយា
ភ្នំពេញៈ អ្នកឧកញ៉ា សួ វិរៈ អគ្គនាយកក្រុមហ៊ុនវីរៈ ប៊ុនថាំ អេ
ចប្រេស បានប្រកាសស្វែងរកអ្នកជំនាញ កែច្នៃវត្ថុអនុស្សាវរីយពីគ្រឿងសមុទ្រ បង្រៀនដល់សហគមន៍កោះស្ដេច រកចំណូលបន្ថែម។
អ្នកឧកញ៉ា សួ វិរៈ បានមានប្រសាសន៍ឱ្យដឹងកាលពីពេលថ្មីៗនេះថា ប្រជាពលរដ្ឋរស់នៅក្នុងសហគមន៍ កោះស្ដេចភាគច្រើន ប្រកបមុខរបរជាអ្នកនេសាទ មានប្រពន្ធនៅផ្ទះតាំងតែពីដើមមក ដែលប្រពន្ធ ជាអ្នកចាក់មងសម្រាប់ឱ្យប្ដីនេសាទ សល់ពេលក្រៅពីនេះ គឺទំនេរ។
អ្នកឧកញ៉ាសួ វិរៈ បញ្ជាក់ថា “ដោយសារភ្ញៀវទេសចរទៅលេងកោះស្ដេចមានចំនួនកើនឡើង ជារៀងរាល់ថ្ងៃឥឡូវនេះ ផ្លូវបានស្អាតស្ទើតែ១០០% ខណៈចំនួនភ្ញៀវទេសចរទាំងខ្មែរ និងបរទេសក៏មានការកើនឡើង”។ លោកបន្ថែមថា “អញ្ចឹងហើយខ្ញុំមានគំនិតមួយ ចង់ឱ្យប្រជាពលរដ្ឋនៅលើកោះស្ដេច គាត់អាចរកចំណូលបានបន្ថែម ហើយប្រើធនធាន ដែលគាត់មានហើយយកទៅបោះចោល កប់នៅក្នុងសមុទ្រ ឬដុតចោល ឱ្យច្នៃជាចំណូលពួកគាត់វិញ”។
អ្នកឧកញ៉ាសួ វិរៈ បានបញ្ជាក់ថា សំបកខ្ចៅ ខ្យង ដែលបោះចោលនៅតាមមាត់ឆ្នេរ មិនមានរបៀបច្នៃទេ ប្រសិនបើយើងអាចរកអ្នកដែលមានជំនាញ មកបង្រៀនពួកគាត់បាន ដូច្នេះគាត់អាចរកចំណូលបន្ថែមពីការធ្វើរបស់របរទាំងនោះ។
អ្នកឧកញ៉ាសួ វិរៈ បន្ថែមថា“ប្រសិនបើអ្នកដែលគាត់មានជំនាញ អាចមកជួយការងារខ្ញុំបាន ក្នុងនោះយើងថា ជាការស្មគ្រចិត្តក៏បាន តែខ្ញុំមានចរចារជាក់ស្ដែងថា តើគាត់អាចយកជាប្រាក់រយៈពេលប៉ុន្មានខែ ដើម្បីបង្រៀនប្រជាពលរដ្ឋប៉ុន្មានខែ ដើម្បីឱ្យប្រជាពលរដ្ឋមាសត្ថភាពចេះធ្វើរបស់របរផ្សេងៗ ដើម្បីលក់ទៅឱ្យភ្ញៀវទេសចរ”។
បើតាមអ្នកឧកញ៉ាសួ វិរៈ មានរូបមន្តពីរទី១ គឺឱ្យប្រជាពលរដ្ឋលក់នៅផ្ទះរបស់គាត់ ក៏បាននៅពេលដែលប្រជាពលរដ្ឋ ធ្វើនៅឯផ្ទះរបស់គាត់ ជាផលិតផលថ្មីមួយដែលឱ្យភ្ញៀវទេសចរ ទៅមើលរបៀបធ្វើវត្ថុអនុស្សាវវីយ៍ និងទី២ ប្រសិនបើគាត់មិនអាចលក់បានទេ គឺក្រុមហ៊ុនវីរៈ ប៊ុនថាំ ធានាទិញទាំងអស់៕
