ដោយៈសាវុធ
ភ្នំពេញៈ អ្នកជំនាញនៅក្នុងវិស័យអចលនទ្រព្យនៅកម្ពុជាអះអាងថា តម្លៃអចលនទ្រព្យនៅក្នុងរាជធានីភ្នំពេញ នៅតែបន្តបាននូវភាពលំនឹងដដែល ដោយមិនមានការធ្លាក់ចុះនោះទេ បើទោះស្ថិតនៅក្នុងអំឡុងពេលមានវិបត្តិក៏ដោយ ហើយបង្ហាញពីភាពជឿជាក់ថា នៅដើមឆ្នាំ២០២១ខាងមុខនេះ គឺនៅរក្សាបានលំនឹងដដែល។
នាយិកាប្រចាំប្រទេសក្រុមហ៊ុន CBRE Cambodia លោកស្រីអាន សុធីតា បានមានប្រសាសន៍កាលថ្មីៗនេះថា រហូតដល់ឆ្នាំ២០២១ខាងមុខនេះ តម្លៃអចលនវត្ថុនៅក្នុងរាជធានីភ្នំពេញ ដែលរួមមានតម្លៃដីធ្លី និងសំណង់លំនៅដ្ឋាននានា នៅតែបន្តរក្សាបាននូវលំនឹងដូចឆ្នាំ២០២០ដដែល។
លោកស្រីបានបញ្ជាក់ “ទាំងតម្លៃដី ទាំងតម្លៃអចលនវត្ថុផ្សេងៗដូចជា សំណង់លំនៅដ្ឋាន ខុនដូជាដើម គឺអាចបន្តបានស្ថានភាពដូចបច្ចុប្បន្នដដែល លើកលែងតែម្ចាស់អចលវត្ថុមួយចំនួនតូច ដែលមានបញ្ហាចរន្តសាច់ប្រាក់បន្ទាន់ ពួកគាត់អាចនឹងបង្ខំចិត្តប្រកាសលក់ក្នុងតម្លៃមួយទាបជាងទីផ្សារតែប៉ុណ្ណោះ” ។
លោកស្រីអាន សុធីតា បានបន្តថា នៅក្នុងរាជធានីភ្នំពេញ បើនិយាយពីតម្រូវការនៃការប្រើប្រាស់ដីសម្រាប់អភិវឌ្ឍន៍ គម្រោងផ្សេងៗគឺនៅតែបន្តមាន ប៉ុន្តែចំពោះផ្ទៃដីដែលទំនេរហាក់មិនមានច្រើននោះទេ ដែលជាហេតុជំរុញឱ្យតម្លៃដីឡើងថ្លៃជារៀងរាល់ឆ្នាំ លើកលែងតែក្នុងអំឡុងឆ្នាំ២០២០នេះ ដោយសារតែបញ្ហានៃជំងឺឆ្លង ដែលកំពុងរាតត្បាតជាសាកល ទើបធ្វើឱ្យតម្លៃនៅលើទីផ្សាររួមស្ថិតនៅក្នុងសភាពទ្រឹង ប៉ុន្តែមិនធ្លាក់ចុះនោះទេ។
ជាមួយគ្នានេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ថា ចំពោះតម្លៃដីនៅក្នុងរាជធានីភ្នំពេញ មានអត្រាមិនស្មើគ្នានោះទេ ដោយក្នុងនោះតម្លៃដីដែលថ្លៃជាងគេជាងគេ ក្នុងចំណោមខណ្ឌទាំង១៤ គឺខណ្ឌដូនពេញ ខណ្ឌបឹងកេងកង ខណ្ឌ៧មករា និងខណ្ឌទួលគោក ហើយតម្លៃទាប ឬខ្ពស់ក៏អាស្រ័យទៅតាមផ្លូវផងដែរ។
លោកបន្តថា “ដីស្ថិតនៅកណ្តាលក្រុង ជាពិសេសនៅតាមបណ្តាផ្លូវ និងមហាវិថីសំខាន់ៗ គឺមានតម្លៃខុសៗពីគ្នា ហើយក៏មិនសូវមានការទិញ លក់យ៉ាងគគ្រឹកគគ្រេង ដូចដីនៅតំបន់ផ្សេងទៀត ដែលស្ថិតនៅជាយក្រុងនោះដែរ រហូតត្រូវបានអ្នកជំនួញលើវិស័យមួយនេះចាត់ទុកថា ជាតំបន់ដីកម្រ” ។
លោកបានបញ្ជាក់ថា ដីដែលស្ថិតនៅតាមបណ្តាផ្លូវខាងលើនេះ គឺត្រូវបានគេគិតជាចំណែកផ្សេងៗពីគ្នា ដូចជាផ្លូវព្រះមុន្នីវង្ស រាប់គិតត្រឹមតែពីម្ដុំផ្សារថ្មីមកដល់តំបន់ពេទ្យចិនអាចមានតម្លៃចន្លោះពី៥០០០-៦០០០ដុល្លារក្នុងមួយម៉ែត្រការ៉េ ឬអាចលើសពីនេះអាស្រ័យលើទំហំដី និងតម្រូវការជាក់ស្ដែង។ បើគិតចាប់ពីម្ដុំពេទ្យរហូតដល់ម្ដុំស្តុបបូគោអាចមានចន្លោះ៤០០០-៥០០០ដុល្លារក្នុងមួយម៉ែត្រការ៉េ៕
