ដោយៈ សុខុម
ភ្នំពេញៈ ពេលនេះប្រាក់ដុល្លារអាមេរិក កំពុងតែធ្លាក់ថ្លៃខ្លាំង ដែលជាការដើរថយក្រោយ ហើយសង្កាត់ពាណិជ្ជកម្មអាមេរិក Wall Street មិនរំពឹងថា ស្ថានភាពនេះនឹងប្រែជាធូរស្រាលក្នុងពេលឆាប់ៗឡើយ។
តើមានអ្វីកើតឡើង? នៅពេលប្រាក់ដុល្លារបានធ្លាក់ថ្លៃជិត១២% បើធៀបទៅនឹងរូបិយប័ណ្ណកំពូលៗមួយចំនួន ចាប់តាំងពីឡើងដល់ចំណុចកំពូលកាលពីខែមីនា។ កាលពីសប្តាហ៍មុន ប្រាក់ដុល្លារបានធ្លាក់ថ្លៃមកដល់កម្រិតទាបបំផុត ចាប់តាំងខែមេសា ឆ្នាំ២០១៨ ។ លើកចុងក្រោយនេះគឺពិតជាធ្ងន់ធ្ងរខ្លាំង ប្រៀបបានទៅនឹងស្ថានភាពក្នុងឆ្នាំ២០១៧ ។
ក្រុមអ្នកជំនាញពន្យល់ថា ការធ្លាក់ថ្លៃនេះអាចបណ្ដាលមកពីកត្តាមួយចំនួន ដូចខាងក្រោម៖
- ការជឿជាក់ថាសេដ្ឋកិច្ចពិភពលោករើបឡើងៈ នៅពេលដែលសេដ្ឋកិច្ចរបស់សហរដ្ឋអាមេរិក និងសេដ្ឋកិច្ចពិភពលោកទទួលបានកំណើនគួរឱ្យសាទរ ប្រាក់ដុល្លារទំនងជាធ្លាក់ ថ្លៃ។ ពេលនេះ ទោះបីជាករណីឆ្លងវីរុសកូវីដ-១៩ កើនឡើងនៅក្នុងប្រទេសជាច្រើននៃពិភពលោកក្ដី ក៏បណ្ដាវិនិយោគិនមានជំនឿថា វ៉ាក់សាំងដែលមានសុវត្ថិភាព និងមានប្រសិទ្ធភាពនឹងមកដល់ឆាប់ៗនេះ ដែលពួកគេព្យាករណ៍ថា នឹងមកដល់យ៉ាងយូរនៅពាក់កណ្ដាលឆ្នាំ២០២១ ។
- គោលនយោបាយនៃធនាការកណ្តាល៖ ធនាគារកណ្ដាលរបស់អាមេរិក ឬ Federal Reserve បានបង្ហាញជំហរច្បាស់ហើយថា ខ្លួននឹងរក្សាអត្រាការប្រាក់ឱ្យនៅទាប ហើយបន្តបោះពុម្ពក្រដាសប្រាក់បន្ថែម នៅក្នុងស្ថានភាពដ៏ចាំបាច់ ដើម្បីជំរុញកំណើនសេដ្ឋកិច្ចអាមេរិក។
កត្ដានេះបានធ្វើឱ្យមានជំនឿថា សេដ្ឋកិច្ចកំពុងឈានទៅរកភាពធូរស្រាល។ វាក៏ធ្វើឱ្យបណ្ដាវិនិយោគិនលើពិភពលោក ស្វែងរកប្រាក់ចំណេញផងដែរ ដែលធ្វើឱ្យមានផលប៉ះពាល់ដល់តម្រូវការប្រាក់ដុល្លារ នៅពេលមានការផ្គត់ផ្គង់ខ្ពស់។
- រដ្ឋការរបស់លោក បៃឌិន ជិតចូលកាន់អំណាច
យោងតាមលោក ម៉ាក ហែហ្វេឡេ (Mark Haefele) ប្រធានផ្នែកវិនិយោគនៃក្រុមហ៊ុនហិរញ្ញវត្ថុពិភពលោក UBS Global Wealth Management បានឱ្យដឹងថា ពន្ធដារបានរួមចំណែក ធ្វើឱ្យប្រាក់ដុល្លារឡើងថ្លៃ ក្នុងរយៈពេលប៉ុន្មានឆ្នាំចុងក្រោយនេះ។ ពន្ធលើទំនិញនាំចេញពីបរទេស ដូចជា ប្រទេសចិនជាដើម បានបង្កភាពតានតឹងផ្នែកភូមិសាស្ត្រនយោបាយ។
ជម្លោះជាមួយប្រទេសដូចចិន ជាដើម ប្រធានាធិបតីអាមេរិក ដែលទើបជាប់ឆ្នោត ចូ បៃឌិត (Joe Biden) ត្រូវបានគេរំពឹងថា នឹងប្រើយុទ្ធសាស្ត្រផ្សេងៗពីរនេះ ដើម្បីទប់ទល់ជាមួយចិន។ ហើយនោះជាផលវិជ្ជមាន សម្រាប់កំណើនសេដ្ឋកិច្ចពិភពលោក ប៉ុន្តែមានផលអវិជ្ជមានសម្រាប់ប្រាក់ដុល្លារ។
ទោះជាយ៉ាងណា ការធ្លាក់ថ្លៃប្រាក់ដុល្លារ មិនមែនជារឿងអាក្រក់នោះឡើយ។ តាមពិត វាជាគុណប្រយោជន៍ទៅវិញទេ សម្រាប់ការរើបឡើងនៃសេដ្ឋកិច្ច។ នេះបើយោងតាមការបកស្រាយរបស់លោក ណេដ រ៉ាំផេលទីន (Ned Rumpeltin) ប្រធានផ្នែកយុទ្ធសាស្ត្ររូបិយប័ណ្ណនៅធនាគារកាណាដា TD Securities ៕
