ដោយគង់ ម៉ាលីនណា
ភ្នំពេញៈ អ្នកជំនាញអចលនទ្រព្យបាននិយាយថា ដីធ្លីនៅតំបន់ជាយក្រុងនៅតែឡើងថ្លៃ ទោះបីស្ថិតក្នុងវិបត្តិសេដ្ឋកិច្ចក្តី ដែលបញ្ហានេះបណ្តាលមកពីកត្តាសំខាន់ៗជាច្រើន។
ទីប្រឹក្សាសមាគមអ្នកអភិវឌ្ឍន៍ដីឡូត៍កម្ពុជា លោកយិន លាងគង់ ស្ថាបនិកនិងជាអគ្គនាយកគេហទំព័រ Propertyarea.asia បានមានប្រសាសន៍ឲ្យដឹងកាលពីរសៀលថ្ងៃទី៦ ធ្នូកន្លងមកថា ការឡើងថ្លៃដីធ្លីនៅតំបន់ជាយក្រុង ពិសេសតំបន់ដែលមានចម្ងាយពី២០ ទៅ៣០គីឡូម៉ែត្រពីទីក្រុងដោយសារកត្តាសំខាន់ៗជាច្រើន ដូចជា ទី១ ការរីកចម្រើននៃផ្នែកនគរូបនីយកម្ម ដែលមានន័យថា កំនើនប្រជាពលរដ្ឋបានកើនឡើង និងហូរចូលទីក្រុងកាន់តែច្រើន និងការពង្រីកក្រុងជាបន្តបន្ទាប់របស់រដ្ឋាភិបាល។
ទី២ ការកើនឡើងនូវលំហូរប្រជាជនពីជនបទ មកកាន់ទីក្រុងកាន់តែច្រើនពីមួយឆ្នាំទៅមួយឆ្នាំ ហើយបើយោងតាមការសិក្សារបស់ក្រសួងរៀបចំដែនដី នគរូបនីយកម្មនិងសំណង់បានឲ្យដឹងថា ប្រជាជនរស់នៅទីក្រុង និងទីប្រជុំជននឹងកើនដល់៧លាននាក់នៅឆ្នាំ២០៣០ ទី៣ ការកសាងហេដ្ឋារចនាសម្ព័ន្ឋរបស់រដ្ឋាភិបាល កាន់តែសកម្មដើម្បីបំរើសចក្តីត្រូវការរបស់ប្រជាពលរដ្ឋ ទី៤ ការរីកចម្រើននៃសេដ្ឋកិច្ច សង្គម ពិសេសកំណើនប្រាក់ចំណូលរបស់ប្រជាជននៅទីក្រុងកើនឡើងខ្ពស់ ជាងតំបន់ជនបទឬតាមបណ្តាខេត្តនានា។
លោកយិន លាងគង់បានបន្តថា “កត្តាសំខាន់ៗទាំង៤ខាងលើនេះ ជាកត្តាសន្យានុម័ត ដែលមិនអាចប្រកែកបាន ហើយវាជាកត្តាលីករយ៉ាងសំខាន់ក្នុងការជំរុញកំនើនតម្លៃដីធ្លីនៅតំបន់ជាយក្រុងបន្តទៀត” ។
លោកបន្ថែមថា តាមព៌តមានដែលយើងទទួលបាន រដ្ឋាភិបាលកម្ពុជានឹងមានផែនការពង្រីកទីក្រុងភ្នំពេញបន្ថែមទៀត នៅឆ្នាំ២០២៥ឬ២០៣០ខាងមុខ ដើម្បីជំរុញការបង្ខិតជនបទមកកៀកទីក្រុងកាន់់តែច្រើន ពិសេសជំរុញការអភិវឌ្ឍសេដ្ឋកិច្ចជាតិកាន់តែល្អប្រសើរបន្ថែមទៀត ខណៈមានការសិក្សារួចហើយថា ចំនួនប្រជាពលរដ្ឋរស់នៅទីក្រុងភ្នំពេញនឹងកើនឡើងដល់៥លាននាក់នៅឆ្នាំ២០៣០ខាងមុខនេះ។
ជាមួយគ្នានេះ លោកបណ្ឌិតឧកញ៉ាគីម ហ៊ាងប្រធាន KW Cambodia បានមានប្រសាសន៍ថា ពិតមែនហើយប្រជាជន មិនចង់ចេញទីក្រុងទៅរស់នៅតាមជនបទនោះទេ មានតែមានចេញពីជនបទមករស់នៅទីក្រុងភ្នំពេញ ដោយសារការរីកចម្រើននៃសេដ្ឋកិច្ច ប្រាក់ចំណូល នឹងធ្វើឲ្យជីវភាពប្រជាជននៅទីក្រុងកាន់តែប្រសើរឡើង ដែលនេះជានិន្នាការសាកលមួយ។
រាជធានីភ្នំពេញបច្ចុប្បន្នមានប្រជាជនរស់នៅជាង៣លាននាក់ និងមានផ្ទៃក្រឡាសរុបប្រមាណ៧០០គីឡូម៉ែត្រការ៉េ និងមានខ័ណ្ឌចំនួន១៥ ៕