ដោយ: គង់ លាងហួរ
ប៉េកាំង: ប្រទេសចិនបានប្រកាស លុបចោលការរឹតបន្តឹងទាំងអស់ ដើម្បីបើកឱកាសឱ្យក្រុមអ្នកវិនិយោគបរទេស អាចបណ្តាក់ទុន ក្នុងវិស័យផលិតកម្មនៅប្រទេសចិន។នេះបើយោងតាមការដកស្រង់ចុះផ្សាយ ដោយទីភ្នាក់ងារសារពត៌មានចិន Xinhua។
ការសម្រេចចិត្តនេះបានធ្វើឡើង ក្នុងគោលបំណងបើកចំហទ្វារឱ្យកាន់តែធំទូលាយ ដើម្បីស្វាគមន៍បណ្តាវិនិយោគិនបរទេសមកពីគ្រប់ទិសទី។
ការបោះពុម្ពផ្សាយជាថ្មី នូវបញ្ជីអវិជ្ជមានថ្នាក់ជាតិស្តីពី ការវិនិយោគបរទេស បានចូលជាធរមាន នៅថ្ងៃសុក្រ ទី១ ខែវិច្ឆិកា ឆ្នាំ២០២៤ ដោយបានលុបចោល នូវគោលនយោបាយរឹតបន្តឹងមិនឱ្យក្រុមហ៊ុនបរទេស បោះទុនវិនិយោគលើការផលិតមុខទំនិញចំនួន២ ក្នុងវិស័យផលិតកម្ម ដែលជាមុខទំនិញនៅសេសសល់ចុងក្រោយក្នុងបញ្ជីចាស់។
ចំណែកបញ្ជីអវិជ្ជមានថ្នាក់ជាតិស្តីពី ការវិនិយោគបរទេសថ្មីចុងក្រោយបង្អស់ ដែលត្រូវបានបោះពុម្ពផ្សាយ នៅដើមខែវិច្ឆិកានេះបានគូសបញ្ជាក់ថា វិស័យដែលត្រូវបានរឹតបន្តឹងមិនឱ្យវិនិយោគិនបរទេសឈានជើងចូល ត្រូវបានកាត់បន្ថយបន្ថែមទៀតមកនៅសល់ត្រឹមចំនួន២៩វិស័យ ។
ចំណែកបញ្ជីអវិជ្ជមានមួយទៀត ដែលត្រូវបានអនុវត្តន៍នៅក្នុងតំបន់ពាណិជ្ជកម្មសេរីរបស់ប្រទេសចិន បានសម្រេចលុបចោលការរឹតបន្តឹងទាំងស្រុង លើការវិនិយោគបរទេសក្នុងវិស័យផលិតកម្មនៅឆ្នាំ២០២១។
យោងតាមវិទ្យាស្ថានស្រាវជ្រាវមួយ ដែលចំណុះក្រោមគណៈកម្មាធិការអភិវឌ្ឍន៍ និងកំណែទម្រង់ជាតិចិន (NDRC) ការចងក្រងនូវបញ្ជីអវិជ្ជមាន ថ្នាក់ជាតិថ្មីនេះបង្ហាញថា ឧស្សាហកម្មផលិតកម្មរបស់ប្រទេសចិន បានឈានដល់កម្រិតបើកចំហរឈានមុខគេលើពិភពលោក ខណៈបណ្តាប្រទេសកំពុងអភិវឌ្ឍន៍ស្ទើរតែទាំងអស់លើពិភពលោក បានដាក់កម្រិតលើការវិនិយោគបរទេសក្នុងវិស័យផលិតកម្ម។
តម្លៃបន្ថែម(Value-added) លើការផលិតរបស់ប្រទេសចិនបានវ៉ាដាច់សហរដ្ឋអាមេរិក ជាលើកដំបូងក្នុងឆ្នាំ២០១០ ហើយចិនគ្របដណ្តប់ចំនួនប្រហែល៣០ភាគរយ នៃផលិតកម្មសកលនៅឆ្នាំ២០២៣ ដែលធ្វើឱ្យប្រទេសចិន ក្លាយជារោងចក្រផលិតកម្មដ៏ធំបំផុតរបស់ពិភពលោក ក្នុងរយៈពេល១៤ឆ្នាំជាប់ៗគ្នា។
សម្រាប់ប្រទេសចិន ឧស្សាហកម្មផលិតកម្មជាវិស័យដំបូងបំផុត ដែលត្រូវបានបើកចំហទូលាយ ដល់វិនិយោគិនបរទេស ហើយផលិតកម្មក៏ជាវិស័យ ដែលមានការប្រកួតប្រជែងខ្លាំងបំផុតផងដែរ៕ប្រភព: Xinhua៕
