ដោយៈ គង់ ម៉ាលីនណា
ភ្នំពេញៈ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ដោយមានការគាំទ្រពីធនាគារជាតិនៃកម្ពុជា និងរដ្ឋបាលខេត្តមួយចំនួន បានរៀបចំសិក្ខាសាលាដើម្បីជម្រុញភាពធន់របស់វិស័យនេះ ការធានាការពារអតិថិជន។
សិក្ខាសាលាជាបន្តបន្ទាប់ស្ដីពី “អភិបាលកិច្ចរបស់គ្រឹះស្ថានហិរញ្ញវត្ថុក្នុ ងការធានាប្រសិទ្ធភាព នៃប្រតិបត្តិការប្រកបដោយចីរភាព ការទទួលខុសត្រូវ និងបរិយាបន្ន” ត្រូវបានដាក់ឱ្យដំណើរការ ដើម្បីដោះស្រាយបញ្ហាប្រឈមនានា របស់វិស័យធនាគារ និងហិរញ្ញវត្ថុនៅកម្ពុជា។
គោលបំណងសិក្ខាសាលានេះ ដើម្បីចែករំលែកចំណេះដឹងដល់អ្នកគ្រប់គ្រងសាខា អំពីការទទួលខុសត្រូវសំខាន់ៗរបស់ពួកគេ ក្នុងប្រតិបត្តិការធនាគារ ប្រកបដោយក្រមសីលធម៌ និងវិជ្ជាជីវៈ ដោយបង្កើនភាពធន់នៃវិស័យនេះ និងធានាការការពារអតិថិជន។
យោងតាមឯកសារសមាគមបានបង្ហាញថា វិស័យនេះបានប្រឈមមុខនឹងបញ្ហា ដែលកើតចេញពីជំងឺរាតត្បាតកូវីដ–១៩ ភាពតានតឹងផ្នែកភូមិសាស្ត្រនយោបាយអូសបន្លាយ និងការកើនឡើងអត្រាការប្រាក់ ដែលកំណត់ដោយធនាគារកណ្តាលអាមេរិក។
ខណៈពេលដែលបញ្ហាទាំងនេះ បានធ្វើឱ្យកំណើនយឺតយ៉ាវ ក្នុងវិស័យធនាគាររបស់សហរដ្ឋអាមេរិក កម្ពុជាក៏ឃើញមានការកើនឡើង នៃការសងឥណទានយឺតផងដែរ។
សិក្ខាសាលាមួយ ត្រូវបានធ្វើឡើងនៅថ្ងៃទី៤ ខែកក្កដា ឆ្នាំ២០២៤ នៅខេត្តសៀមរាប។ ក្រោមអធិបតីភាពលោក សំកុល សុចិត្រា អភិបាលរងខេត្តសៀមរាប និងលោកអែម កំណាន់ អគ្គនាយករង ត្រួតពិនិត្យធនាគារជាតិនៃកម្ពុជា រួមជាមួយតំណាងសមាគមទាំងពីរ។
អ្នកគ្រប់គ្រងសាខាប្រមាណ៨០នាក់ មកពីខេត្តសៀមរាប ព្រះវិហារ កំពង់ធំ និងកំពង់ចាមបានចូលរួម។
សិក្ខាសាលានាពេលខាងមុខ ត្រូវបានកំណត់ពេលសម្រាប់ខេត្តបាត់ដំបង រាជធានីភ្នំពេញ និងខេត្តរតនគិរី ដែលគ្របដណ្តប់លើតំបន់សំខាន់ៗ ក្នុងប្រទេសកម្ពុជា។
លោក កំណាន់ បានសង្កត់ធ្ងន់លើសារៈសំខាន់ នៃសិក្ខាសាលាទាំងនេះ ជាមធ្យោបាយដើម្បីបង្កើន ការយល់ដឹងអំពីការអភិវឌ្ឍន៍ប្រព័ន្ធធនាគារ ច្បាប់ និងបទប្បញ្ញត្តិពាក់ព័ន្ធ ក្រមសីលធម៌ ច្បាប់ឥណទាន គោលការណ៍អភិបាលកិច្ចល្អ និងបច្ចេកទេសគ្រប់គ្រងសាខា។
លោកបានឱ្យដឹងថា សិក្ខាសាលាទាំងនេះ ផ្តល់ជាវេទិកាមួយសម្រាប់សមាគម និងស្ថាប័ននានា ដើម្បីស្វែងយល់ពីបញ្ហាប្រឈមជាក់ស្តែង និងប្រតិបត្តិការរបស់សាខាខេត្ត និងក្រុង។
លោកកំណាន់ បានបញ្ជាក់ថា ថ្នាក់ដឹកនាំសាខា ឬតំបន់របស់គ្រឹះស្ថានធនាគារ និងហិរញ្ញវត្ថុ ត្រូវប្រកាន់ខ្ជាប់នូវគោលការណ៍អភិបាលកិច្ច ដែលផ្តោតជាពិសេសលើចីរភាព ប្រសិទ្ធភាព ការទទួលខុសត្រូវ និងបរិយាបន្ន។
លោកបានបន្ដថា “ពិតជាមានសារៈសំខាន់ណាស់ ដោយសារគោលការណ៍ទាំងនេះ មិនត្រឹមធានានូវជោគជ័យនិងកេរ្តិ៍ឈ្មោះរបស់គ្រឹះស្ថានធនាគារ និងហិរញ្ញវត្ថុប៉ុណ្ណោះទេ វាក៏បានរួមចំណែកដល់ការអភិវឌ្ឍសហគមន៍ និងវិស័យធនាគារទាំងមូល”។
ជាមួយគ្នានេះ លោកតូច ចៅចេក សមាជិកក្រុមប្រឹក្សាភិបាលនៃសមាគមធនាគារកម្ពុជា បានពិភាក្សាអំពីវិធានការសកម្មដែលកំពុងត្រូវបានអនុវត្ត ដើម្បីដោះស្រាយបញ្ហាប្រឈម និងលើកកម្ពស់ការអនុវត្តអាជីវកម្ម ប្រកបដោយការទទួលខុសត្រូវ៕
