ដោយ៖ លក្ខិណា
ភ្នំពេញ៖ ជាការកត់សម្គាល់ ខេត្តសំខាន់ៗចំនួន៣ នាពេលបច្ចុប្បន្ននេះ បាននិងកំពុងពង្រីកប្រព័ន្ធហេដ្ឋារចនាសម្ព័ន្ធបន្ថែម ដើម្បីទាញយកការវិនិយោគ និងទេសចរណ៍បន្ថែមទៀត ក្នុងនោះគេឃើញខេត្តកំពត ក្រុងព្រះសីហនុ និងខេត្តសៀមរាប ។
រាជរដ្ឋាភិបាល កំពុងសាងសង់ផ្លូវល្បឿនលឿនមួយពីភ្នំពេញទៅកាន់ខេត្តព្រះសីហនុ ដែលជាខេត្តប៉ូលសេដ្ឋកិច្ចសំខាន់នៅកម្ពុជា ហើយក្នុងខេត្តនេះដែរ រាជរដ្ឋាភិបាលក៏បានសាងសង់ហេដ្ឋារចនាសម្ព័ន្ធជាច្រើនខ្សែ ដើម្បីសម្រួលដល់ការធ្វើដំណើររបស់ពលរដ្ឋក្នុងមូលដ្ឋាន និងភ្ញៀវទេសចរពីតំបន់ផ្សេងទៀតទៅទស្សនានិងកម្សាន្តនៅខេត្តនេះ។ ការអភិវឌ្ឍហេដ្ឋារចនាសម្ព័ន្ធក្នុងខេត្តព្រះសីហនុ នឹងធ្វើឱ្យវិនិយោគមកក្នុងនិងក្រៅប្រទេស ចូលវិនិយោគក្នុងខេត្តនេះបន្ថែមទៀតទៅលើអចលនទ្រព្យទេសចរណ៍ ដែលកំពុងមានសក្ដានុពលខ្ពស់ ។
បើតាមអ្នកជំនាញអចលនទ្រព្យជាច្រើនរូប បាននិយាយថា ខេត្តព្រះសីហនុ ជាខេត្តប៉ូលសេដ្ឋកិច្ចដ៏សំខាន់សម្រាប់ប្រទេសកម្ពុជា បន្ទាប់ពីរាជធានីភ្នំពេញ។ ខេត្តនេះ គឺមានការចាប់អារម្មណ៍ខ្លាំងពីវិនិយោគបរទេសជាពិសេសចិន ព្រោះវាជាខេត្ត ដែលមានកំពង់ផែទឹកជ្រៅតែមួយគត់នៃប្រទេសកម្ពុជា ហើយខេត្តនេះក៏កំពុងរៀបចំជាខេត្តគំរូមួយរប់សចិនផងដែរ។
ខេត្តសៀមរាប ក៏ជាគោលដៅទេសចរណ៍ដ៏សំខាន់សម្រាប់ប្រទេសកម្ពុជា ។ បច្ចប្បន្ននេះ ខេត្តសៀមរាប មានក្រុមហ៊ុនក្នុងនិងក្រៅប្រទេសជាច្រើនកំពុងសម្លឹងទៅរកខេត្តសៀមរាប សម្រាប់ការអភិវឌ្ឍវិស័យជាច្រើន ជាពិសេសអចលនទ្រព្យនិងវិស័យផ្សេងទៀតគាំទ្រដល់វិស័យទេសចរណ៍។
សម្រាប់ខេត្តកំពត ក៏កំពុងទទួលបានការចាប់អារម្មណ៍ ពីសំណាក់វិនិយោគិនក្នុងស្រុកជាច្រើនផងដែរ ហើយធ្វើឱ្យសកម្មភាពទិញលក់ដីធ្លីក្នុងខេត្តនេះ មានភាពមមាញឹកផងដែរ។ រាជរដ្ឋាភិបាល ក៏បាននិងកំពុងសាងសង់ផ្លូវជាតិលេខ៣តភ្ជាប់ពីភ្នំពេញទៅកាន់ខេត្តទាំងពីរនេះផងដែរ ធ្វើឱ្យការធ្វើដំណើរទៅកាន់ខេត្តកំពតកាន់តែប្រើរយៈពេលខ្លី។ ខេត្តកំពត ក៏មានគម្រោងជាច្រើន បាននិងកំពុងសាងសង់បម្រើឱ្យវិស័យសេដ្ឋកិច្ចកម្ពុជាផងដែរ៕
